Aldís Hafsteinsdóttir

Vaknaði kl. 5:45 og dreif mig út til að mæta í Zumba kl. 6:00.  Komst þá að því að Zumba er bara alls ekki boði svona snemma á þriðjudögum - óheppin alltaf ! ! !   En úr því ég var nú komin á fætur þá fór ég langan kraftgöngutúr um götur bæjarins og upp að Reykjafjalli.  Soldið mikið myrkur á stígunum en vasaljósið í símanum gerði alveg sitt gagn...  Verst að ég þarf að vakna aftur á morgun svona snemma því að ÞÁ er nefnilega Zumba :-)

Fundur í Almannavarnaráði Árnessýslu eftir hádegi og strax á eftir fundur í stjórn Sorpstöðvar Suðurlands.  Á báðum stöðum var unnið að fjárhagsáætlun fyrir næsta ár en nú eru aðalfundir og ársþing framundan þar sem þarf að samþykkja áætlanir alls staðar.

Meirihlutafundirnir eru þessa dagana kl. 16:30 á mánudögum vegna skyndilegs áhuga þeirrar sem þetta ritar á líkamsrækt sem fram fer í kringum kvöldmat.    Er nefnilega komin með kort í Fitness bilið og mæti þar oft í viku.  Virkilega gaman í góðum hópi samstarfskvenna héðan af bæjarskrifstofunni.

Fjármálaráðstefna sveitarfélaganna var haldin á fimmtudag og föstudag í síðustu viku.  Þar hlýddu sveitarstjórnarmenn víðsvegar að á fróðlega fyrirlestra, ræddu hreinskilið um þau mál sem á hópnum brenna og áttu samtal við ráðamenn í ríkisstjórn um samskipti ríkis og sveitarfélaga.  Fjármálaráðstefnan er árlegur vettvangur sveitarstjórnarmanna í aðdraganda fjárhagsáætlunar og þar eru lagðar línur fyrir næsta ár hvað varðar helstu stærðir og hagtölur.

Stjórn sveitarstjórnarráðs Sjálfstæðisflokksins nýtti þetta tækifæri vel og fundaði með ráðherrum og forsvarsmönnum flokksins á miðvikudagskvöldinu.  Árlega hittast síðan Sjálfstæðismenn í Valhöll á fimmtudagssíðdeginu með þeim alþingismönnum sem eiga heimangengt.  Það eru ávallt góðar samkomur.

Hér má sjá öll þau erindi sem flutt voru á Fjármálaráðstefnunni árið 2015.
-----------------
Hvergerðingar öttu kappi við Ölfusinga í Útsvarinu síðastliðið föstudagskvöld.  Það voru þau Svava, Úlfur og Eyþór sem skipuðu okkar lið þetta árið.  Þetta er alltaf skemmtilegt en í ár varð okkar fólk á játa sig sigrað með einu stigi.  Hálf fúlt en mikið ansi var þetta spennandi :-)
-------------------
Uppgötvaði um helgina hversu arfaslök hugmynd það var að breiða net yfir rifsberjarunnana í sumar.  Berin voru reyndar í ofgnótt á greinunum en þegar ég ætlaði að taka netin af svona fyrir veturinn komst ég að því að einir 5 þrestir höfðu borið beinin í þessu gríðarlega góða fuglaveiðineti.  Það var sem sagt alveg ferlega rosaleg léleg hugmynd að kaupa svona net sem verður ekki endurtekið.    Mér verður aftur á móti nuddað upp úr þessu lengi ! ! ! !

Fundur í dag á Hellu um svæðisskipulag á Suðurland.  Stór hópur frá öllum sveitarfélögum á Suðurlandi hefur nú hist þrisvar sinnum til að fara yfir möguleikana sem felast í sameiginlegu svæðisskipulagi.  Mikið hefur verið rætt um það hvaða leiðir í því væru vænlegastar en mörgum finnst Suðurland allt of stórt og viðamikið verkefni í þessu samhengi.  Matthildur Elmarsdóttir frá Alta hefur verið okkur til halds og trausts í þessu ferli og hefur gert það mjög vel.  Við höfum mikið rætt um kortlagningu á gæðum og möguleikum svæðisins en endanleg tillaga hópsins mun verða lögð fyrir stjórn SASS og ársþingið sem halda á í október. 

Fundur í framkvæmdastjórn Héraðsnefndar Árnesinga hér í Hveragerði í morgun.  Þar er ég nú dottin inn aftur eftir að Ninna Sif tók þá ákvörðun að fara í leyfi.  Þar með er ég einnig orðin formaður í stjórn Listasafns Árnesinga eins og ég hef áður verið.  Það er nú bara gaman að því enda málefni safnsins með eindæmum skemmtileg.   Á fundinum í dag undirbjuggum við haustfund Héraðsnefndar sem halda á hér í Hveragerði þann 15. október.

Fékk lítinn fyrirvara fyrir sjónvarpsviðtal um móttöku flóttamanna þar sem fréttamaðurinn náði í skottið á mér á leiðinni til Reykjavíkur og ég dreif mig beint upp í Efstaleiti.  Pínulitið skondið þar sem viðtalið var búið áður en Lárus náði að leggja bílnum, enda allt tilbúið þegar ég mætti og setningarnar svo sem ekki margar og enn færri sem birtust.

Persónukjör er viðhaft í kosningum í Noregi.  Með þannig kosningafyrirkomulagi geta kjósendur haft mun meiri áhrif á það hvaða einstaklingar ná kjöri.

Eins og þið sjáið hefur hin aldna kempa Thorvald Stoltenberg nú gengið í endurnýjun lífdaga í norskum stjórnmálum og greinilega kom það fáum meira á óvart en honum sjálfum.

Með þessu kosningafyrirkomulagi sem ég held að sé á margan hátt mjög gott, getur nefnilega hver sem er blandað sér í baráttuna og "heiðurssætið" getið af sér bæjarfulltrúa eins og reyndin varð í Noregi núna.

Það hefur svo sem verið reynt að koma á persónukjöri hér á landi en frumvarp dagaði uppi árið 2012 sem gerði það að tillögu að einmitt norska leiðin yrði tekin upp hér.   Mér fannst reyndar alltaf og finnst enn að úr því að þingmenn eru svona kappsamir um persónukjörið að þá ætti að sjálfsögðu að innleiða það fyrst við þingkosningar.  Spurning hvort að einhverjir þar inni óttist svo mjög vilja kjósenda að þeir vilji endilega fyrst innleiða þetta á sveitarstjórnarstiginu og vera sjálfir áfram öruggir í sínum sætum...

Þessi texti er frá Innanríkisráðuneytinu:

Hér  var vaknað fyrir allar aldir því  fundur bæjarráðs var kl. 7:30 og ekki dugði að mæta úfin, ógreidd og ómáluð þar sem leiðin lá til Reykjavíkur strax á eftir.  Þar hélt Skipulagsstofnun nefnilega sinn árlega fræðsludag og  þar var ég umræðustjóri í hópi sem fjallaði um áskoranir og lausnir í ferðaþjónustu með áherslu á skipulagsmál.  Heilmargir mættu í málstofuna og miklar umræður spunnust um málið.  Kannski ekki skrýtið þar sem um fátt hefur verið meira talað að undanförnu en skipulagsleysi í ferðaþjónustu.  Þarna kom skýrt fram það sjónarmið að það vantaði meiri fjármuni til uppbyggingar og að ágóðinn af þessari atvinnugrein yrði því miður ekki eftir hjá sveitarfélögunum þrátt fyrir að krafan um úrbætur og uppbyggingu sé í flestum tilvikum gerð til þeirra.

Byrjaði daginn með Eyþóri, forseta bæjarstjórnar, á fundi niður í Þorlákshöfn þar sem við hittum Gunnstein bæjarstjóra og Svein forseta þar á bæ.  Áttum við langan og góðan fund þar sem við fórum vel yfir ýmis mál er lúta að samskiptum sveitarfélaganna.  Það er gott að geta átt góðar viðræður við nágranna sína. 

Þjóðarsáttmáli um læsi var undirritaður í dag af fulltrúum sveitarfélaga í Árnessýlsu.  Athöfnin fór fram í glæsilega nýja skólanum þeirra á Stokkseyri en Illugi Gunnarsson menntamálaráðherra undirritaði ásamt fulltrúa frá Heimili og skóli. Þetta var hin besta athöfn og ráðherra flutti afar góða ræðu um mikilvægi læsis og ekki síður um mikilvægi þess að við þessi fullorðnu gefum börnunum okkar þann tíma sem þarf til að þau geti æft sig að lesa.  Það gefur þeim svo óendanlega mikið forskot í lífinu. 

Stjórn Sambands íslenskra sveitarfélaga hittist hér fyrir austan fjall í dag.  Byrjuðum á fundi með bæjarstjórn Ölfuss þar sem farið var yfir helstu verkefni sveitarfélagins.  Það sama var síðan gert með bæjarstjórn Árborgar í hádeginu á Selfossi.  Stjórnin fundaði síðan í Hveragerði en að fundi loknum var Björk Vilhelmsdóttur færður  þessi fíni blómvöndur ásamt þökkum fyrir samstarfið og árnaðaróskum um góða framtíð.  Það var að sjálfsögðu formaðurinn Halldóir Halldórsson sem afhenti blómin.

Fundur í hádeginu í Ferðamálaráði.  Fínn fundur þar sem farið var yfir mál er varða stefnumótun í ferðaþjónustu.  Málaflokkurinn er löng orðinn okkur svo mikilvægur að það verður að sinna honum eins og öðrum atvinnugreinum.

Bæjarstjórnarfundur hófst kl. 17 og lauk ekki fyrr en kl. 20.  Fjölmörg mál á dagskrá og mörg þeirra stór og stefnumarkandi.  Meðal annars hafa nú verið samþykktar reglur um frístundastyrki og geta foreldrar og forráðamenn fengið 12.000 króna endurgreiðslu gegn framvísun kvittunar strax í næstu viku.  Reglurnar verða settar á heimasíðu bæjarins á morgun.  Ennfremur var samþykkt að hefja undirbúning að byggingu leikskóla með það að markmiði að börnum frá 12 mánaða aldri verði boðið pláss.  Starfshópur um málið var ákveðinn og á hann að skila af sér 15. nóvember.   Ennfremur var samþykkt tillaga um að Hveragerðisbær myndi bjóðast til að taka við flóttamönnum.  Eftir samtal við Ástu framkvæmdastjóra Árborgar í dag virðist best að sveitarfélögin hér á svæðinu eigi með sér samstarf um verkefnið ef af verður.
---------
Leikurinn við Tyrki í körfubolta í dag var meirháttar og landslíðið hefur komið flestum á óvart með góðri frammistöðu.  Það var nú líka skemmtilegt að sjá feðgana á fremsta bekk syngja hástöfum með öðrum stuðningsmönnum í lok leiks.  Þetta er greinilega búin að vera skemmtileg ferð.
---------
Annars var verra að kötturinn slapp út í kvöld.  Ef þið sjáið einhvers staðar gulbröndóttan kött þá eigum við hann og þið megið gjarnan láta okkur vita....

Næstum því fundalaus dagur sem er ótrúlega gott öðru hverju.  Þá getur maður klórað sig áfram í verkefna dyngjunni og jafnvel afgreitt og klárað eitthvað...

Í dag sendi ég bréf fyrir hönd bæjarstjórnar til Velferðarráðuneytisins þar sem vilja bæjarstjórnar til að taka við flóttamönnum var lýst.  Málið er á dagskrá bæjarstjórnar á morgun en þar sem frestur til að tilkynna um vilja bæjarstjórnar rann út í dag urðu bæjarfulltrúar ásáttir um að gera þetta með þessum hætti. Hér eru á margan hátt ákjósanlegar aðstæður til móttöku flóttamanna eins og lýst var í bréfinu en best fannst mér samt að geta með sanni og stolti sagt eftirfarandi í lokin á bréfinu til ráðuneytisins:  "Síðast en ekki síst:  Hér í Hveragerði hafa íbúar ávallt verið umburðarlyndir gagnvart nýjungum og nýjum íbúum enda búa hér aðilar frá öllum heimshornum, af hinum ýmsu trúarbrögðum og kynþáttum, ávallt án allra árekstra.  Með von um að  málefni flóttafólks fari í farsælan farveg hér á landi sem annars staðar." 
------
Haldiði ekki að hann Albert Ingi hafi dúkkað upp á skrifstofunni aldeilis óforvarandis í gær og kom móður sinni rækilega á óvart en ég hef nú ekki séð drenginn frá því hann fór á Laugarvatn.  Það er svona líka hrikalega gaman þarna uppfrá :-)

Maður reynir alltaf að teygja sig eins og hægt er á myndum með karlpeningnum í þessari fjölskyldu !

Haustrigningarnar hafnar fyrir alvöru og hér fossar regnið sem aldrei fyrr.

Í morgun tók ég á móti sendiherra Japans ásamt borgarstjóra borgarinnar Izu í Japan.  Við ræddum nokkuð lengi um málefni er tengja þjóðirnar en á þessu svæði er til dæmis staðið frammi fyrir vanda sem væntanlega á bara eftir að aukast í hinum vestrænu löndum.   Í borginni Izu búa um 32.000 manns en þar fæðast einungis um 130 börn á ári. Þar hefur líka fækkað mjög því unga fólki sem velur að vera í sambandi því eins og gestir mínir sögðu i morgun leggja mjög margir Japanir mestu áhersluna á sjálfa sig og þá er ekki pláss fyrir börn eða maka.  Til að bregðast við þessu hafa yfirvöld í Izu ákveðið að greiða verðandi mæðrum 400 dollar við 26 viku meðgöngu svo þær geti búið sig sem best undir fæðingu barnsins.

Eftir skemmtilegt spjall heimsóttum við Landbúnaðarháskólann að Reykjum þar sem tilraunahúsið var skoðað og auðvitað Afríka sem var óvanalega gróskumikil í þetta sinn.   Fórum síðan í Hveragarðinn sem vakti mikla lukku eins og alltaf.   Þar vekja vatnslausir hverirnir jafn mikla athygli og áður enda hvar annars staðar er hægt að skoða hveri að innan ?

Síðdegis var meirhlutafundur til undirbúnings bæjarstjórnarfundinum sem verður í vikunni.  Í sumar hefur bæjarráð farið með fullnaðarafgreiðslu mála en nú tekur bæjarstjórn við að loknu sumarfríi.

Kötturinn hefur ekki fengið útivistarleyfi eftir síðast strok.  Nú höfum við þurft að sækja hann til strákanna á bílaverkstæðinu hans Jóa Garðars,  til Lars og Ragnheiðar í Borg,  í ísbúðina Gottís og allavega tvisvar á tjaldsvæðið.  Á laugardagsmorguninn síðasta var síðan hringt árla úr Laugaskarði og tilkynnt að þar væri kattarspottið sest að.  Hann var ekki sá vinælasti þegar ég brunaði þangað uppeftir eldsnemma til að sækja útilegumanninn mikla.  Ég hef aldrei áður vitað til þess að maður sjái hreinlega undir þófana á heimiliskettinum í hvert sinn sem hann sleppur út og hann horfir ekki einu sinni til baka...  Tengslamyndun hans er klárlega ekki í lagi - nema hann sé hreinlega bilaður sem mér finnst reyndar mun líklegra  ! ! !