Aldís Hafsteinsdóttir

"Northern Light Inn"



Í dag hittumst við stelpurnar í MA klúbbnum hjá Kristjönu í Bláa Lóninu.
Hún rekur þar af miklum myndarbrag glæsilegt hótel sem var gaman að skoða. Eyddum þar lunganum úr deginum við skraf, snæðing og skemmtilegheit eins og ávallt er þegar hópurinn hittist.
Við Adda ákváðum síðan að fara Krísuvíkurleiðina heim og kanna hversu fljótar við yrðum. Það viðraði líka einstaklega vel til bílferða þannig að ferðin var hin skemmtilegasta. Það var gaman að rifja það upp hversu falleg þessi leið er. Það eina sem spillti fyrir var vegurinn sem var, vægast sagt, herfilega slæmur. Meira segja frú Arnheiður sem er nú ýmsu vön úr Biskupstungunum varð að viðurkenna að þetta jaðraði við að vera ófært. Þrátt fyrir þessar ófærur og að hafa lúsast megnið af leiðinni vorum við einungis hálftíma lengur á leiðinni heldur en ef við hefðum farið gegnum Reykjavík. Fannst okkur það nokkuð gott og sannaði það að þegar Suðurstrandarvegur verður að veruleika þá verðum við mun fljótari í förum þó vegalengdin styttist kannski ekki mikið í kílómetrum talið.
Annars furðulegt hvernig allt dankast hér í vegakerfinu. Ekki er enn byrjað á Suðurstrandarveginum og Hellisheiðin er orðin þjóðinni til skammar. Finnst gleymast að hvorugur þessara vega er einkamál Sunnlendinga. Hefði haldið að íbúar höfuðborgarsvæðisins myndu líta á góða vegi út úr borginni sem forgangsatriði og nauðsyn eins og iðulega hefur sýnt sig bæði á "hátíðisdögum" semog óveðursdögum síðastliðinna ára.
----------------
Frábært reyndar að sjá að loksins eru að hefjast framkvæmdir við veginn yfir Svínahraun, það verður mikil munur. Nú hristum við breikkunina fram úr erminni líka ! ! !

Ótrúlegt að enn skuli einhver nenna að athuga hvort ég hafi fengið andann yfir mig og skrifað á þessa síðu. Hverjir skyldu þessir örfáu aðdáendur annars vera? Hef vísvitandi ekki nothæfa gestabók því það er miklu skemmtilegra að ímynda sér hverjir eru að skoða síðuna heldur en að fá það staðfest að einungis nánustu ættingjar bíða eftir lífsmarki...

Annars er von til þess að oftar verði bloggað í framtíðinni, hef ekki haft nothæfa nettengingu heima við síðan í janúar en í kvöld mætti Ármann og lagaði allt dótið. Setti upp ADSL tenginu og þráðlaust net innanhúss. Væri snilldarlega frábært ef ég væri ekki löngu búin að eyðileggja batteríið í fartölvunni. Nú er hún ekki meiri fartölva en svo að þessi elska verður alltaf að vera í sambandi. EN nú komumst við Bjarni þó á netið, veit ekki alveg hvort okkar fagnaði meira.

Hér var hið fjörugusta Idol partý í kvöld, fylkingin skiptist nokkuð jafn en bæði ég og minn ágæti eiginmaður urðum heldur fúl þegar okkar kona varð að lúta í lægra haldi fyrir Hildi Völu. Erum reyndar á því að þær verði báðar stjörnur enda frábærar. Þjóðhildur Halvorssen mætti hingað beint úr fimmtugsafmælisveislu einni mikilli:

--- Til hamingju Garðar ---

Verð að benda ykkur á að lesa bloggið hennar Þjóðhildar (linkur til vinstri) þar má nú lesa alveg frábæra ferðasögu Norræna félagsins til Danmerkur.