<$BlogRSDUrl$>

30. apríl 2008

Vefhýsing í tómu rugli...

Nú hefur slóðin www.aldis.is ekki virkað í þónokkra daga og vonlaust að ná í hýsingarfyrirtækið sem á að sinna þessum málum. Hef fulla trú á því að Ármann í TRS geti reddað hýsingu á nýjum stað þannig að þetta komi ekki fyrir aftur. Þetta er sérstaklega bagalegt þar sem ég hafði uppá síðkastið orðið trú á því að einhverjir örfáir aðrir en allra nánustu ættingjar væru farnir að lesa síðuna reglulega. Hætt við að nýfengnar vinsældir muni dala þegar ekki er hægt að komast inná síðuna ! !

En vinnuvikan litast af frídegi sem framundan er á morgun. Hef aldrei verið hrifin af þessum fimmtudagsfríum á vormánuðum sem gera ekkert annað en að slíta í sundur vinnuvikuna og rugla mann í ríminu...
Í allan dag hefur mér fundist vera föstudagur og síðan veit ég að mér á eftir að líða eins og á mánudegi á föstudaginn. Ég er greinilega mjög vanaföst manneskja og lítið fyrir breytingar eða annað það sem setur venjubundna starfsemi úr skorðum. Ég get heldur ekki lagt mig á daginn og sofnað því þegar ég vakna aftur segir líkamsklukkan mér annað tveggja, að það sé kominn nýr dagur eða þá að ég sé lasin... Út af þessu legg ég mig aldrei á daginn, óþarfi að rugla kerfið að óþörfu ;-)

En mikið held ég að það yrði þakklátt ef að sumardagurinn fyrsti yrði færður yfir á föstudag og þannig næðist samfelldari vinnuvika og lengri helgi og eins mætti breyta fríinu sem tilheyrir uppstigningardegi og færa hann líka yfir á föstudag. Alþingismenn gætu dundað sér við að ræða breytingu í þessa veru einhvern tíma þegar lítið er við að vera í þinginu...

Í dag heimsóttum ég og Ragnhildur, formaður skólanefndar, grunnskólann en tilgangur heimsóknarinnar var að skoða nýtt húsnæði mynd- og handmennta sem innréttað hefur verið í Hverakaupshúsinu við Breiðumörk. Að mínu mati hefur afar vel tekist til með innréttingu húsnæðisins en þarna er í dag aðstaða eins og best verður á kosið. Rýmið er mikið enda húsnæðið bæði stórt og rúmgott. Með tilkomu Hverakaupshússins er ekki lengur kennt á neðri hæð gamla barnaskólans en textílmenntin er ennþá kennd á efri hæð þess húss. Hvað um það verður síðan er enn óráðið en sérfræðingar hafa þá skoðun að húsið sé ekki á vetur setjandi, ástand þess sé með þeim hætti að um endurbyggingu frá grunni yrði að ræða væri reynt að koma því í ásættanlegt horf. Bæjarstjórn verður að taka tillit til þessarar staðreyndar við ákvörðun um framtíð hússins þrátt fyrir að saga þess sé um margt merkileg.

Í vikunni hefur verið fundað um skipulag á Tívolí reitnum, í starfshópi um endurskoðun á samþykktum bæjarins, almenningssamgöngur á milli Árborgarsvæðisins og Reykjavíkur, endurskoðun á samstarfssamningi Hveragerðis og Ölfuss, almenningssamgöngur milli Ölfuss, Árborgar og höfuðborgarsvæðisins, um almannavarnir á svæðinu og um ótal margt fleira.

Í gær var bæjarstjórnarfundur þar sem ársreikningur fyrir árið 2007 var lagður fram til fyrri umræðu. Í stuttu máli þá kemur árið afar vel út en hagnaður ársins var rúmar 103 milljónir króna. Í máli endurskoðanda kom fram að niðurstaða ársins væri sú besta síðan hann kom að endurskoðun bæjarins og hljótum við öll að geta glaðst yfir því og ekki síst því góða samræmi sem var á milli fjárhagsáætlunar og endanlegrar niðurstöðu. Forstöðumenn og aðrir starfsmenn bæjarins eiga heiðurinn af góðri niðurstöðu enda er ekki hægt að reka bæjarfélagið nema um góða samvinnu allra aðila sé að ræða. Meira um reikninginn síðar...



Í næstu viku hefst átakið "Hjólað í vinnuna" í tilefni af því set ég hér inn myndir sem teknar voru um síðustu helgi, en á þeim má sjá þá sem þetta skrifar og
Albert Hólmstein Norðdal Valdimarsson fá far á harla óvenjulegu heimasmíðuðu farartæki sem sést hefur á götum bæjarins undanfarna daga....

28. apríl 2008

Litla Hafrún Kemp Helgadóttir...


...skaust í heiminn rétt eftir miðnætti síðastliðna nótt. Eskifjarðar anga fjölskyldunnar hefur semsagt bæst kvenlegur liðsauki sem ekki veitti af í því mikla karlaveldi sem þar ríkir. Til hamingju öll sömul ...

25. apríl 2008


Ágætu lesendur! Gleðilegt sumar og takk fyrir veturinn...


Sumarið heilsaði með miklum virktum hér í Hveragerði en sumardagurinn fyrsti er einn helsti hátíðisdagur bæjarbúa. Í ár var mikið um að vera vítt og breitt um bæinn enda flykktust gestir til Hveragerðis til að njóta þess sem var í boði. Auðvitað er það opið hús Landbúnaðarháskólans á Reykjum sem er aðal aðdráttaraflið enda skilst mér á starfsmönnum að mörg þúsund manns hafi heimsótt skólann, heyrði 8000 nefnt en sel það ekki dýrara en ég keypti það. Alla vega voru bílar langt niður eftir sundlaugarbrekkunni þegar mest var.
Forseti Íslands, hr. Ólafur Ragnar Grímsson afhenti umhverfisviðurkenningu Hveragerðisbæjar 2008 en í ár var það Heilsustofnun Náttúrulækningafélags Íslands sem fékk viðurkenninguna. Verðskuldað enda stofnunin frá upphafið verið í fararbroddi varðandi lífræna ræktun, lagt ríka áherslu á hollt mataræði gesta sinna og ekki síður á fallegt og vel hirt umhverfi sem hefur orðið okkur hinum hvati til eftirbreytni.

Hátíðahöldin byrjuðu strax fyrir hádegi með fjölskyldufjöri í og við sundlaugina. Eftir hádegi spiluðu Veðurguðirnir með Ingó Idol stjörnu í broddi fylkingar fyrir laugargesti. Krakkarnir fóru síðan vel flestir margar ferðir í aparólunni yfir fossinn, það er tilhlökkunarefni í hvert sinn sem hún er sett upp. Fullorðnir eru nú ekkert að spreyta sig á þeirri svaðilför svo við litum, eftir hátíðardagskrána, við í opnu húsi hjá skátafélaginu en þar var kaffisala og flóamarkaður. Í Eden var haldið uppá 50 ára afmæli staðarins með tilheyrandi skemmtun og þeirri stærstu uppblásnu rennibraut sem ég hef séð! Handverksmarkaður var í Sunnumörkinni, opið á hverasvæðinu og Listasafnið var með leiðsögn um safnið. Við enduðum síðan daginn með því að fara í kvöldmat á Heilsustofnun, gómsætt og hollt...
Bærinn lítur núna afar vel út en eðlilega var skreytt og þrifið fyrir sumardaginn fyrsta. Á Heiðmörkinni förum við alltaf út og tökum til á lóðinni áður en utanbæjarfólkið flykkist til bæjarins. Mér sýnist margir gera slíkt hið sama enda er þetta ágætur hvati til að gera fínt í kringum sig.
Við Hvergerðingar eigum að efla enn frekar hátíðahöld okkar á Sumardaginn fyrsta enda hvar er betra að fagna sumri en í mekka garðyrkjunnar og gróskunnar. Það er hefð hjá fjölmörgum að heimsækja bæinn þennan dag og við eigum að stefna að því að enn fleirum finnist heimsókn hingað marka upphaf sumars.
---------------------------------
Tjaldsvæðið er þegar komið í notkun og um síðustu helgi voru 18 húsbílar á svæðinu, með breyttum búnaði hefur ferðatímabil landsmanna lengst um meira en mánuð í hvora átt og okkur þykir ekki lengur tiltökumál þó sjáist húsbílar á svæðinu í byrjun apríl og jafnvel í október. Tjaldsvæðið er afar vinsælt enda held ég að vandfundin sé betri staðsetning. Eitt best leiksvæði landsins handan við hornið og sundlaugin í fimm mínútna göngufæri.
----------------------------------
Oft rekst maður á ýmislegt skondið á netinu, man ekki einhver eftir þessu sem allar
myndarlegar húsmæður prjónuðu fyrir ótrúlega löngu síðan ?

23. apríl 2008

Enn af Bitru virkjun, örstutt ...

Umhverfissinnar hafa eðlilega miklar áhyggjur af fyrirhugaðri virkjun við Bitru. Við Hvergerðingar deilum þeim áhyggjum og munum ekki trúa því fyrr en á reynir að borað verði í rétt rúmlega 4 kílómetra fjarlægð frá bænum okkar. Áhyggjur okkar Hvergerðinga hljóta að vera öllum skiljanlegar og ekki ætti að vera erfitt fyrir þá sem ráða að setja sig í okkar spor. Ég treysti því að almenn skynsemi og umhyggja fyrir íbúum svæðisins og stórkostlegu útivistarsvæðinu á Ölkelduhálsi og í kringum Bitru verði látin ráða för í þessu máli.

Í þættinum Innlit/útlit í gær var farið í heimsókn til Knúts Bruun og Önnu Sigríðar sem reka hótelið Frost og funa hér í Hveragerði. Þar hafa þau byggt upp af miklum myndarskap hótel sem er einstakt á landinu. Hótelgestir koma víða að, erlendir sem innlendir, flestir gagngert til að njóta íslenskrar náttúru eins og hún gerist best. Ferðaþjónusta af þessu tagi á framtíðina fyrir sér hér en hún byggir að stærstu leyti á því fallega umhverfi sem Hvergerðingar búa við. Með öllum ráðum verður að koma í veg fyrir að það spillist ...

Lára Hanna Einarsdóttir er mikill umhverfisverndarsinni og skrifar um íbúafund okkar Hvergerðinga á heimasíðu sína í gær. Það gerði einnig Dofri Hermannsson sem einnig var á fundinum.

21. apríl 2008

Íbúafundur um virkjanir á Hellisheiði: Bitru og Hverahlíð.

Fundur um virkjanir á Hellisheiði var haldinn hér í Hveragerði í kvöld. Frummælendur voru Ingólfur Hrólfsson, sviðsstjóri nýrra virkjana OR, Eyþór H. Ólafsson, formaður skipulags- og byggingarnefndar Hveragerðisbæjar og Bergur Sigurðsson, framkvæmdastjóri Landverndar. Frummælendur fjölluðu á greinargóðan hátt um efnið en frá ansi mismunandi sjónarhornum eins og gefur að skilja. Ingólfur fór yfir þær úrbætur sem OR hefur gert á áætlunum sínum í kjölfar athugasemda við frummatsskýrsluna. Það er ljóst að athugasemdir okkar Hvergerðinga hafa fengið þar þónokkuð vægi en reynt hefur verið að draga úr umhverfisáhrifum virkjunarinnar með ýmsum hætti. Miðað við nýjustu áform verður búnaður til að hreinsa brennisteinsvetni úr útblæstri virkjunarinnar settur upp og fögnum við því. Eftir stendur þó að útblástur borholanna verður ekki hreinsaður samkvæmt þeim útfærslum sem okkur hafa verið kynntar en það er sérstaklega á framkvæmdatímanum sem slíkt getur valdið mengun en þá munu holurnar sem eru 30-40 talsins þurfa að blása til skiptis. Eftir stendur líka að útivistarmöguleikar á þessu svæði munu rýrna til mikilla muna en borholurnar munu tylla sér á Moldhnúkana sem liggja að Reykjadalnum en hann er eitt vinsælasta útivistarsvæðið hér um slóðir. Björn Pálsson, sagnfræðingur, uppskar lófaklapp þegar hann sagði að svæðið ætti að vernda sem útivistarsvæði fyrir göngufólk. Dofri Hermannson lýsti þeirri skoðun sinni að í framtíðinni yrði svæðið enn meiri auðlind á sviði ferðaþjónustu en nú er. "Það ætti frekar að endurheimta Bitrusvæðið heldur en að virkja. Stórt ósnortið landsvæði gæti þá orðið til í nágrenni höfuðborgarsvæðisins og Hveragerðisbæjar." Fjölmargir tóku til máls og allir á þeirri skoðun að vernda bæri Bitru svæðið. Varla var minnst á Hverahlíðar virkjun sem sýnir betur en margt annað að það svæði er ekki eins verðmætt í hugum fólks.

Staðan varðandi Bitru virkjun er sú að beðið er álits Skipulagsstofnunar um mat á umhverfisáhrifum og er það væntanlegt þann 19. maí n.k. Álitið er einungis ráðgefandi en það er sveitarfélagið Ölfus sem gefur út framkvæmdaleyfi, þeim ber að taka tillit til álits Skipulagsstofnunar en geta vikið sér undan því með rökstuddri ákvörðun bæjarstjórnar. Hveragerðisbær hefur litla sem enga möguleika til að hafa áhrif á þróun mála þrátt fyrir að virkjunin muni hvergi hafa meiri áhrif en hér.

Það er á svona stundum sem ég get séð rökin fyrir landsskipulaginu sem lagt er fram í frumvarpi til nýrra skipulagslaga!

Ásta Þorleifsdóttir, hinn flokkavillti varaformaður stjórnar Orkuveitu Reykjavíkur, kom ekki og sá og sigraði hér í Hveragerði í kvöld. Margir höfðu miklar væntingar til hennar afstöðu og biðu þess í ofvæni að hún stigi fram og tjáði sig um Bitruvirkjun. Enda voru fundarmenn minnugir orða hennar sem birtust í 24 stundum þann 16. febrúar sl. en þá sagði Ásta: "Ég mun ekki styðja neitt sem ógnar Ölkelduhálsi og Klambragili og þessum mjög svo mikilvægu útivistar- og fræðslusvæðum." En fundargestum varð ekki að ósk sinni. Varaformaðurinn var að sjálfsögðu inntur eftir afstöðu til Bitruvirkjunar enda yfirlýsingarnar stórkarlalegar áður en hún tók sæti í stjórn OR. Til að gera langa sögu stutta þá neitaði hún að gefa upp skoðun sína. Áskyldi sér allan rétt til að bíða úrskurðar Skipulagsstofnunar og taka í kjölfarið upplýsta ákvörðun um málið! ! ! Sagðist reyndar elska þetta svæði en hún væri ekki á móti virkjunum. Síðan fannst henni við hæfi að benda okkur Hvergerðingum á að við ættum að taka til í okkar eigin ranni áður en við gagnrýndum virkjunaráformin við Bitru og vísaði þar til klórslyssins í sundlauginni í Laugaskarði. Verð að játa að það fauk í mig við þessi orð enda himinn og haf á milli slyss sem verður vegna bilunar og óútskýranlegra atvika eða ákvörðunar um virkjun sem tekin er af aðilum með bæði augun opin....
Var nema von að fundarmönnum brygði nokkuð við þessi orð varaformanns Orkuveitunnar og einn var snöggur uppá lagið og kallaði; Velkomin til valda, Ásta...

En fundurinn var góður og upplýsandi og styrkti okkur í þeirri trú að við værum á réttri leið og að vinna í samhljómi við vilja bæjarbúa. Skilaboðin voru allavega skýr, fáir gera athugasemdir við virkjanir í Hverahlíð og á svæðinu þar í kring en látum Ölkelduháls og Bitru njóta vafans og föllum frá virkjunaráformum þar.
-----------------------------
Myndirnar með þessari færslu eru teknar hér fyrir ofan Hveragerði en þær ásamt fleirum má sjá á síðunni: www.hengill.nu
Hér má einnig sjá umfjöllun Morgunblaðsins um fundinn.

20. apríl 2008

Leikskólar, áhaldahús, Þorlákshöfn og samgöngurnar ....

Í síðustu viku leit ég í heimsókn á báða leikskóla bæjarins, Óskaland og Undraland.
Á Óskalandi stóð yfir vorsýning barnanna og var ákaflega skemmtilegt að fá að skoða afrakstur vetrarstarfsins sem greinilega hefur verið afar fjölbreytt og ekki síður hugmyndaríkt. Mikill fjöldi foreldra og annarra vandamanna var mættur til að gleðjast með börnunum og biðu börnin spennt eftir sínu fólki til að geta sýnt sín verk. Þetta var afar skemmtileg stund. Daginn eftir leit ég við á leikskólanum Undralandi en þar er búið að fara í stórfelldar endurbætur á innviðum skólans og miklar breytingar átt sér stað, sérstaklega á deildinni Brekku. Nú er mikilvægt að halda áfram og setja peninga á áætlun næsta fjárhagsárs sem gera okkur kleift að halda áfram þessu nauðsynlega viðhaldi. Það er svo mikilvægt að setja einhverja aura á hverju ári í verkefni sem þessi og þá sjáum við breytingarnar gerast. Kannski ekki allar í einu en hægt og sígandi. Við Undraland verður einnig malbikað og gengið frá bílaplaninu í sumar svo þar mun verða mikil breyting á öllu umhverfi.
Á leikskólunum hér í Hveragerði eru börn frá 18 mánaða aldri og alls staðar má sjá hversu vel er hugsað um krílin. Við erum líka einstaklega heppin með starfsfólk sem leggur sig ákaflega vel fram um það að börnunum líði sem best.
--------------------
Fundaði einnig með starfsmönnum áhaldahússins og skoðaði gámasvæðið en þar er nú unnið að breytingum vegna flutnings áhaldahússins, en áhaldahúsið mun flytja í nýtt húsnæði að Austurmörk 20 í ágúst. Þá verður búið að innrétta húsnæði á gámasvæðinu sem aðstöðu fyrir starfsmann sem þar verður. Mikið álag hefur verið á starfsmönnum áhaldahúss í vetur, sérstaklega vegna snjómoksturs sem var óvanalega mikill. Starfsmenn hafa sinnt öllum beiðnum og verkum ákaflega vel og fá mikið hrós frá bæjarbúum, þó að oft séu kvartanirnar háværari enda ómögulegt að gera öllum til hæfis í einu...
-------------------
Síðdegis á föstudaginn skrapp ég niður í Þorlákshöfn til að vera viðstödd undirritun viljayfirlýsingar um uppbyggingu netþjónabús á vegum Greenstone. Ölfusingar munu úthluta fyrirtækinu 50.000 m2 lóð og áætlað er að 25-30 manns muni vinna við fyrirtækið. Öll uppbyggingaráform fyrirtækja í Ölfusi munu koma okkur hér í Hveragerði vel, rétt eins og öðrum nágrannasveitarfélögum. Því er sjálfsagt að við fylgjumst afar vel með því sem þar er að gerast. Það er nokkuð ljóst að Hveragerðisbær á ekki land undir fyrirtæki sem þetta en við getum búið þannig um hnútana að hér vilji þeir búa sem síðan vinna í fyrirtækjum við ströndina. Vegalengdir á milli þéttbýliskjarnanna í Árnessýslu eru með þeim hætti að það er ekkert mál að sækja vinnu á milli staðanna enda gera það margir nú þegar. Bættar allmenningsamgöngur munu síðan gera þennan kost enn fýsilegri en nú er. Það er reyndar gaman að geta þess að í núverandi bæjarstjórn er það einungis sú sem þetta ritar sem vinn í Hveragerði, Eyþór, Ellen og Róbert sækja vinnu til Reykjavíkur og Herdís, Unnur og Guðmundur vinna á Selfossi. Þetta er raunveruleiki sem verður enn auðveldari þegar Suðurlandsvegur hefur verið tvöfaldaður og almenningssamgöngur bættar.
----------------------
Myndirnar sem teknar voru í dag hafa engan tilgang annan en að lífga uppá textann en sýna þó svo ekki er um villst að vorið er á næsta leyti...

18. apríl 2008

Montenegro

Erum að fara aftur til eins fallegasta lands í Evrópu, Svartfjallalands, hér getið þið séð hvers vegna.
Verðum í Herceg Novi þaðan sem þessi mynd er. Bestu strendur sem hægt er að finna sérstaklega ef sandur fer í taugarnar á manni Fólkið er yndislegt og landið ægifagurt. Þess vegna ætlum við aftur á sama stað, sem við gerum annars aldrei...

Heimsóttum ekki Ostrog klaustrið síðast en það er reyndar skylda í Svartfjallalandi, þess vegna förum við aftur en ...

"The orthodox Monastery of Ostrog is the most frequent visited one on the Balkans. It is visited by believers from all parts of the world, either individually or in groups. It represents the meeting place of all three confessions: the Orthodox, the Catholics and the Muslims, because it is believed that the enshrined body of Saint Vasilije Ostroski makes miracles work. According to the stories of pilgrims, by praying by his body, many have been cured and helped in lessening the difficulties in their lives."

17. apríl 2008

Klór, bæjarráð og Sjálfstæðismenn

Enn er unnið að málum sem tengjast klórslysinu sem varð í Laugaskarði fyrir jól. Ræddi við fulltrúa Veiðimálastofnunar um framhald málsins en þeir lögðu til eins og flestum er kunnugt að ekki yrði veitt í ánni í upphafi veiðitímabilsins. Ennfremur leggja þeir til að komið verði fyrir fiskateljara í ánni, helst svo fullkomnum að hann greini milli tegunda fiska. Að loknu viðtalinu var ég um margt fróðari um sjóbirtinga og stofninn hér í ánni sem er víst um margt sérstakur. Virðist hann hafa aðlagast aðstæðum í ánni vel, þolir þess vegna betur hita en aðrir til dæmis. Einnig er hann óvanalega stórvaxinn af einhverjum ástæðum. Það er sjálfsagt skynsamlegt að koma upp teljara í ánni en niðurstöður í sumar geta tæplega gefið góða mynd af ástandinu þar sem engar samanburðartölur eru til. Aftur á móti komumst við að því hvernig fiskigengdinni er háttað sem er auðvitað mikilvægt.
--------------------------------
Bæjarráðsfundur síðdegis í dag. Þrátt fyrir fjölmörg stór mál var fundurinn stuttur en honum lauk á innan við klukkustund. Á fundinum var meðal annars ákveðið að borga aðgang fyrir alla eldri borgara að tækjasal Laugasports, gott mál sem eldri borgurum er hugleikið. Ákveðið var að ráða Elfu Dögg Þórðardóttur, umhverfisfræðing, í tímabundna stöðu aðstoðarmanns skipulags- og byggingafulltrúa. Fyrirkomulag við byggingu aðstöðuhússins við Grýluvöll var ákveðið. Þjónustusamningur við Hjálparsveitina samþykktur, en sveitin hefur aldrei áður haft samning við bæjarfélagið um starfsemi sína. Jákvæð tímamót þar á ferð. Línuhönnun lagði fyrir erindi fyrir hönd Vegagerðarinnar um heimild til að auglýsa frummatsskýrslu vegna tvöföldunar Suðurlandsvegar, var það greiðlega veitt enda á vegstæðið oft eftir að koma til umfjöllunar í ráðum og nefndum bæjarins áður en það verður endanlega samþykkt og því næg tækifæri til að koma sjónarmiðum bæjarins á framfæri. Vegstæðið eins og það var kynnt í dag er ekki fjarri því sem Hvergerðingar vilja helst þannig að lítið ber á milli.
-------------------------------
Þar sem bæjarráðsfundur var svona stuttur þá komst ég í ræktina en í þetta skipti var Rakel Magnúsar með tímann. Héldum að hún ætlaði að gera út af við okkur en það slapp fyrir horn...

Náði síðan á harðahlaupum fundi þingmanna Sjálfstæðisflokksins í Suðurkjördæmi í kvöld. Þar var ég fundarstjóri svo það var nú eins gott að mæta á skikkanlegum tíma, það tókst ;-)
Fundurinn var fjölmennur og afar góður. Þingmennirnir gerðu grein fyrir þeim málum sem efst eru á baugi í kjördæminu og fundarmenn tóku virkan þátt í fundinum. Efst á baugi voru efnahagsmálin, tvöföldun Suðurlandsvegar, málefni Garðyrkjuskólans, Evrópusambands aðild, löggæslan og reyndar margt annað.

Fannst ég nokkuð góð þegar ég setti saman þessa limru undir smellnum lokaorðum Árna Johnsen:

Þau slá hér á létta strengi,
sem hafa´ekki sést hér lengi.
En gott er að sjá
glettið fólk okkur hjá,
og Björk(in) í bland við drengi.

Ég er nefnilega með sjálfa mig í átaki í vísnagerð. Búin að komast að því að limruformið er sennilega auðveldast, svona til að byrja með ! ! !

16. apríl 2008

Gerum sögunni hátt undir höfði...

Í ár eru 80 ár síðan Mjólkurbú Ölfusinga var formlega stofnað af hópi bænda úr Ölfusinu. Mjólkurbúið markaði upphaf byggðar hér í Hveragerði en þegar það var byggt voru engin íbúðarhús hér á svæðinu. Tíu árum síðar lokaði mjólkurbúið en þá voru komin hér allnokkur hús sem flest hver voru byggð útúr landi Mjólkurbúsins. Ég hef alltaf verið stolt af því að Kristinn afi byggði Mjólkurbúið og það nokkuð örugglega eftir teikningum Guðjóns Samúelssonar, þáverandi húsameistara ríkisins. Mörg af fegurstu húsum landsins eru einmitt teiknuð af Guðjóni eins og Héraðsskólinn á Laugarvatni og í Reykholti, aðalbygging Háskóla Íslands, Þjóðleikhúsið, Hallgríms-, Akureyrar- og Kristskirkja og fleiri fallegar byggingar. Um leið og smíði Mjólkurbúsins lauk byggði afi Þinghúsið (Hótel Hveragerði), berklahælið að Reykjum sem nýlega var rifið og Skólasel Menntaskólans í Reykjavík inní Dal. Hann kom semsagt heilmikið að byggingu fyrstu húsanna hér í Hveragerði þó að orkan hafi síðan að mestu farið í byggingar á Selfossi.

En það var Njörður Sigurðsson, sagnfræðingur, sem rifjaði upp þessa sögu í dag þegar ég og Gísli Páll sem er formaður menningarmálanefndar funduðum með honum vegna erindis sem Njörður sendi bænum fyrir nokkru. Hann hefur áhuga á að gera afmæli Mjólkurbúsins skil með því að gera upplýsingaskilti um starfsemina sem þarna markaði upphaf byggðar í Hveragerði og í kjölfarið að halda málstofu um upphaf og þróun byggðar í Hveragerði. Bráðsnjallar hugmyndir sem bæjarráð og nefndin hafa þegar tekið vel í. Skiltið yrði í svipuðum stíl og skiltið við skáldagötuna en það tókst afar vel. Með þessu erum við að gera söguna sýnilegri um leið og við varðveitum upplýsingar um fyrri tíma. Síðan er um að gera að merkja fleiri sögustaði í bæjarfélaginu og halda ótrauð áfram, því þó við setjum ekki nema eitt skilti á ári þá verða þau áður en varir orðin áberandi í bæjarmyndinni og aðdráttarafl ferðamanna sem og íbúa bæjarins. Það er óneitanlega sérstakt að engar merkingar eru til dæmis við hverinn Grýlu, rafstöðina í gilinu, við ullarþvottastöðina við Varmá, við Reykjahjáleigu bæinn (sem reyndar er í Ölfusinu) og áfram mætti telja. Stefnum á að bæta úr þessu ...

15. apríl 2008


Sumir dagar eru undirlagðir fundum...

og þessi var einn af þeim.
Hitti í morgun fulltrúa Skátafélagsins Stróks en við erum að vinna að þjónustusamningi við félagið. Skátastarf er öflugt í Hveragerði enda margir fullorðnir sem núna koma að starfinu. Það er nauðsynlegt því það er tæplega hægt að ætlast til að unglingar haldi utan um jafn stórfellt félagsstarf og þarna fer fram. Ákveðinn hópur Hvergerðinga hefur lengi haldið myndarlega utan um skátastarfið en þar eins og annars staðar er mikilvægt að nýir aðilar komi að því annars er hætta á að fólk brenni út.

Félagar í Golfklúbbnum komu síðan í heimsókn og kynntu hugmyndir sínar um uppbyggingu vallarins í Gufudal. Í klúbbnum eru núna um 180 félagsmenn en völlurinn dregur sífellt fleiri gesti til sín enda þykir hann einstaklega skemmtilegur. Hvar annars staðar finnur maður golfvöll þar sem slá þarf yfir hveri, yfir á og já ekki siður margsinnis á milli sveitarfélaga ! ! !

Nokkrir aðrir fundir yfir daginn, viðskiptalegs eðlis, en síðdegis hittist starfshópurinn sem er að fara yfir samþykktir og skipurit bæjarins. Árangursríkur og góður fundur en við stefnum á að klára þetta verk í sumar.

Rétt náði að líta á "langlegudeildina" að Þelamörk 40, en þar hafa þær mæðgur, Sigurbjörg og mamma, það náðugt. Önnur bíður eftir barni en hin er að jafna sig eftir mjaðmaskipti. Þær halda hvor annarri selskap sem er frábært...

Fór í ræktina og síðan á fund á vegum Foreldrafélags Grunnskólans um tölvunotkun barna og unglinga. Það var Hugó Þórisson, sálfræðingur, sem flutti fyrirlesturinn og fræddi okkur um það hvernig við getum brugðist við ef við teljum að börnin okkar séu of lengi í tölvunni. Hér má sjá efni um þetta mál en það er á hreinu að þeir sem hlýddu á fyrirlesurinn höfðu af því bæði gagn og gaman.

14. apríl 2008

Ný vinnuvika ...

Fundaði í morgun með Ragnheiði Hergeirsdóttur, bæjarstjóra í Árborg og Ástu Stefánsdóttur, bæjarritara þar í bæ, um ákveðna útfærslu á kynningarefni vegna leiðakerfis almenningssamgangna milli Reykjavíkur og sveitarfélaganna hér fyrir austan fjall. Athyglisvert í alla staði en fyrsta skrefið er nú samt að kanna þá möguleika sem fyrir hendi eru varðandi yfirtöku á sérleyfinu á þessari leið og þær fjárhagslegu forsendur sem eru fyrir verkefninu.
-------------------------
Hitti fulltrúa Hjálparsveitar skáta í Hveragerði og gekk frá síðustu endununum í þjónustusamningi við félagið sem væntanlega verður lagður fyrir bæjarráð í vikunni.
Hveragerðisbær hefur lagt ríka áherslu á að gera þjónustusamninga við félögin í bænum og hefur það komið starfsemi þeirra í fastari skorður og aukið tímann sem félagsmenn geta notað í annað en fjárhagslegt hark. Það er stórkostleg að fylgjast með elju þeirra sem starfa í hinum ýmsu félagasamtökum en án þeirra væri mannlífið ekki svipur hjá sjón!

Hitti einmitt síðdegis fleiri ágæta fulltrúa þessa duglega hóps en þá komu hingað til fundar fulltrúar Laugasports og formaður íþróttafélagsins Hamars. Fórum við yfir hin ýmsu mál sem snúa að félaginu en það er gott að hittast reglulega og taka stöðuna. Mikið væri gaman að eiga miklu meiri peninga í sveitarsjóði svo hægt væri að ráðast í verkefnin sem fyrir liggja hraðar en ætlað er.
-------------------------
Meirihlutafundur í kvöld þar sem bæjarráðsfundur næstkomandi fimmtudag var undirbúinn og einnig farið yfir ýmis önnur mál tengd bæjarfélaginu. Verkefnin eru næg: umsókn til Brunamálastofnunar um mjúkhýsið var skilað inn í dag. Arkitektafélag Íslands hefur samþykkt að koma að hugmyndasamkeppni um miðbæjarskipulag og reyndar fögnuðu þau hugmyndinni mjög. Nú bíðum við tilnefningar frá þeim í dómnefnd. Unnið er að lokahönnun aðstöðuhússins við Grýluvöll. Hönnun á útivistarsvæðinu undir Hamrinum er væntanleg í næstu viku ef allt gengur að óskum. Verið er að hanna inngangssvæðið að Listigarðinum. Skilti eru í vinnslu á hverasvæðinu og í inngangshúsinu. Unnið er nætur og daga við að innrétta nýja slökkvistöð, verið er að leggja lokahönd á kynningarbækling um Hveragerði og áfram mætti lengi telja...
En þessa flottu mynd fann ég á netinu hjá snillingi sem heitir Björn Einarsson, veit ekki meiri deili á honum en það en vona að hann fyrirgefi stuldinn! Þarna er sjónarhornið frá Ölfusborgum og yfir í Hveragerði.

13. apríl 2008

Innflytjendur, opið hús og snjór ...

Málþing um málefni innflytjenda var haldið á vegum Velferðarnefndar SASS í Þorlákshöfn á föstudaginn. Mörg afar áhugaverð erindi voru flutt um stöðu innflytjenda á Íslandi og þá ekki síður um það hvernig við sem hér erum fyrir getum sem best tekið á móti nýjum íbúum. Athyglisvert að heyra í erindi Þorvarðar Hjaltasonar um fjölda erlendra ríkisborgara í hinum ýmsu sveitarfélögum á Suðurlandi. Hæst er hlutfallið í Ölfusi en þar eru rúm 16% íbúannn erlendir ríkisborgarar. Hér í Hveragerði er sama hlutfall í kringum 4% þannig að mikill munur er á milli sveitarfélaga hvað þetta hlutfall varðar.
Í máli allra sem töluðu kom fram mikilvægi þess að marka stefnu um móttöku erlendra ríkisborgara, stefnu sem þarf að byggjast á gagnkvæmri virðingu og skilningi á mismunandi aðstöðu og bakgrunni fólks.

Því miður gat ég ekki setið málþingið til enda því ég þurfti að mæta á löngu ákveðinn fund í heilbrigðisráðuneytinu.
------------------------------------
Á laugardagsmorguninn var opið hús Sjálfstæðismanna og þar sem ég var að finna mig til þarna um morguninn rann það upp fyrir mér að ég hef mætt á opin hús á laugardagsmognum meira og minna frá því árið 1996 þegar þau hófust. Einhver hlé hafa verið á þessari starfsemi og auðvitað frí á sumrin og í kringum jól og páska en annars hafa Sjálfstæðismenn hist í morgunmat á laugardögum. Þetta er afar góð leið til að halda hópnum saman og þarna geta bæjarbúar gengið að okkur vísum ef eitthvað er. Skrapp í vinnuna eftir hádegi á laugardag og gekk frá nokkrum málum en fór síðan í bæinn og náði að sjá Albert og félaga leika einn leik í körfunni. Þetta eru ansi efnilegir piltar sem gaman verður að fylgjast með í framtíðinni. Eyddum því sem eftir lifði dags í Reykjavík.
------------------------------------
Sunnudagurinn fór í nauðsynleg húsverk en ekki viðraði sérstaklega til útiveru, allt komið á kaf í snjó þegar fólk vaknaði í morgun. Fengum heimsókn frá Ítalíu síðdegis og því var farið á rúntinn og gestunum sýndur bærinn. Heimsóttum meðal annars Jóa Ísleifs og Siggu í hesthúsið þeirra uppí Dal, það er mun stærra og flottara en ég hafði gert mér grein fyrir og greinlegt að hestasportið heltekur þá sem byrja á því ;-)

Sit hér og horfi með öðru auganu á þátt um bandaríska hermenn sem slasast hafa í stríðinu í Írak. Tilgangsleysi þessa stríðs er svo algert að það er óskiljanlegt að nokkur skuli verja það. Að horfa á eftir barninu sínu í bardaga í fjarlægu landi fyrir málstað sem löngu er gleymdur og heimta það síðan til baka örkumla á sál og líkama hlýtur að vera þyngra en tárum taki. Ég hef lengi undrað mig á því hvers vegna Bandaríkjamenn taka þetta í mál.

10. apríl 2008

Ágætu lesendur !

Undanfarið hefur verið skrifað á www.aldis.is reglulega og er stefnt að áframhaldi á því. Vegna sérvisku þá ætla ég ekki að færa mig yfir á "moggabloggið" eða í önnur vefsamfélög. Því verður síðan mín að teljast til einfara já eða jafnvel til útlaga í bloggheimum....
Mér þætti því vænt um ef að mínir örfáu en þó greinilega dyggu og verðmætu lesendur myndu linka inná síðuna af sínum síðum þar sem það er hægt. Það væri gaman að geta ímyndað sér að skrifin séu lesin af fleirum en bara nánustu ættingjum og vinum eins góðir og þeir nú eru ;-)

Nú hef ég hafið söfnun á heimasíðum Hvergerðinga en það er afar handhægt að geta gengið að þeim vísum á einum stað á netinu. Hér til hliðar er því kominn linkurinn "Heimasíður Hvergerðinga". Afar fáar en þó góðar síður eru komnar þar inn og þeim mun vonandi fjölga ört og tala nú ekki um ef lesendur verða duglegir að senda mér ábendingar um síður. Athugasemda kerfi er á síðunni þannig að hægt er að setja ábendingar um slóðir þar eða senda mér einfaldlega tölvupóst ...

9. apríl 2008

Allt orkar tvímælis þá gert er ...

Átti í morgun tvo fundi með ungum konum, klárar og flottar, með góðar hugmyndir um það hvernig hægt væri að gera Hveragerði að enn betra bæjarfélagi. Ég var sérstaklega ánægð að heyra aðra þeirra tala um það að hún fyndi svo vel fyrir kraftinum og frumkvöðlahugsuninni hér í Hveragerði að íbúarnir væru svo áberandi öflugir og hugmyndaríkir. Þar er ég svo innilega sammála enda er virkilega gaman að sjá hvernig unga fólkið er að flytja hingað aftur drekkhlaðið dýrmætri reynslu og ekki síður með fullt af góðum hugmyndum sem gaman væri að hrinda í framkvæmd.

Átti nokkra aðra fundi í dag, undirbjó bæjarstjórnarfund sem verður á morgun og sinnti ýmsum öðrum málum í dag.
---------------------------
Síðdegis gerði ég úttekt á almenningssamgöngum milli Reykjavíkur og Hveragerðis en ég tók rútuna í bæinn í ómissandi hitting hjá MA vinkonunum. Adda var stödd í Reykjavík og því óþarfi að eyða dýrmætum bensíndropum í bæjarferðina úr því farið austur aftur var öruggt. Það er ótrúlega þægilegt að taka rútuna, ég hringdi nokkur símtöl og vann í samþykktum Hveragerðisbæjar á meðan að rútan kom mér á leiðarenda. Svona verður þetta vonandi á næsta ári ef okkur tekst vel til með samninga um almenningssamgöngur hér á milli, allir í afslöppun í strætó í stað þess að stressast þetta á einkabílnum...
---------------------------
Fyrirsögn færslunnar í dag vísar í það að ég tók eftir því að Vestmannaeyingar hafa opnað heimasíðu og safna þar undirskriftum gegn Bakkafjöruhöfn. Ég ætla ekki hér að hafa skoðun á því hvort Bakkafjara sé góður kostur en ef ég man rétt þá voru það Vestmannaeyingar sjálfir sem hvað harðast börðust fyrir ferjusiglingum á Bakka. Nú eru framkvæmdir þar að hefjast og þá er rokið til og þessi lausn hentar skyndilega ekki stórum hluta Eyjamanna. Verð að játa að ég skil þetta ekki alveg ...

8. apríl 2008

Af góðum mönnum ...

Það var i fyrradag sem ég skrifaði hér á síðuna um mikilvægi þess að njóta augnabliksins því í raun vissi maður aldrei hvað dagurinn eða framtíðin bæri i skauti sér. Ekki vissi ég þá að við yrðum jafn harkalega og fljótt minnt á sannleiksgildi þessara orða en Páll Lýðsson, frændi minn frá Litlu Sandvík, lést í bílslysi á Eyrarbakkavegi í dag. Með honum er genginn einn mesti fræðamaður Suðurlands sem vegna mannkosta sinna valdist einnig í hinar ýmsu trúnaðarstöður fyrir hönd bænda og sveitarfélagsins. Við hittumst stundum á fundum og ræddum þá málefni ættarinnar en oftast minnti hann mig á að koma nú niður í Litlu Sandvík að sækja söðul sem hann
sagðist geyma fyrir mig. Loksins kom ég því í verk og heimsótti þau hjón og sótti söðulinn sem hafði verið í eigu Aldísar ömmu minnar. Um leið bauð Páll mér uppá háaloft sem var stútfullt af bókum, blöðum og skjölum sem biðu þess að fræðamaðurinn hefði tíma til að sinna sínu helsta áhugamáli, grúskinu. Af því verður ekki, genginn er einn af héraðshöfðingjum Suðurlands en minningin lifir um góðan mann.

Í þessari grein má glöggt sjá dæmi um þá eiginleika sem Páll bjó yfir, óbrigðult minni og leiftrandi frásagnargáfa.


------------------------------

En tíminn líður og það er ótrúlegt en satt að í dag eru 18 ár síðan að Bjarni Rúnar kom í heiminn. Til hamingju með afmælið krúslan mín !

7. apríl 2008

Ný vinnuvika...

Vikan byrjaði eins og endranær með því að tölvupóstur helgarinnar var lesinn og bréfum svarað. Drjúgt sem berst af erindum þegar allir eiga svona allavega opinberlega að vera í fríi!!

Fundaði síðan með íbúa sem var með fína viðskiptahugmynd sem rétt er að vinna frekar með. Atvinnuþróunarfélag Suðurlands er rétti aðilinn til að vinna frekari áætlanir og um að gera að nýta þjónustu atvinnuráðgjafanna sem eru boðnir og búnir að aðstoða hugmyndaríka einstaklinga.

Átti fundi með fulltrúum bæði Securitas og Öryggismiðstöðvarinnar í dag þar sem farið var yfir öryggismál og vöktun í bæjarfélaginu. Þörfin fyrir þjónustu af þessu tagi eykst stöðugt og því nauðsynlegt að fara reglulega yfir stöðu mála.

Fundaði á hverasvæðinu eftir hádegi með hópi sem vinnur nú að endurnýjun upplýsingaskiltanna á svæðinu. Hveragerðisbær fékk nýverið einnar milljón króna styrk frá Ferðamálastofu til endurbóta á hverasvæðinu og hyggjumst við nýta þá fjármuni vel og gera hverasvæðið að þeirri ferðamannaparadís sem þá með raun réttu á að vera. Einn hverinn, Manndrápshver, gaus kröftuglega á meðan að við röltum um svæðið og gerði það heimsóknina eftirminnilegri en ella. Mér skilst að þessi hver hafi tekið uppá því að gjósa ca 2-3 yfir daginn í fyrrasumar og heldur hann nú uppteknum hætti.

Sídegis var fundur í undirbúningsnefnd varðandi sumardaginn fyrsta en í ár eru það starfsmenn Garðyrkjuskólans sem halda hátíðina. Hátiðin hefur ávallt markað upphaf sumars í mínum huga enda ómissandi að heimsækja Garðyrkjuskólann á þessum degi. Hveragerðisbær tekur þátt með hefðbundnum hætti en þó verður enn meiri áhersla en áður á uppákomur í sundlauginni og verður gaman að sjá hvernig til tekst.
--Maður á auðvitað að segja garðyrkjudeild Landbúnaðarháskóla Íslands en einhvern veginn er það óþjálla ;-)

Meirihlutafundur í kvöld þar sem farið var yfir málin sem framundan eru en þó sérstaklega dagskrá bæjarstjórnarfundar sem verður á fimmtudaginn. Meirihlutafundirnir eru afskaplega góðir og líflegir enda hópurinn bæði samheldinn og skemmtilegur.

6. apríl 2008

Furðulegt hvernig tíminn hegðar sér...

...maður deplar augunum tvisvar og skyndilega eru liðnir margir dagar ...
Einu sinni sat ég mæðuleg við eldhúsborðið hjá mömmu og kvartaði yfir því hve tíminn liði hratt. Var líka að velta því fyrir mér hvort tíminn myndi ekki líða hægar með aldrinum. Binna, vinkona mömmu sem þá var vel rúmlega áttræð, hlustaði á mig stundarkorn og sagði svo þessa gullnu setningu sem ég gleymi ekki síðan: Nei Aldís mín, tíminn líður sífellt hraðar eftir því sem maður eldist, hann fer ekki að líða hægar fyrr en þú ert komin á hjúkrunarheimilið en þá líður hann líka alltof hægt. Ætli það sé ekki mikið til í þessu.

En það er líka eins gott að nýta tímann sem manni er gefinn vel. Horfði á Sjálfstætt fólk í kvöld en kona kvöldsins var Ólöf Pétursdóttir, lögmaður. Mikið óskaplega er gefandi að sjá hversu mikil reisn getur verið yfir fólki í aðstæðum sem í flestra augum eru óbærilegar. Það er með ólíkindum hvernig Ólöfu og fjölskyldu hennar tókst að njóta þeirra daga sem þeim voru gefnir þrátt fyrir áfallið og erfiðleikana sem fylgdu í kjölfarið. Friðrik Pálsson komst líka vel að orði og minnti okkur á að njóta hvers dags og lifa núna en ekki treysta á gæða stundir einhvern tíma síðar. Það er hræðilegt að það skuli áföll til að minna okkur öll á að það er einungis stundin í núinu sem okkur er örugg. Áföll geta dunið yfir okkur þegar minnst varir og þá er gott að geta yljað sér við það að tíma okkar hafi þrátt fyrir allt verið vel varið og með þeim sem okkur þykir vænst um.
---------------------------
Við Albert fórum á körfuboltamót HSKá Hellu í gær og það voru sælir piltar sem komu heim með silfurpening að því loknu. Virkilega gaman að fylgjast með strákunum enda sýndu þeir góða takta og ekki síður skemmtilega liðsheild og góða hegðun. Slíkt er meira virði en allir verðlaunapeningar. Við foreldrarnir voru afar stolt af strákunum enda full ástæða til.
Ég og sonurinn skemmtum okkur konunglega á leiðinni og ræddum um Kampholtsmóra og Snorra Sturluson í bland við að hlusta á Queen...
---------------------------
Í gærkvöldi var gerð hér innrás ríflega 20 karlmanna sem komu hingað til að hita upp fyrir herrakvöld Hamars sem haldið var í gærkvöldi. Mér skilst að það hafi verið rífandi stemning og mikið fjör enda hvernig á annað geta orðið þegar um 100 karlar hittast og Árni Johnsen heldur uppi fjörinu. Góð hugmynd sem verður án vafa endurtekin miðað við móttökurnar. Ég og minnsti maðurinn flúðum aftur á móti af hólmi og fórum með Svövu á Menem á Selfossi og enduðum svo í bíó og sáum "Stóra planið". Vorum ekkert sérstaklega heilluð af myndinni enda leiðist mér óskaplega orðið þetta grámuskulega yfirbragð sem einkennir svo alltof oft íslenskar myndir. Það er nú einu sinni búið að finna upp litfilmuna, nota hana!
---------------------------
Fermingarveisla í dag hjá Emil Úlfssyni, mér finnast ekki mörg ár liðin síðan ég var í skírninni hans, en svona líður nú tíminn ...

1. apríl 2008

Af fundum og fleiru

Fundur i dag með Alta ráðgjafastofu þar sem þau kynntu starfsemi sína og þá möguleika sem þau geta boðið bæjarfélagi eins og Hveragerði. Alta stýrði á sínum tíma íbúaþingi sem haldið var hér en nú hafa þau tekið upp aðrar vinnuaðferðir og miða samráðsfundi við íbúa meira að einstökum verkefnum, það tel ég góða breytingu.

Fundaði með Pamelu, Elín Björgu og Guðmundi Þór eftir hádegi í dag en við fjögur skipum starfskjaranefnd Hveragerðisbæjar. Farið var yfir ákveðin álitamál og niðurstaða fékkst sem allir voru sáttir við og vonandi sérstaklega þeir starfsmenn sem um var að ræða. Ræddum einnig viðbótarlaunagreiðslur sem einstaka sveitarfélög hafa verið að taka upp og gerðum við Guðmundur grein fyrir afstöðu Hveragerðisbæjar. Bæjarráð samþykkti á fundi sínum í síðustu viku að taka ekki upp viðbótarlaunagreiðslur til starfsmanna grunnskólans. Þar eru flestir kjarasamningar lausir og ekki eðlilegt að taka upp aukagreiðslur á meðan unnið er að samningagerð. Við gerum þá kröfu til launanefndar að samið verði þannig við starfsmenn sveitarfélaga að vinnufriður ríki í stofnunum.
Ég á afskaplega erfitt með að sjá fyrir mér hvernig viðsemjendur ætla að fóta sig í launaumræðunni í kjarasamningagerðinni þegar sveitarfélög hafa verið gera samninga um launauppbætur sem eru bæði misháar og til mislangs tíma. Hver á grunnurinn að verða þegar launaviðræður hefjast? Grunnlaunin eða grunnlaunin plús launauppbótin í Grindavík?
En umræðan á starfskjaranefndarfundinum var góð og málefnaleg og ég var ánægð með þann anda sem ríkti milli aðila á fundinum.

Fór á rúntinn með Jóhönnu, nýjum menningar- og frístundafulltrúa í dag. Við heimsóttum stofnanir sem heyra undir hennar starfsvið og skoðuðum einnig leikvelli og íþróttasvæði bæjarins. Þetta er reyndar einn versti tími ársins útlitslega séð í bæjarfélögum. Endalaust rokið gerir að verkum að allar girðingar eru fullar af rusli, enn er mikill sandur á götum og gangstéttum eftir hálkueyðingu vetrarins, giðingar eru brotnar, Orkuveitan á eftir að laga kantsteina, grasreinar og gangstéttar og áfram mætti endalaust telja.....

En... Tjaldurinn er kominn að sundlauginni í Laugaskarði og þá fer að vora...

... og frúin á Heiðmörkinni skráði sig í líkamsrækt og mætti í fyrsta tímann síðdegis, það er klárlega að koma vor :-)

This page is powered by Blogger. Isn't yours?

  • Um Aldísi ...
  • Ræður og greinar ...
  • Aftur á forsíðu...
  • Tenglar
  • Mjúkhýsi í Hveragerði ?
  • Síða Sjálfstæðisflokksins
  • Sjálfstæðismenn í Hveragerði
  • Sjálfstæðiskonur
  • Sjálfstæðismenn í Suður.
  • Gagnagátt Sambandsins
  • Besti ísinn!
  • Morgunblaðið á netinu
  • Vísir.is
  • DFS - Fréttasíða Dagskrárinnar
  • Fleiri Sunnlenskar fréttir
  • Mælingar á loftgæðum í Hveragerði
  • Hveragerði
  • Heimasíður fyrirtækja í Hveragerði
  • Grunnskólinn í­ Hveragerði
  • Íþróttafélagið Hamar
  • Veðurspá fyrir Hveragerði
  • Fjölbrautaskóli Suðurlands
  • Gagnasöfn Hvar.is
  • Besti bloggarinn ! ! !
  • Vefbanki Valla...
  • SASS
  • Myndir Bjössa á Bláfelli
  • Nátturan.is
  • Orðaþýðingar - frábær síða
  • Færð og veður á SV-landi
  • Leitarvélin
  • Sí­maskráin
  • Ýmsar myndir
  • Myndasíða
  • Úr reisubókinni
  • Flórída janúar 2017
  • Litháen, Armenia og Karabakh 2015
  • Serbí­a og Svartfjallaland 2005
  • Istanbul í­ Tyrklandi 2005
  • Búkarest í Rúmení­u 2006
  • Ítalía 2007
  • Svartfjallaland 2008
  • Danmörk 2010
  • Heimsreisa Laufeyjar og Elvars 2011-2012
  • Hefur þú skoðun?
  • Hafðu samband!
    Eldri færslur
  • 1.1.2004 - 1.2.2004
  • 1.2.2004 - 1.3.2004
  • 1.3.2004 - 1.4.2004
  • 1.5.2004 - 1.6.2004
  • 1.6.2004 - 1.7.2004
  • 1.7.2004 - 1.8.2004
  • 1.8.2004 - 1.9.2004
  • 1.9.2004 - 1.10.2004
  • 1.10.2004 - 1.11.2004
  • 1.11.2004 - 1.12.2004
  • 1.12.2004 - 1.1.2005
  • 1.1.2005 - 1.2.2005
  • 1.3.2005 - 1.4.2005
  • 1.4.2005 - 1.5.2005
  • 1.5.2005 - 1.6.2005
  • 1.6.2005 - 1.7.2005
  • 1.7.2005 - 1.8.2005
  • 1.8.2005 - 1.9.2005
  • 1.9.2005 - 1.10.2005
  • 1.10.2005 - 1.11.2005
  • 1.11.2005 - 1.12.2005
  • 1.12.2005 - 1.1.2006
  • 1.1.2006 - 1.2.2006
  • 1.2.2006 - 1.3.2006
  • 1.3.2006 - 1.4.2006
  • 1.4.2006 - 1.5.2006
  • 1.5.2006 - 1.6.2006
  • 1.6.2006 - 1.7.2006
  • 1.7.2006 - 1.8.2006
  • 1.8.2006 - 1.9.2006
  • 1.9.2006 - 1.10.2006
  • 1.10.2006 - 1.11.2006
  • 1.11.2006 - 1.12.2006
  • 1.12.2006 - 1.1.2007
  • 1.1.2007 - 1.2.2007
  • 1.2.2007 - 1.3.2007
  • 1.3.2007 - 1.4.2007
  • 1.4.2007 - 1.5.2007
  • 1.5.2007 - 1.6.2007
  • 1.6.2007 - 1.7.2007
  • 1.7.2007 - 1.8.2007
  • 1.8.2007 - 1.9.2007
  • 1.9.2007 - 1.10.2007
  • 1.10.2007 - 1.11.2007
  • 1.11.2007 - 1.12.2007
  • 1.12.2007 - 1.1.2008
  • 1.1.2008 - 1.2.2008
  • 1.2.2008 - 1.3.2008
  • 1.3.2008 - 1.4.2008
  • 1.4.2008 - 1.5.2008
  • 1.5.2008 - 1.6.2008
  • 1.6.2008 - 1.7.2008
  • 1.7.2008 - 1.8.2008
  • 1.8.2008 - 1.9.2008
  • 1.9.2008 - 1.10.2008
  • 1.10.2008 - 1.11.2008
  • 1.11.2008 - 1.12.2008
  • 1.12.2008 - 1.1.2009
  • 1.1.2009 - 1.2.2009
  • 1.2.2009 - 1.3.2009
  • 1.3.2009 - 1.4.2009
  • 1.4.2009 - 1.5.2009
  • 1.5.2009 - 1.6.2009
  • 1.6.2009 - 1.7.2009
  • 1.7.2009 - 1.8.2009
  • 1.8.2009 - 1.9.2009
  • 1.9.2009 - 1.10.2009
  • 1.10.2009 - 1.11.2009
  • 1.11.2009 - 1.12.2009
  • 1.12.2009 - 1.1.2010
  • 1.1.2010 - 1.2.2010
  • 1.2.2010 - 1.3.2010
  • 1.3.2010 - 1.4.2010
  • 1.4.2010 - 1.5.2010
  • 1.5.2010 - 1.6.2010
  • 1.6.2010 - 1.7.2010
  • 1.7.2010 - 1.8.2010
  • 1.8.2010 - 1.9.2010
  • 1.9.2010 - 1.10.2010
  • 1.10.2010 - 1.11.2010
  • 1.11.2010 - 1.12.2010
  • 1.12.2010 - 1.1.2011
  • 1.1.2011 - 1.2.2011
  • 1.2.2011 - 1.3.2011
  • 1.3.2011 - 1.4.2011
  • 1.4.2011 - 1.5.2011
  • 1.5.2011 - 1.6.2011
  • 1.6.2011 - 1.7.2011
  • 1.7.2011 - 1.8.2011
  • 1.8.2011 - 1.9.2011
  • 1.9.2011 - 1.10.2011
  • 1.10.2011 - 1.11.2011
  • 1.11.2011 - 1.12.2011
  • 1.12.2011 - 1.1.2012
  • 1.1.2012 - 1.2.2012
  • 1.2.2012 - 1.3.2012
  • 1.3.2012 - 1.4.2012
  • 1.4.2012 - 1.5.2012
  • 1.5.2012 - 1.6.2012
  • 1.6.2012 - 1.7.2012
  • 1.7.2012 - 1.8.2012
  • 1.8.2012 - 1.9.2012
  • 1.9.2012 - 1.10.2012
  • 1.10.2012 - 1.11.2012
  • 1.11.2012 - 1.12.2012
  • 1.12.2012 - 1.1.2013
  • 1.1.2013 - 1.2.2013
  • 1.2.2013 - 1.3.2013
  • 1.3.2013 - 1.4.2013
  • 1.4.2013 - 1.5.2013
  • 1.5.2013 - 1.6.2013
  • 1.6.2013 - 1.7.2013
  • 1.7.2013 - 1.8.2013
  • 1.8.2013 - 1.9.2013
  • 1.9.2013 - 1.10.2013
  • 1.10.2013 - 1.11.2013
  • 1.11.2013 - 1.12.2013
  • 1.12.2013 - 1.1.2014
  • 1.1.2014 - 1.2.2014
  • 1.2.2014 - 1.3.2014
  • 1.3.2014 - 1.4.2014
  • 1.4.2014 - 1.5.2014
  • 1.5.2014 - 1.6.2014
  • 1.8.2014 - 1.9.2014
  • 1.9.2014 - 1.10.2014
  • 1.10.2014 - 1.11.2014
  • 1.11.2014 - 1.12.2014
  • 1.12.2014 - 1.1.2015
  • 1.1.2015 - 1.2.2015
  • 1.2.2015 - 1.3.2015
  • 1.3.2015 - 1.4.2015
  • 1.4.2015 - 1.5.2015
  • 1.6.2015 - 1.7.2015
  • 1.7.2015 - 1.8.2015
  • 1.8.2015 - 1.9.2015
  • 1.9.2015 - 1.10.2015
  • 1.10.2015 - 1.11.2015
  • 1.11.2015 - 1.12.2015
  • 1.12.2015 - 1.1.2016
  • 1.1.2016 - 1.2.2016
  • 1.2.2016 - 1.3.2016
  • 1.3.2016 - 1.4.2016
  • 1.4.2016 - 1.5.2016
  • 1.5.2016 - 1.6.2016
  • 1.6.2016 - 1.7.2016
  • 1.7.2016 - 1.8.2016
  • 1.8.2016 - 1.9.2016
  • 1.9.2016 - 1.10.2016
  • 1.10.2016 - 1.11.2016
  • 1.11.2016 - 1.12.2016
  • 1.12.2016 - 1.1.2017
  • 1.1.2017 - 1.2.2017
  • 1.2.2017 - 1.3.2017
  • 1.3.2017 - 1.4.2017
  • 1.5.2017 - 1.6.2017
  • 1.6.2017 - 1.7.2017
  • 1.8.2017 - 1.9.2017
  • 1.9.2017 - 1.10.2017
  • 1.10.2017 - 1.11.2017
  • 1.11.2017 - 1.12.2017
  • 1.12.2017 - 1.1.2018
  • 1.1.2018 - 1.2.2018
  • 1.2.2018 - 1.3.2018
  • 1.3.2018 - 1.4.2018
  • 1.4.2018 - 1.5.2018
  • 1.5.2018 - 1.6.2018
  • 1.8.2018 - 1.9.2018
  • 1.11.2018 - 1.12.2018
  • 1.4.2021 - 1.5.2021
  • 1.5.2021 - 1.6.2021
  • 1.6.2021 - 1.7.2021
  • 1.7.2021 - 1.8.2021
  • Free Guestbook from Bravenet Free Guestbook from Bravenet