23. júlí 2016
Átti fund í dag með Pjetri Hafsteini Lárussyni þar sem við gengum frá texta sem hann hefur unnið um Egilsstaði eða Gamla barnaskólann. Textinn ásamt myndum er nú farinn í hönnun en gert er ráð fyrir að afhjúpa söguskilti um húsið á Blómstrandi dögum. Gekk einnig frá svarbréf um eftir bæjarráðsfundinn í gær og svaraði tölvupóstum. Dagurinn var rólegur og því gat ég tekið til á skrifborðinu og skipulagt verkefni framundan. Næsta vika verður ennþá rólegri en smám saman hefur hin opinbera stjórnsýsla lamast eins og gerist á hverju ári á þessum tíma. Algengustu skilaboðin sem ég fæ í tölvupóstinum núna eru out of office skilaboð ...
Fékk í póstinum í dag reiðhjólahjálm sem ég pantaði erlendis frá svona í stíl við hjólið mitt nýja sem ég fékk í afmælisgjöf frá Lárusi og krökkunum þegar ég varð fimmtug. Þessi hjálmur er auðvitað ekkert minna en æðislegur. Alsæl með hann, skiljanlega ...
22. júlí 2016
Það er alltaf svoítið átak að koma heim eftir frí og tala nú ekki um að mæta í vinnuna. Það er nú reyndar líka gott að vera byrjuð að sinna þeim verkefnum sem fyrir liggja en þau eru óneitanlega ærin .
Í morgun var fundur í bæjarráði þar sem hæst bar að bæjarráð hafnaði því eina tilboði sem barst í jarðvinnu bílastæðis við Hamarshöll. Þetta var í annað skiptið sem við buðum út þetta verk en ekkert tilboð barst í fyrra skiptið. Núna barst 1 tilboð og var það 190% yfir kostnaðaráætlun. Því taldi bæjarráð ekki fært að taka því og ákvað að fresta framkvæmdum þar til viðráðanleg verð fást í verkið. Það er greinilega gríðarleg þensla á þessum markaði núna og ekki sjálfgefið að fá viðráðanleg verð í verk.
Átti góðan fund með Lísu sem rekur tjaldsvæðið en hún lætur vel af sér en heilmikil aðsókn er að tjaldsvæðinu núna í sumar. Þar þarf greinilega að bæta aðstöðu ef að fram fer sem horfir og gestakomur aukast með sama hætti og verið hefur.
Fasteignamat hefur hækkað um umtalsvert á liðnu ári enda endurspeglar það verðmæti sölusamninga i sveitarfélaginu. Frétti af því í gær að íbúð við Lækjarbrún hefði selst á yfir 300.000 m2 sem er afar góð sala og vekur vonir um að nú muni fara í gang byggingar á reitum sem beðið hefur verið eftir eins og hér á móti okkur þar sem í raun er beðið eftir þeim glæsilegu íbúðum sem þar á að byggja.
Við Lárus fórum inn í Dal í kvöld og röltum þar um móana og skoðuðum umhverfið. Ferðin var nú ekki síst farin til að kíkja á réttina sem þar er verið að byggja. Hún mun alveg pottþétt verða vinsæll áfangastaður ferðamanna enda veitir hún skjól og ferðamennirnir þarna eru svo hrikalega margir. Í kvöld voru 26 bílar á bílastæðinu og stöðugur straumur fólks að gönguleiðinni.
En hér er mynd af framkvæmdum við réttina. Ég er ansi hrifin af panorama :-)
