Aldís Hafsteinsdóttir

Almennur stjórnmálafundur á Hótel Örk

Fimmtudagskvöldið 20. janúar er boðað til almenns stjórnmálafundar á Hótel Örk. Fundurinn hefst klukkan 20.

Framsögumenn verða Sturla Böðvarsson, samgönguráðherra, Drífa Hjartardóttir þingmaður og Sólveig Pétursdóttir, forseti Alþingis.

Mikilvægt er að Hvergerðingar, semog aðrir Sunnlendingar, sýni vilja sinn í verki, mæti á fundinn og ræði þau málefni sem efst eru á baugi og þá sérstaklega í samgöngumálum.

Af nógu er að taka, breikkun og lýsing Hellisheiðar, Suðurstrandarvegur, göng til Vestmannaeyja, Gjábakkavegur og fleira og fleira. Hvernig á forgangsröðun verkefna að vera? Er vegafé réttlátlega skipt milli landshluta? Notum tækifærið þegar þingmenn og ráðherra samgöngumála boða til fundar, mætum og látum í okkur heyra.

Vonast til að sjá sem flesta annað kvöld á Hótel Örk !

Dyggum lesendum þessarar bloggsíðu hefur án alls vafa fækkað mikið undanfarið ef þeir eru þá ekki alveg horfnir því óralangt er síðan síðast var bloggað á síðunni. Það þýðir þó ekki að undirrituð hafi lagst í dvala, nei síður en svo ætli framtaksleysið á ritvellinum beri ekki frekar merki um annir á öðrum sviðum.

Það sem helst hefur á dagana drifið er:

-að jól og áramót voru haldin með hefðbundnu sniði þrátt fyrir að brennan hafi verið færð yfir á nýársdagskvöld. Sem er annars miklu betri siður! Minna stress fyrir okkur sem förum alltaf í messu kl. 18 á gamlárskvöld.

-litli gaurinn á Iðjumörkinni dafnar vel og móðir hans líka.

-heimasætan er farin á hússtjórnarskóla fyrir austan, myndi líka betur ef Hafliði væri á sama stað...

-öllum lausum lóðum í bæjarfélaginu var úthlutað á einu bretti síðastliðinn fimmtudag. Fjör á þeim fundi.

-Meirihlutinn reyndist ekki hafa farið að lögum varðandi gerð leigusamnings í Sunnumörkinni. Meira um það síðar.

-Laufey var tilnefnd í kjörinu um íþróttamann Árborgar. Hjalti Rúnar vann og var vel að þeim titli kominn enda frábær íþróttamaður. Til hamingju strákur !

-Var að setja þráðlaust net í húsið og síðan er netið EKKI að virka.
Á ögurstundum sem þessum er Ármann ómissandi! ! !

Þann 13. desember fæddist lítill drengur, stór og myndarlegur þrátt fyrir að hann hafi komið aðeins fyrir tímann. Það er yndislegt að aftur skuli vera ungabarn í fjölskyldunni.
Innilega til hamingju með litla prinsinn elsku Guðrún, Jói, Hafsteinn og Dagný Lísa.