<$BlogRSDUrl$>

30. október 2009

Fundur í stjórn Sambands íslenskra sveitarfélaga eftir hádegi í dag ...

... og meistaraflokkur karla í körfu vann lið Tindastóls í íþróttahúsinu í kvöld. Stórskemmtilegur og spennandi leikur en Hamar var þó alltaf yfir. Þeir eru að standa sig vel strákarnir, ósigraðir á heimavelli!
Stuðningsmanna kaffi á Hoflandsetrinu eftir leik. Skemmtilegur siður sem þjappar hópnum vel saman.

29. október 2009

Fundur Héraðsnefndar Árnesinga var haldinn á Hótel Heklu í Skeiða- og Gnúpverjahreppi í dag. Nefndin heldur utan um rekstur safnanna í sýslunni, Héraðsskjala-, Lista- og Byggðasafnins. Einnig sér nefndin um rekstur Tónlistarskólans þannig að verkefnin eru ærin. Nefndin er samstarfsvettvangur sem er afar mikilvægur fyrir íbúa sýslunnar og sífellt bætast við ný verkefni en nú síðast var nefndinni falin yfirumsjón með nýskipaðri Almannavarnanefnd Árnessýslu. Það er því ekki furða þó að fundir nefndarinar geti teygst í annan endann eins og gerðist í dag.
Nýlega var samþykktum nefndarinnar breytt þannig að hún mun í framtíðinni funda tvisvar á ári en stutt er síðan að ákveðið var að halda einungis einn fund á ári. Það hefur reynst alltof lítið og of langt verður milli funda með þeim hætti.
----------------------
Í gærkvöldi var haldinn hér borgarafundur um sorpmál sem var ágætlega sóttur og líflegur. Í kjölfarið verða öll heimili bæjarins heimsótt af starfsmönnum Íslenska Gámafélagsins og farið verður yfir flokkunina og staðsetningu tunnanna og fleiri atriði. Einnig verður gefin út sorphirðuhandbók sem íbúar eru hvattir til að geyma en þar verður sorphirðudagatal og allar nauðsynlegar upplýsingar um flokkunarkerfið.
Á fundinum í gær voru flestir forvitnir um nýja kerfið og fannst jákvætt að bæjarfélagið væri að stíga þetta skref. En auðvitað heyrðust þar efasemdarraddir líka og einhverjir vildu ekki sjá svona margar tunnur á sinni lóð. Þetta verður skemmtilegt verkefni að glíma við en ekki má gleyma því að óbreytt ástand stendur ekki til boða enda er urðunarstaðurinn að loka með tilheyrandi kostnaðarauka fyrir alla íbúa Suðurlands. Ég hvet alla til að kynna sér þriggja tunnu kerfið á heimsíðunni www.flokkarinn.is.
-----------------------
Hér sit ég með fartölvuna í fanginu og blogga eins og ég geri alltaf seint á kvöldin. Nema hvað að nú hefur mér áskotnast alveg frábær hlutur sem er tölvubretti frá fyrirtækinu NEMA. Með því verður vinnuaðstaðan öll önnur og betri en því hefði ég hreint ekki trúað þegar ég sá þessa græju fyrst. Mæli með að þið sem sitjið með fartölvuna í fanginu kíkið á þessa síðu og lesið umfjöllunina um brettin. Þau má síðan kaupa á heimasíðu Múlalundar sem er framleiðandi brettanna. Ég get allavega mælt með þessu bretti, ótrúlegur munur að vinna á tölvuna eftir að þetta kom í húsið. Síðan er þetta íslensk hönnun og framleiðsla sem er til hreinnar fyrirmyndar á þessum tímum ...

28. október 2009

Í Kastljósi kvöldsins var margt sem vakti áhuga minn. Það er svo sem engin nýbreytni í því enda Kastljósið góður þáttur. En í kvöld var fjallað um "skúffupeninga" ráðherranna í kjölfar hrunsins. Þar grunaði mig strax að Hveragerði kæmi við sögu. Það reyndist rétt en fjármálaráðherra, Árni M. Mathiessen, styrkti Garðyrkju- og blómasýninguna "Blóm í bæ" hér í Hveragerði með 300 þúsund króna framlagi. Mér fannst verra að Helgi Seljan skyldi ekki vita í hvað peningarnir fóru en hann lýsti framlaginu sem "óskýrðu framlagi til Hveragerðisbæjar". Nú er skýringin ljós. Rétt er líka að geta þess að sjávarútvegs- og landbúnaðarráðherra, Einar K. Guðfinnsson, styrkti einnig sýninguna með svipaðri upphæð að því að mig minnir. Garðyrkjan er jú landbúnaður og sýningin gríðarleg auglýsing fyrir þessa atvinnugrein sem ráðamenn þjóðarinnar mæra á hátíðarstundum en gleyma því miður of oft þess á milli. Ég tel að peningum ráðuneytanna hafi verið afar vel varið í þetta skiptið.

Í Kastljósi var einnig flott viðtal við Hjört hennar Möggu "Trölla" sem býr í Þorlákshöfn. Hann er auðvitað Hvergerðingur að hálfu og við eigum smá hluta í honum þess vegna. Skemmtilegur og duglegur íþróttamaður sem sýnir að okkur eru allir vegir færir ef gleði og léttleiki ræður för. Heimsmeistaratitlar í sundi og tuga sekúndna bæting sannar það.

Björn Þorláksson, vinur Valdimars bróður, ræddi síðan við Sigmar um umbreytingu sína í átt til femínisma. Fyrir okkur sem þekkjum Björn var viðtalið stórskemmtilegt og sinnaskiptin mikil. Merkilegt hvað atvinnumissir getur gjörbreytt lífi fólks og í þessu tilfelli greinilega til hins betra.

Í kvöld unnu stelpurnar í körfunni sigur á Haukum í æsispennandi leik. Ég var á sorpfundi og missti því af leiknum en Lalli fór eins og alltaf. Hann var svo reiður yfir dómaranum og gangi leiksins að hann yfirgaf húsið 20 sekúndum áður en leik lauk. Þá voru okkar stelpur tveim stigum undir og allt útlit fyrir tap. Þær unnu aftur á móti með einu stigi og betri helmingurinn er enn að reyna að jafna sig á því að hafa misst af mest spennandi sekúndum leiktímabilsins ;-)

27. október 2009

Fundur sveitarstjórnarmanna í Árnessýslu með þingmönnum kjördæmisins í morgun á Gömlu Borg í Grímsnesi. Það er erfitt fyrir sveitarstjórnarmenn sem sinna pólitík meðfram vinnu að mæta á fundi sem ítrekað eru haldnir á vinnutíma. Því voru ekki margir mættir umfram bæjarstjórana. Það var helst að þeir sem búa nálægt fundarstað fjölmenntu. Vinnuveitendur sveitarstjórnarmanna þurfa að hafa til að bera mikinn skilning á eðli samfélagsþjónustunnar sem starfsmennirnir þeirra eru að skila taki þeir þátt í sveitarstjórnarstörfum. Sem betur fer ríkir sá skilningur víða.

Í umræðum á fundinum í morgun lagði ég höfuðáherslu á miklvægi tvöföldunar Suðurlandsvegar og að ekki yrði hikað þegar kæmi að forgangsröðun framkvæmda. Suðurlandsvegurinn á að vera í skilyrðislausum forgangi um það eru flestir sammála. Nú þarf einungis að bretta upp ermar og hefjast handa við framkvæmd sem er atvinnuskapandi, hagkvæm, eykur umferðaröryggi og ekki síst hagvöxtinn. Aðrir sveitarstjórnarmenn tóku undir þetta sjónarmið og ítrekuð þá skoðun að þetta væri það verkefni sem skilyrðislaust bæri að ráðast í. Annars komu margar góðar hugmyndir fram á fundinum og ýmislegt sem okkur ber að skoða nánar.

Að öðru leyti símtöl, tölvupóstar og viðtöl í dag. Í kvöld vann ég pistil í bækling sem dreifa á í öll hús vegna innleiðingar þriggja tunnu verkefnisins sem tekið verður upp hér í Hveragerði þann 1. desember n.k. Einnig þurfti að undirbúa stutt erindi sem ég flyt annað kvöld á borgarafundi sem halda á í Grunnskólanum kl. 20. Þar munu starfsmenn Íslenska Gámafélagsins kynna 3. tunnu sorpflokkunina og svara spurningum bæjarbúa sem fram kunna að koma. Mikilvægt að sem flestir mæti og kynni sér málið.
---------------------
Við strákarnir erum afar hrifin af þessu myndbandi sem okkur finnst svo yndislega jákvætt. Ákváðum að deila því með ykkur svona í tilefni dagsins...


26. október 2009

Helginni var eytt í sumarhúsi í Svignaskarði í fullkominni, algjörri afslöppun. Dæturnar og kærastar þeirra komu í mat og við kíktum á Árdísi Dögg og Finnboga en annars var ekki farið útúr húsi. Yndislegt ! ! !

Rólegt í vinnunni í dag enda margir sem nýttu tækifærið og lengdu helgina í tilefni af vetrarfríi grunnskólans. Í upphafi dags skipulagði ég vikuna en það eru ýmsir fundir og viðtöl sem þarf að koma fyrir og eins gott að finna þeim stað strax. Dagurinn hentaði vel til bréfaskrifta og því nýtti ég daginn í dag til þeirra. Átti auk þess góð samtöl við Lögmenn bæjarins um ýmis mál sem eru í gangi. Ræddi einnig við lögmenn Sambands íslenskra sveitarfélaga og forstöðumann Skólaskrifstofu Suðurlands varðandi mál sem snúa að Grunnskólanum. Þar tók nýtt stjórnskipulag gildi í haust en nú eru þar starfandi fjórir deildarstjórar sem stýra faglegu starfi skólans ásamt skólastjóra. Mér sýnist þetta fyrirkomulag vera að gefast vel. Stjórnendahópurinn er stærri og ábyrgðin dreifist á fleiri sem er gott að mínu mati. Sem foreldri hef ég tekið eftir því að upplýsingaflæði frá skólanum er betra en nokkru sinni fyrr. Ég fæ stöðugar tilkynningar frá skólanum vegna ýmissa atriða er varða skólastarfið, námið og félagslífið og mér finnst þetta frábært.

Sund síðdegis og líflegur meirihlutafundur klukkan 19. Þegar ég kom heim voru Grundarsystur mættar í kvöldkaffi og mamma kíkti stuttu síðar. Kvöldið endaði því á skemmtilegum nótum í góðum hópi.

22. október 2009

Helgarfrí frá bloggi ....

21. október 2009

Suma daga eru fundir frá morgni til kvölds ...

... og þessi dagur var einn af þeim.
Byrjaði daginn á því að koma við í bakaríinu til að redda veitingum á fyrsta fund dagsins kl. 8:30. Í leiðinni tékkaði ég á því að kringlan sem senda átti til starfsmanna Óskalands í tilefni af verðlaununum sem þau hlutu í gær myndi örugglega skila sér. Auðvitað hefði ég ekki þurft að hafa áhyggjur af því svoleiðis klikkar aldrei í bakaríinu! Hefði viljað heimsækja leikskólann í dag en það verður að bíða betri tíma. Ég segi þau því á Óskalandi er nú starfandi fyrsti karlmaðurinn sem starfar í leikskólum hér í bæ. Ágúst Örlaugur Magnússon, fótboltaþjálfari með meiru, hefur verið ráðinn til Óskalands og lýst okkur öllum afskaplega vel á þá ráðningu. Nauðsynlegt að bæði kynin vinni á uppeldsistofnunum, það gefur starfinu annan blæ.

En forystumenn sveitarfélaga í Árnessýslu mættu hingað snemma morguns til skrafs og ráðagerða. Þessi hópur hefur ákveðið að bera saman bækur sínar reglulega en við teljum að sýslan sé vettvangur þar sem okkur ber að vinna betur saman að hinum ýmsu málum. Þessir fundir eru upphafið að því.

Fyrir hádegi fórum við Guðmundur til fundar við fulltrúa Orkuveitunnar að ræða málefni hitaveitunnar. Fundurinn var hreinskiptinn og góður en ákveðið var að hittast fljótlega aftur og reyna þá að færast nær lausn.

Fór beint af fundinum hjá OR niður á Grand hótel þar sem ráðstefna var haldin um sorp og úrgangsmál. Það er með ólíkindum hvað sá málaflokkur er skyndilega orðinn viðamikill og tímafrekur. Áhugaverðir fyrirlestrar en ég skal fúslega játa að seinni helming ráðstefnunnar nýtti ég ásamt fleirum til viðræðna um þá stöðu sem við stöndum frammi fyrir Sunnlendingar varðandi urðun þegar urðunarstaðurinn að Kirkjuferju lokar 1.desember.

Varð að yfirgefa ráðstefnuna áður en henni lauk þar sem bæjarstjórnarfundur hófst hér fyrir austan kl. 17. Þar var endurskoðuð fjárhagsáætlun fyrir árið 2009 samþykkt. Enn og aftur er það verðlagsþróun sem setur stærsta strikið í reikninginn en fjármagnsgjöld fara um 40 milljónum fram úr áætlun og við því þurfti að bregðast. Handbært fé frá rekstri er aftur á móti jákvætt um sem nemur rúmum 50 milljónum en það ætti auðvitað að vera hærra. Ástandið í efnahagsmálum er aftur á móti með þeim hætti að það er yfirleitt gott að vera með jákvætthandbært fé frá rekstri. Það er ekki staðan alls staðar. Fundurinn fór fram í sátt og samlyndi allra bæjarfulltrúa þó að minnihlutinn hafi setið hjá við afgreiðsluna. Það er eðlilegt núna þegar fer að nálgast kosningar.

Náði nokkrum mínútum heima áður en ég fór á aðalfund Foreldrafélags Grunnskólans sem haldinn var í kvöld. Góður fundur þar sem jákvæðni ríkti í garð skólans og starfsmanna hans. Ég dáist að þeim fjölmörgu einstaklingum sem gefa sig í félagsstarf og sjálfboðavinnu í hinum ýmsu félögum hér í bæ. Félagsstarf er líflegt og ótrúlega mikið um að vera og því er mikilvægt að helst allir íbúar gefi örlítið af tíma sínum í þágu samfélagsins og taki þátt í starfi einhvers af þeim fjölmörgu félögum sem hér starfa.

Þegar ég kom heim biðu mín skilaboð frá "Íslandi í bítið" en þar verð ég í viðtali í fyrramálið vegna hugmynda okkar hér í Hveragerði um uppsetningu eftirlitsmyndavéla við innkeyrslur í bæjarfélagið. Þau áform hafa hlotið verðskuldaða athygli.

20. október 2009

Fyrsti fundurinn var snemma í dag en þá kom Gísli Rúnar Sveinsson frá Vinnueftirlitinu og ræddi vinnuverndarmál og áhættumat hjá stofnunum bæjarins. Nú er vinnuverndarvika og af því tilefni eru starfsmenn stofnunarinnar að heimsækja fjölda sveitarfélaga til að hnykkja á vinnuveitenda hlutverki þeirra. Góð vísa aldrei of oft kveðin.

Skipulagði síðan fundi með ýmsum aðilum sem verða á næstunni. Til dæmis mun verða borgarafundur í næstu viku þar sem 3. tunnu verkefnið verður kynnt. Afar mikilvægt að sem flestir mæti en strax í kjölfarið verður hafist handa við að heimsækja öll heimili í bæjarfélaginu til að kynna íbúum flokkunarverkefnið. Allar upplýsingar má reyndar finna á þessari heimasíðu.

Undirbjuggum einnig fund með fulltrúum Orkuveitu Reykjavíkur en mikilvægt er að finna lausn á því hvernig staðið verður að hitaveituframkvæmdum í Heiðarbrún og nærliggjandi götum. Þar er nú verið að tengja vatn frá Gljúfurárholti inná lagnir sem verða þá ekki tvöfaldaðar eins og gert hefur verið annars staðar í Hveragerði. Þetta fyrirkomulag hefur skapað íbúum mikinn aukakostnað sem útilokað er að sætta sig við. Bæjaryfirvöld hafa verið í miklum viðræðum við fulltrúa OR að undanförnu en enn er ekki lausn í sjónmáli sem hægt er að fella sig við. Næsti fundur okkar er á morgun.

Björg Ágústsdóttir frá Alta kom í heimsókn og kynnti þjónustu fyrirtækisins. Björg var áður sveitarstjóri í Grundarfirði og þekkir því vel til stjórnsýslu sveitarfélaganna og því var kynning hennar áhugaverð og gagnleg.

Eftir hádegi skrapp ég örstutt til Reykjavíkur til að vera viðstödd þegar leikskólanum Óskalandi var veitt viðurkenning Vinnueftirlitsins sem fyrirmyndarfyrirtækis Íslands árið 2009. Mikil viðurkenning fyrir hið góða starf sem þar er unnið. Setti stóra frétt og umfjöllun um viðurkenninguna á heimasíðu bæjarins síðdegis svo endilega kíkið á það. En hér er þessi líka fína mynd af okkur Gunnvöru og Guðlaugu við verðlaunaafhendinguna í dag.

18. október 2009

Við Albert erum búin að vera afskaplega dugleg um helgina og höfum lært íslensku eins og við ættum lífið að leysa. Það er nauðsynlegt enda próf hjá unga manninum á miðvikudaginn. Gáfum okkur samt tíma til að fara í messu eftir hádegi í dag að Kotströnd en þar var afhjúpaður legsteinn vökumanns eldri hluta garðsins. Vökumaður kallast sá sem fyrstur er jarðsettur í kirkjugarði. Í eldri hluta garðsins á Kotströnd var það lítill drengur sem lést einungis 10 mánaða að aldri árið 1909. Því eru nú í ár 100 ár frá því garðurinn var tekinn í notkun. Síðastliðinn föstudag var fyrst jarðsett í nýjum kirkjugarði sunnan við Kotströnd en í sumar hefur verið unnið að standsetningu þessa nýja svæðis. Garðurinn er fallegur og verður afar hlýlegur staður þegar gróður hefur tekið við sér í garðinum. Hér í Hveragerði er hvorki landrými né aðstæður til að hafa kirkjugarð og því hafa sóknirnar í Hveragerði og Kotströnd ávallt sameinast um kirkjugarðinn að Kotströnd. Þar er okkar staður að leiðarlokum.
Eftir messu var kirkjugestum boðið til kaffi samsætis í safnaðarheimili Hveragerðiskirkju. Það var gaman að því að ættingjar vökumannsins unga fjölmenntu og heiðruðu þannig minningu hans.
-----------------------------
Í kvöld spilaði meistaraflokkur Hamars í körfu sinn 200. leik í úrvalsdeildinni gegn liði FSu á Selfossi. Leikurinn var stórskemmtilegur enda ávallt gaman þegar okkar menn vinna eins og reyndin var í kvöld. Liðið er núna skipað ungum strákum sem flestir eru að stíga sín fyrstu skref í úrvalsdeild en einnig eru þarna gamlir refir eins og Marvin og Svavar Páll. Marvin átti frábæran leik og setti niður 51 stig, ótrúleg frammistaða. Bjarni Rúnar spilaði meira en hann átti von á og skoraði 6 stig. Flott hjá honum ! ! Ég verð að segja að það er ólíkt skemmtilegra að fylgjast með liðinu þegar það er skipað strákum sem maður hefur fylgst með gegnum tíðina heldur en þegar liðið er skipað leikmönnum sem enginn þekkir. Leikurinn í kvöld bendir til þess að við Hvergerðingar eigum eftir að eiga góðar stundir í íþróttahúsinu í vetur og því er fyllsta ástæða til að hvetja alla til að koma og styðja við bæði stelpurnar og strákana en stelpurnar eru að gera stórkostlega hluti og eru eitt af betri liðum deildarinnar í vetur.

Annars höldum við að súpan hans Lárusar hafi gert útslagið hjá strákunum í dag en þeir voru allir hér heima fyrir leik að bera saman bækur sínar. Gaman að því...
------------------------------
Fangavaktin er sjónvarpsefni sem enginn hér á heimilinu missir af. Ótrúlega vel lukkaðir en persónurnar í þessum þáttum eru hreint óborganlegar....

16. október 2009

Ársþingi Sass á Höfn lauk í dag föstudag. Hópurinn héðan frá Hveragerði lagði af stað síðdegis á fimmtudag en við fengum að fljóta með Árborgarhópnum, Flóamönnum og fulltrúa Skeiða- og Gnúpverjahrepps í rútu. Grínast var með það á leiðinni að þetta væri ferðamátinn 2009 en 2007 hefðu nú örugglega fleiri flogið! En þingið tókst með ágætum og mikil sátt og eindrægni ríkti enda er þetta síðasta þing kjörtímabilsins, engar kosningar eða valdabarátta í gangi en slíkt hefur sett leiðinlegan svip á mörg undanfarin Sass þing. Fjölmargar ályktanir voru samþykktar á þinginu, aðeins of margar fyrir minn smekk en það eykur líkurnar á að þær hljóti ekki þá athygli sem þær eiga skilið. En þetta er alltaf snúið. Umdæmi Sass er afar viðfeðmt og sjónarmiðin mörg og misjöfn sem verður að taka tillit til. Auðvitað er það augljóst að sveitarfélög eins og Vestmannaeyjar og Hornafjörður eiga önnur áherslumál heldur en við hér í vesturhluta Árnessýslu en þá er það í höndum fulltrúanna að samræma og ná lendingu þannig að allir séu sáttir. Þetta árið tókst það vel.
Aðalfundir stofanana Sass voru með friðsamlegasta móti nema kannski aðalfundur Sorpstöðvar Suðurlands en þar greinir fulltrúum sveitarfélaganna mjög á. Deilt er um aðferðir við sorphirðu og þá möguleika sem gefast varðandi sorpurðun. Miklar umræður urðu á fundinum sem endaði með því að fundinum var frestað og ákveðið að halda framhaldsaðalfund í lok nóvember. Fram að þeim tíma munu framkvæmdastjórar sveitarfélaganna freista þess að ná sátt um helstu ágreiningsefni. Það er auðvitað nokkuð ljóst að Hvergerðingar, Flóamenn og Skeiða og Gnúpverjar hafa valið aðrar leiðir í sorphirðu heldur en stjórn Sorpstöðvar leggur upp með. Leið sem við teljum að sé bæði umhverfisvænni og ódýrari fyrir íbúana þegar upp er staðið.

Ýmsir áhugaverðir fyrirlestrar voru fluttir á þinginu í dag og meðal annars kom Ólöf Ýrr Atladóttir, ferðamálastjóri, á fundinn til að kynna starf Markaðsstofanna og þá möguleika sem ferðaþjónustan getur skapað í héraði. Mjög athyglisvert enda fyrirlesturinn góður. Þess verra er að ekki var unnið með innihald hans í ályktunun þingsins en ekki dettur mér i hug að skamma neinn fyrir það enda hefði ég auðvitað sjálf getað bryddað uppá því hefði ég munað eftir því ......

Lagt af stað frá Höfn í blíðskaparveðri síðdegis og keyrt inní rigninguna. Komum heim undir miðnætti eftir skemmtilegt ferðalag í góðum hópi.

13. október 2009

Stundum dreplangar mig til að skrifa óralöng blogg um hin ýmsu þjóðþrifamál en það gefst því miður lítill tími til svoleiðis spekuleringa í amstri dagsins. Get þó glatt ykkur með því að þessar greinar eru allar vel faldar í hugskotinu þannig að það er aldrei að vita nema að þær rati á "blað"....

Fundir með stjórnendum leikskóla og grunnskóla í morgun þar sem farið var yfir endurskoðaða fjárhagsáætlun. Kláraði fundargerð bæjarráðsfundarins í fyrramálið áður en ég flaug norður á fund í starfshópi um endurskoðun Upplýsingamiðstöðva og markaðsstofanna. Góður fundur og gagnlegur en Ólöf Ýr Atladóttir, ferðamálastjóri, sat fundinn. Hún var á svipuðum tíma og ég í MA ásamt því að vera þremenningur við Lárus þannig að við þekkjumst ágætlega.

Skrapp á skrifstofuna eftir að heim var komið til að lagfæra fundargerðina þannig að nú er ég á leið heim rétt fyrir klukkan 22 til að kanna hvort ekki sé til kvöldmatur ;-)

12. október 2009

Þónokkur vinna var fólgin í frágangi fundarboðs bæjarráðs í dag en fundurinn er á miðvikudag. Kláruðum minnisblöð vegna opnunartíma sundlaugar og öryggismála ásamt því að ganga frá endurskoðaðri fjárhagsáætlun. Hittum endurskoðendur bæjarins vegna ákveðinna mála sem verið er að skoða. Knútur Bruun kom í heimsókn og fórum við yfir málefni tengd Listasafni Árnesinga en nú nálgast haustfundur Héraðsnefndar en þá er ávallt farið yfir stöðu safnanna í Árnessýslu. Það er ljóst að ekki verður um aukaframlög til þeirra að ræða þetta árið og því er starfsemi þeirra þröngur stakkur skorinn enda hefur allur kostnaður hækkað verulega.

Í kvöld hitti meirihlutinn þingmenn Sjálfstæðisflokksins í Suðurkjördæmi til að kynna þeim sjónarmið Hvergerðinga varðandi Bitru virkjun. Áttum við langt og gott spjall sem ég vona að hafi skilað skilningi á þeim málstað sem við höfum haldið á lofti.

11. október 2009

... og Albert Ingi og félagar unnu báða leiki sína í dag og þar með mótið um helgina. Unnu sér þar með inn sæti í næsta riðli fyrir ofan. Frábær árangur krakkar!

Í kvöld fórum við Lárus ásamt Svövu að sjá leikritið "Allra meina bót" í flutningi Leikfélags Hveragerðis. Troðfullur salur áhorfenda skemmti sér hið besta enda fóru leikararnir á kostum hvort sem var í söng eða leik. Mæli eindregið með að fólk bregði sér í Völund og eigi þar góða kvöldstund.

10. október 2009

Opið hús Sjálfstæðismanna í morgun. Gott spjall og skemmtilegt. Sérlega gaman að því að Árni Mathiessen skyldi líta við. Hann vinnur núna sem dýralæknir á Stuðlum og hefur gaman af. Heimsóknin varð styttri en hún hefði getað orðið því dýralæknirinn var kallaður út vegna bráðadoða og þá þýðir nú lítið að sitja yfir kaffibolla og pólitískum vangaveltum.

Ég stoppaði líka í styttra lagi því Albert og félagar áttu að vera mættir uppúr hálf eitt til Reykjavíkur að taka þátt í Íslandsmótinu í körfubolta. Það er skemmst frá því að segja að þau stóðu sig frábærlega þau, Albert, Skafti, Katrín, Sigurður Páll, Brandur, Vilhjálmur, Ágúst Logi, Magnús Baldvin, Stefán og Dagný Lísa. Liðið vann báða leiki sína með yfirburðum og stóð sig fantavel. Kæmi mér ekki á óvart að þau ynnu mótið en tveir leikir fara fram á morgun, við Val og ÍR. Á heimleiðinni lofaði ég Skafta að minnast á hann á blogginu og hér með hef ég gert það og líka á alla hina í liðinu ;-)
Þið eruð bara snillingar, krakkar....

9. október 2009

Dagurinn byrjaði á foreldrakaffi í Grunnskólanum. Skemmtileg nýbreytni þar sem foreldrum gafst kostur á að hittast og hitta kennara barnanna. Mér fyndist sniðugt að hafa svona morgunkaffi í bekkjunum alla vega einu sinni á önn, bæði til að hópurinn geti hitt kennarann og eins og ekki síður til að foreldrarnir hittist og ræði þau mál sem á þeim brenna.

Klukkan níu hófst stjórnarfundur í Eignarhaldsfélagi Hveragerðis og Ölfuss og strax að honum loknum aðalfundur sama félags. Félagið heldur utan um eignarhlut sveitarfélaganna í Sunnlenskri orku en þar voru stjórnarfundur og aðalfundur haldnir í dag milli 10 og 12. Sunnlensk orka var stofnuð af Rarik og sveitarfélögunum tveimur fyrir um 13 árum og hafði það sem markmið að nýta jarðhitann í Ölfusdal og Grænsdal. Margt hefur breyst bæði hvað varðar þekkingu okkar á umhverfismálum og jarðhita frá því að félagið var stofnað og ljóst að Hvergerðingar ganga ekki lengur í takt við það sem áður var rætt um. Fundargerðir félaganna verða venju samkvæmt lagðar fyrir næsta fund bæjarstjórnar og væntanlega mun þar verða umræða um framtíðar stefnu bæjarins í málefnum félaganna.

Eftir hádegi hafði ég boðið hingað til Hveragerðis nokkrum leiðtogum sveitarfélaga í Árnessýslu til skrafs og ráðagerða. Héraðsnefndar fundur er á næsta leyti auk SASS fundar og því þótti mér nauðsynlegt að heyra hljóðið í þessum aðilum varðandi ýmis mál sem ofarlega eru í umræðunni. Þetta var hinn ágætasti fundur, óformlegur og góður þar sem menn gátu velt fyrir sér hinum ýmsu málum. Ákveðið var að hittast aftur innan skamms og taka upp þráðinn þar sem frá var horfið í dag.

Aðalfundur Steingerðis var haldinn síðdegis í dag en það er félag sem á og rekur fasteignir sem meðal annars eru nýttar undir starfsemi Kjörís og fleiri fyrirtækja.
Reikningar félagsins bera þess merki að árið 2008 var róstusamt og slæmt fyrir rekstur allra fyrirtækja í landinu. Þar er Steingerði ekki undanskilið þó að staðan sé kannski ekki jafnslæm og hjá mörgum öðrum.

Símafundur í stjórn kjördæmisráðs klukkan 18 þar sem rætt var um staðsetningu aðalfundar kjördæmisráðs. Ákveðið var að fundurinn skyldi haldinn í Vestmannaeyjum þrátt fyrir þær áhyggjur sem nokkrir hafa lýst yfir vegna þeirrar staðsetningar. Er það sérstaklega kostnaður og ferðalagið sem óhjákvæmilega fylgir sem vex fólki í augum. Ætli veðrið í dag og í gær hafi ekki haft sitt að segja í umræðunni, því óneitanlega hrís manni hugur við þeirri tilhugsun að fara með Herjólfi í viðlíka veðri og verið hefur í dag ! ! ! En annars er einmitt afar mikilvægt að vel verði mætt á fundinn þar sem fjölmargir hætta nú í stjórn og stefnir í spennandi kosningu. Ég hef verið varaformaður stjórnar kjördæmisráðs í nokkurn tíma en mun ekki gefa kost á mér áfram hvorki í það embætti né formanns embættis sem Sigurður Valur gegnir nú. Hann hefur einnig ákveðið að hætta semog Ágúst Ingi gjaldkeri, Reynir Ragnars og fleiri. Nú þurfa semsagt nýjir að taka við....

Brugðum okkur síðan í Selvíkina í kvöld til Hrefnu og Petu sem þar dvelja í frábærum bústað Landsbankans. Held ég hafi aldrei komið í jafn flottan sumarbústað á ævinni ;-) Takk fyrir frábæran mat og skemmtilegt kvöld!

8. október 2009

Talandi um snjóinn hér í kringum okkur þá rakst ég á þessa flottu mynd sem tekin var á mánudaginn á síðu Einars Sveinbjörnssonar, veðurfræðings. Þarna sést vel hvernig snjóalögin geta legið. Veðrið í dag var nú svo sem ekki til að gleðja mann en þó sjálfsagt skárra en á mörgum stöðum.

Bæjarstjórnarfundur síðdegis var umhverfisvænn með afbrigðum. Fyrst komu fulltrúar frá fyrirtækinu 2012-Nýtt upphaf með kynningu á rafbílavæðingu íslenska bílaflotans. Fróðlegt og metnaðarfullt verkefni þar sem markið er sett hátt. Hveragerðisbær mun taka þátt í þessari uppbyggingu með því að vera fyrirtækinu innan handar varðandi staðsetningu rafhleðslustöðva þegar þar að kemur.

Jón Þórir Frantzson, forstjóri Íslenska gámafélagsins, flutti síðan kynningu á þriggja tunnu flokkunarverkefninu sem bæjarstjórn samþykkti að innleitt verði hér í Hveragerði frá og með 1. desember. Nú hefst öflug kynning meðal bæjarbúa, borgarafundur, bæklingur og heimsóknir á öll heimili þar sem verkefnið verður kynnt. Ögrandi verkefni sem þarfnast þess að unnið verði hratt og vel næstu vikurnar. Ég vonast til þess að bæjarbúar taki þessari breytingu með opnum huga enda er hér um stórt skref í umhverfismálum að ræða fyrir utan það að vera algjörlega nauðsynlegur liður í því að halda kostnaði við sorphirðu og urðun eins lágum og kostur er.

Á fundinum í dag samþykkti bæjarstjórn einróma að slíta samstarfssamningi við fyrirtækið Eykt um uppbyggingu á Sólborgarlandinu austan Varmár. Bærinn greiðir fyrirtækinu 62,5 milljónir og fær í staðinn alla skipulagsvinnu, rannsóknir og réttindi sem landinu fylgir en deiliskipulag fyrir 2.200 manna byggð hefur þegar verið samþykkt á svæðinu. Kaupverðið þykir sjálfsagt einhverjum hátt en þá er rétt að hafa í huga að fyrir sama verð væri hægt að kaupa vænt raðhús í Reykjavík! Það eru að okkar mati gríðarlegir hagsmunir fólgnir í eignarhaldi á þessu landi fyrir Hvergerðinga til framtíðar litið. Framhjá þeim er ekki forsvaranlegt að horfa og því var þessi ákvörðun tekin.

7. október 2009

Fór á fund í iðnaðarráðuneytinu í dag ásamt Sigurði Halldórssyni, eiganda Fengs, til að ræða við Katrínu ráðherra um þá möguleika sem felast í gufuveitunni sem starfrækt er hér í Hveragerði. Einnig vildum við benda á nauðsyn þess að ráðuneytið styðji við bakið á litlum og meðalstórum fyrirtækjum sem hyggjast nýta jarðvarma og þá sérstaklega gufuna til iðnaðarframleiðslu. Fjöldi fyrirtækja hér í Hveragerði nýtir í dag gufuna til framleiðslu og nægir þar að nefna Kjörís, Hótel Örk, Kjöt og Kúnst, garðyrkjustöðvarnar, þvottahúsið á Ási, Úrvals eldhús, sundlaugina í Laugaskarði og bakaríið. Gufuveitan er mikilvæg sérstaða Hveragerðisbæjar en með henni gefst fyrirtækjum kostur á ódýrri og góðri orku en gufuveita er hvergi rekin nema hér í bæ.
Ráðherra tók okkur afar vel og áttum við góðan og gagnlegan fund. Náðum líka að fjalla um stefnumörkun bæjarstjórnar varðandi uppbyggingu bæjarins og þá sérstaklega þær hugmyndir sem settar voru fram í miðbæjarsamkeppninni um enn frekari uppbyggingu heilsutengdrar ferðaþjónustu.
-----------------------
Fór beint frá ráðherra á fund Almannavarnanefndar Árnessýslu sem haldinn var í höfuðstöðvum Almannavarnardeildar ríkislögreglustjóra við Skógarhlíð. Víðir, Guðrún og Íris sem eru starfsmenn deildarinnar fóru yfir starfsemina og það starf sem nefndin okkar þarf nú að vinna varðandi áhættumat á svæðinu.
----------------------
Um leið og ég kom austur átti ég tvo fundi með íbúum sem erindi áttu við bæjarstjórann. Það koma margir til fundar á skrifstofuna og þykir mér afar notalegt að finna að bæjarbúar hika ekki við að koma til að ræða það sem á þeim brennur.

6. október 2009

Þessa mynd tók Jóhanna Hjartardóttir, menningar og frístundafulltrúinn okkar hér í Hveragerði áður en hún lagði af stað í vinnuna í morgun. Til að skýra málið er rétt að geta þess að Jóhanna býr í Þorlákshöfn og þar snjóaði þessi ósköp í morgun á meðan að hér snjóaði þunnu lagi ! ! !

Annars bar það helst til tíðinda að við sendum út fundarboð fyrir bæjarstjórnarfundinn á fimmtudag. Hittum fyrsta forstöðumanninn vegna endurskoðunar fjárhagsáætlunar en aðrir munu mæta til okkar frameftir þessari viku og þeirri næstu. Hitti Sigurð Halldórsson hjá Feng sem nú er að flytja inní Entek húsið þar sem starfrækt verður verksmiðja sem framleiða á undirburð undir gæludýr. Síðdegis setti ég saman stutta ræðu fyrir aðalfund Sjálfstæðismanna sem haldinn var í kvöld. Þar bar það helst til tíðinda að Gísli Páll Pálsson hætti sem formaður en við tekur Eyjólfur Kolbeins. Gísli hefur verið formaður í þrjú ár en hættir nú vegna anna á öðrum vettvangi. Hann hefur þó lofað að vera kosningastjórinn okkar í vor en þar er hann öllum öðrum fremri. Eyjólfur er hörkufínn í embættið og óska ég honum og nýkjörinni stjórn góðs gengis í starfinu sem framundan er.

5. október 2009

Mánudagurinn var erilsamur enda alltaf nóg að gera eftir fjarvistir frá skrifstofunni.
Þónokkur tími fór í Bitru enda rann í dag út fresturinn til að gera athugasemdir við þær framkvæmdir sem þar eru fyrirhugaðar. 1061 athugasemd var í fórum Björns Pálssonar þegar hann fór niður í Þorlákshöfn og afhenti Ólafi Áka með formlegum hætti. Hér má lesa ræðuna sem Björn flutti við þetta tilefni.

Ingibjörg Björnsdóttir og Björn skiluðu afar vönduðum andmælum en þau má lesa hér.

Við Hvergerðingar þökkum Birni elju hans og dugnaði í þessu máli en hann hefur frá fyrstu tíð verið ötull talsmaður umhverfisverndar á svæðinu hér ofan Hveragerðis. Fyrst í stað talaði hann fyrir daufum eyrum, ég játa það fúsleg. En síðar þegar þekking manna á því sem þarna var að gerast jókst og öllum mátti vera ljóst í hverslags umhverfisslys stefndi eignaðist hann einarða stuðningsmenn víða. Stuðningsmenn sem núna þakka honum dugnaðinn um leið og við vonum að endanleg ákvörðun í þessu máli beri vitni um skynsemi og umhyggju fyrir framtíðinni og fólkinu í landinu.

Annar aðili sem er ómetanlegt að þjóðin skuli eiga að er Lára Hanna Einarsdóttir. Hún birtir nú á heimasíðu sinni færslu sem ég hvet ykkur til að lesa en þar er einnig að finna kort sem sýnir glögglega þær vegalengdir sem hér um ræðir.

Hvað finnst ykkur ágætu lesendur?


--------------------------------------

Fundur um skipulagsmál þar sem við fjölluðum um framtíðar möguleika Hveragerðis á víðum grunni. Það er engin spurning að hér eru mýmörg tækifæri til að gera góða hluti, hluti sem skapað geta bænum enn meiri sérstöðu en hann nú hefur svo þetta er eitthvað sem gaman væri að vinna betur með. Hitti Ólaf Hilmarsson sem er yfir Markaðstofu Suðurlands. Hann er með aðsetur hér í Hveragerði þrátt fyrir að starfsvæði hans sé allt Suðurland. Markaðstofan hyggur á mikla landvinninga, nýbúið er að gefa út bækling um ferðaþjónustu á svæðinu en nú er komið að því að sveitarfélögihn ákveði aðkomu sína að stofunni. Þetta er mikilvæg starfsemi sem best má sjá af reynslu annarra landsfjórðuna af svipaðri stofu.
Milli funda fórum við Helga yfir rekstur bæjarins en á næsta fundi bæjarráðs verða gögnin lögð fyrir og síðan í beinu framhaldi fyrir bæjarstjórn.
Sund síðdegis er klárlega ómissandi og góð upphitun fyrir meirihlutafundinn sem hófst kl. 19. Þar var farið yfir fundarboð bæjarstjórnar og ýmis önnur mál sem brenna á bæjarfulltrúum. Núna má síðan ekki missa af fyrsta þættinum af Klovn .....

4. október 2009

Nú verður að byrja á því að biðjast afstökunar á bloggleysi undanfarinna daga. Það er auðvitað ekki vegna skorts á viðburðarríkum athöfnum og erindagjörðum sem slíkt gerist heldur frekar að tímann vantar þegar mikið er um að vera.

En fjármálaráðstefna sveitarfélaganna var haldin í Reykjavík fimmtudag og föstudag. Þar voru flutt mörg fróðleg og gagnleg erindi eins og venjan er á þessari árlegu ráðstefnu. Í ljósi aðstæðna söknuðu margir þess helst að fá ekki skýrari skilaboð frá ráðamönnum þjóðarinnar en bæði Jóhanna og Steingrímur fluttu ræður á fundinum. Þó verð ég að segja að þó ég sé nú ekki alltaf sammála Steingrími þá verður nú ekki af honum skafið að hann er skörungur í ræðustól og það finnst mér ávallt vera stór kostur hjá stjórnmálamönnum. Erindi ráðstefnunnar má lesa hér

Á laugardeginum var brunað í Blómaval, einhverjir tugir haustlauka keyptir og restin af deginum fór í garðvinnu í blíðskapar veðri. Reyndar skrambi kalt verð ég að segja. Bláberjarunnarnir góðu sem voru keyptir í vor mynduðu þessi fínu ber sem náðu þó ekki að blána eins og þau áttu að gera. Því voru grænjaxlarnir borðaðir með bestu lyst um helgina. Spurning hvort takist betur til næsta sumar ?

Um kvöldið var síðan horft á Útsvarið þar sem Hvergerðinar töpuðu fyrir Fjarðabyggð. Engin skömm að því svo sem enda spurningarnar með eindæmum erfiðar. Hópurinn sem sat heima þekkti jú hrafnaklukkuna, hefði kannski getað grísað á Látrabjargið og íslenskufræðingurinn fór næstum því yfirum þegar liðið vissi ekki fjölda eiginmanna Guðrúnar Ósvífursdóttur eins og það eigi nú að vera almenn kunnátta ;-) En það er alltaf gaman að þessu og til þess er leikurinn gerður.

Deginum í dag var eytt í Laugardalshöll þar sem Albert og félagar sáu um sjoppuna á bikarúrslitaleikjunum. Við mættum þarna nokkrir foreldrar og afgreiddum pizzur, kók og nammi með krökkunum og skemmtum okkur hið besta. Hefðum skemmt okkur betur ef Hamars stelpurnar hefðu hampað bikarnum en þær stóðu sig nú samt ferlega vel. Sýndu mikinn karakter með því að komast yfir í þriðja leikhluta og standa í KR út leikinn. Til hamingju með árangurinn stelpur. Í kvöld fórum við Lalli í leikhús með strákana að sjá Harry og Heimi. Mikið fjör og mikið hlegið ...
---------------------

1. október 2009

Aukafundur bæjarstjórnar vegna Bitru kl. 8 í morgun. Fullkominn einhugur um andstöðu okkar við virkjana áformin sem aldrei geta orðið ásættanleg miðað við þær forsendur sem lagt er upp með. Bæjarráð strax á eftir þar sem helst bar til tíðinda að ákveðið var að taka upp 3. tunnu sorpflokkun strax þann 1. desember. Fá úrræði önnur eru í stöðunni þar sem urðunarstaðurinn í Kirkjuferju mun loka þann sama dag. Bæjarráð samþykkti líka að vísa til bæjarstjórnar endanlegum samningum um kaup bæjarins á skipulagsvinnu, rannsóknum og landi á Sólborgarsvæðinu svokallaða. Bæjarstjórn hefur metið málið þannig að hagsmunir bæjarbúa af því að leysa landið til sín séu miklu meiri en þær 62 milljónir sem greiða þarf fyrir. Í raun er eingöngu verið að leysa til sín þau verðmæti sem þarna hafa orðið til og með því eignast bærinn alla 80 hektarana sem þegar hafa verið skipulagðir sem byggingasvæði.
Strax eftir bæjarráðsfundinn funduðu fulltrúarnir með forsvarsmönnum fyrirtækis á sviði heilsutengdrar ferðaþjónustu sem mikið hefur verið í fréttum undanfarið. Það væri óeðlilegt ef ekki væri horft til Hveragerðisbæjar vegna þessarar uppbyggingar í ljósi þeirrar þekkingar sem hér hefur skapast á þessu sviði. Umhverfi bæjarins gefur okkur einnig visst forskot þegar kemur að því að laða hingað erlenda gesti.
Eftir hádegi fengum við góða heimsókn þegar stjórn Lánasjóðs íslenskra sveitarfélaga kom í heimsókn til að kynna sér bæjarfélagið. Lífleg og skemmtileg heimsókn enda þekki ég persónulega flesta þá sem í stjórninni sitja. Dágóður tími fór í það síðdegis að svara tölvupóstum og símtölum enda lítið verið setið framan við tölvu undanfarið.

This page is powered by Blogger. Isn't yours?

  • Um Aldísi ...
  • Ræður og greinar ...
  • Aftur á forsíðu...
  • Tenglar
  • Mjúkhýsi í Hveragerði ?
  • Síða Sjálfstæðisflokksins
  • Sjálfstæðismenn í Hveragerði
  • Sjálfstæðiskonur
  • Sjálfstæðismenn í Suður.
  • Gagnagátt Sambandsins
  • Besti ísinn!
  • Morgunblaðið á netinu
  • Vísir.is
  • DFS - Fréttasíða Dagskrárinnar
  • Fleiri Sunnlenskar fréttir
  • Mælingar á loftgæðum í Hveragerði
  • Hveragerði
  • Heimasíður fyrirtækja í Hveragerði
  • Grunnskólinn í­ Hveragerði
  • Íþróttafélagið Hamar
  • Veðurspá fyrir Hveragerði
  • Fjölbrautaskóli Suðurlands
  • Gagnasöfn Hvar.is
  • Besti bloggarinn ! ! !
  • Vefbanki Valla...
  • SASS
  • Myndir Bjössa á Bláfelli
  • Nátturan.is
  • Orðaþýðingar - frábær síða
  • Færð og veður á SV-landi
  • Leitarvélin
  • Sí­maskráin
  • Ýmsar myndir
  • Myndasíða
  • Úr reisubókinni
  • Flórída janúar 2017
  • Litháen, Armenia og Karabakh 2015
  • Serbí­a og Svartfjallaland 2005
  • Istanbul í­ Tyrklandi 2005
  • Búkarest í Rúmení­u 2006
  • Ítalía 2007
  • Svartfjallaland 2008
  • Danmörk 2010
  • Heimsreisa Laufeyjar og Elvars 2011-2012
  • Hefur þú skoðun?
  • Hafðu samband!
    Eldri færslur
  • 1.1.2004 - 1.2.2004
  • 1.2.2004 - 1.3.2004
  • 1.3.2004 - 1.4.2004
  • 1.5.2004 - 1.6.2004
  • 1.6.2004 - 1.7.2004
  • 1.7.2004 - 1.8.2004
  • 1.8.2004 - 1.9.2004
  • 1.9.2004 - 1.10.2004
  • 1.10.2004 - 1.11.2004
  • 1.11.2004 - 1.12.2004
  • 1.12.2004 - 1.1.2005
  • 1.1.2005 - 1.2.2005
  • 1.3.2005 - 1.4.2005
  • 1.4.2005 - 1.5.2005
  • 1.5.2005 - 1.6.2005
  • 1.6.2005 - 1.7.2005
  • 1.7.2005 - 1.8.2005
  • 1.8.2005 - 1.9.2005
  • 1.9.2005 - 1.10.2005
  • 1.10.2005 - 1.11.2005
  • 1.11.2005 - 1.12.2005
  • 1.12.2005 - 1.1.2006
  • 1.1.2006 - 1.2.2006
  • 1.2.2006 - 1.3.2006
  • 1.3.2006 - 1.4.2006
  • 1.4.2006 - 1.5.2006
  • 1.5.2006 - 1.6.2006
  • 1.6.2006 - 1.7.2006
  • 1.7.2006 - 1.8.2006
  • 1.8.2006 - 1.9.2006
  • 1.9.2006 - 1.10.2006
  • 1.10.2006 - 1.11.2006
  • 1.11.2006 - 1.12.2006
  • 1.12.2006 - 1.1.2007
  • 1.1.2007 - 1.2.2007
  • 1.2.2007 - 1.3.2007
  • 1.3.2007 - 1.4.2007
  • 1.4.2007 - 1.5.2007
  • 1.5.2007 - 1.6.2007
  • 1.6.2007 - 1.7.2007
  • 1.7.2007 - 1.8.2007
  • 1.8.2007 - 1.9.2007
  • 1.9.2007 - 1.10.2007
  • 1.10.2007 - 1.11.2007
  • 1.11.2007 - 1.12.2007
  • 1.12.2007 - 1.1.2008
  • 1.1.2008 - 1.2.2008
  • 1.2.2008 - 1.3.2008
  • 1.3.2008 - 1.4.2008
  • 1.4.2008 - 1.5.2008
  • 1.5.2008 - 1.6.2008
  • 1.6.2008 - 1.7.2008
  • 1.7.2008 - 1.8.2008
  • 1.8.2008 - 1.9.2008
  • 1.9.2008 - 1.10.2008
  • 1.10.2008 - 1.11.2008
  • 1.11.2008 - 1.12.2008
  • 1.12.2008 - 1.1.2009
  • 1.1.2009 - 1.2.2009
  • 1.2.2009 - 1.3.2009
  • 1.3.2009 - 1.4.2009
  • 1.4.2009 - 1.5.2009
  • 1.5.2009 - 1.6.2009
  • 1.6.2009 - 1.7.2009
  • 1.7.2009 - 1.8.2009
  • 1.8.2009 - 1.9.2009
  • 1.9.2009 - 1.10.2009
  • 1.10.2009 - 1.11.2009
  • 1.11.2009 - 1.12.2009
  • 1.12.2009 - 1.1.2010
  • 1.1.2010 - 1.2.2010
  • 1.2.2010 - 1.3.2010
  • 1.3.2010 - 1.4.2010
  • 1.4.2010 - 1.5.2010
  • 1.5.2010 - 1.6.2010
  • 1.6.2010 - 1.7.2010
  • 1.7.2010 - 1.8.2010
  • 1.8.2010 - 1.9.2010
  • 1.9.2010 - 1.10.2010
  • 1.10.2010 - 1.11.2010
  • 1.11.2010 - 1.12.2010
  • 1.12.2010 - 1.1.2011
  • 1.1.2011 - 1.2.2011
  • 1.2.2011 - 1.3.2011
  • 1.3.2011 - 1.4.2011
  • 1.4.2011 - 1.5.2011
  • 1.5.2011 - 1.6.2011
  • 1.6.2011 - 1.7.2011
  • 1.7.2011 - 1.8.2011
  • 1.8.2011 - 1.9.2011
  • 1.9.2011 - 1.10.2011
  • 1.10.2011 - 1.11.2011
  • 1.11.2011 - 1.12.2011
  • 1.12.2011 - 1.1.2012
  • 1.1.2012 - 1.2.2012
  • 1.2.2012 - 1.3.2012
  • 1.3.2012 - 1.4.2012
  • 1.4.2012 - 1.5.2012
  • 1.5.2012 - 1.6.2012
  • 1.6.2012 - 1.7.2012
  • 1.7.2012 - 1.8.2012
  • 1.8.2012 - 1.9.2012
  • 1.9.2012 - 1.10.2012
  • 1.10.2012 - 1.11.2012
  • 1.11.2012 - 1.12.2012
  • 1.12.2012 - 1.1.2013
  • 1.1.2013 - 1.2.2013
  • 1.2.2013 - 1.3.2013
  • 1.3.2013 - 1.4.2013
  • 1.4.2013 - 1.5.2013
  • 1.5.2013 - 1.6.2013
  • 1.6.2013 - 1.7.2013
  • 1.7.2013 - 1.8.2013
  • 1.8.2013 - 1.9.2013
  • 1.9.2013 - 1.10.2013
  • 1.10.2013 - 1.11.2013
  • 1.11.2013 - 1.12.2013
  • 1.12.2013 - 1.1.2014
  • 1.1.2014 - 1.2.2014
  • 1.2.2014 - 1.3.2014
  • 1.3.2014 - 1.4.2014
  • 1.4.2014 - 1.5.2014
  • 1.5.2014 - 1.6.2014
  • 1.8.2014 - 1.9.2014
  • 1.9.2014 - 1.10.2014
  • 1.10.2014 - 1.11.2014
  • 1.11.2014 - 1.12.2014
  • 1.12.2014 - 1.1.2015
  • 1.1.2015 - 1.2.2015
  • 1.2.2015 - 1.3.2015
  • 1.3.2015 - 1.4.2015
  • 1.4.2015 - 1.5.2015
  • 1.6.2015 - 1.7.2015
  • 1.7.2015 - 1.8.2015
  • 1.8.2015 - 1.9.2015
  • 1.9.2015 - 1.10.2015
  • 1.10.2015 - 1.11.2015
  • 1.11.2015 - 1.12.2015
  • 1.12.2015 - 1.1.2016
  • 1.1.2016 - 1.2.2016
  • 1.2.2016 - 1.3.2016
  • 1.3.2016 - 1.4.2016
  • 1.4.2016 - 1.5.2016
  • 1.5.2016 - 1.6.2016
  • 1.6.2016 - 1.7.2016
  • 1.7.2016 - 1.8.2016
  • 1.8.2016 - 1.9.2016
  • 1.9.2016 - 1.10.2016
  • 1.10.2016 - 1.11.2016
  • 1.11.2016 - 1.12.2016
  • 1.12.2016 - 1.1.2017
  • 1.1.2017 - 1.2.2017
  • 1.2.2017 - 1.3.2017
  • 1.3.2017 - 1.4.2017
  • 1.5.2017 - 1.6.2017
  • 1.6.2017 - 1.7.2017
  • 1.8.2017 - 1.9.2017
  • 1.9.2017 - 1.10.2017
  • 1.10.2017 - 1.11.2017
  • Free Guestbook from Bravenet Free Guestbook from Bravenet