22. september 2015
Fundur í dag á Hellu um svæðisskipulag á Suðurland. Stór hópur frá öllum sveitarfélögum á Suðurlandi hefur nú hist þrisvar sinnum til að fara yfir möguleikana sem felast í sameiginlegu svæðisskipulagi. Mikið hefur verið rætt um það hvaða leiðir í því væru vænlegastar en mörgum finnst Suðurland allt of stórt og viðamikið verkefni í þessu samhengi. Matthildur Elmarsdóttir frá Alta hefur verið okkur til halds og trausts í þessu ferli og hefur gert það mjög vel. Við höfum mikið rætt um kortlagningu á gæðum og möguleikum svæðisins en endanleg tillaga hópsins mun verða lögð fyrir stjórn SASS og ársþingið sem halda á í október.
Það er mikið fjör í lóðamálum og byggingum nýrra íbúða hér í Hveragerði. Búið er að úthluta öllum raðhúsalóðum sem bærinn hefur yfir að ráða í bili sem og öllum parhúsalóðum. Einungis eru til úthlutunar tvær einbýlishúsalóðir og nokkrar lóðir til atvinnurekstrar. Einkaaðilar hafa réttindi nokkurra lóða á sínu forræði og eru einhverjir þeirra farnir að hugsa sér til hreyfings og vinna að skipulagsmálum. Það er greinileg þörf á fleiri íbúðum hér í bæ og ljóst að fjölgun Hvergerðinga mun halda áfram á næstunni.
--------
Fór í minn þriðja tíma í Zumba í dag - mikið rosalega er þetta gaman :-) Frekar flókið samt og ógrynni af sporum sem þarf að læra ! Ætla að mæta aftur kl. 6 í fyrramálið þar sem framundan er hin árlega fjármálaráðstefna sveitarfélaga og þá er enginn tími fyrir ræktina :-)
Næst verður skrifað á bloggið um helgina - fylgist því vel með ...
Comments:
Skrifa ummæli
