Aldís Hafsteinsdóttir

 Átti góðan fund með leikskólastjórum í morgun.  Fórum yfir ýmis mál meðal annars inntöku nýrra barna að loknu sumarfríi.  Nú er verið að hringja út til  foreldra barna á biðlistanum og tilkynna um upphaf leikskólagöngu. Um leið eru foreldrar barna sem boðið er pláss á Óskalandi látnir vita af því að sú staða gæti komið upp að ef að það vantaði mannskap í haust að þá gæti inntaka barna dregist eitthvað þess vegna.  En þar með eru allavega öll þessi börn komin með pláss og komast inn um leið og búið er að manna allar stöður og enginn fer fram fyrir þau í röðinni.  Ég hef fulla trú á að það takist að manna allra stöður og að ekki komi til neinna tafa þess vegna.  Allavega hefur alltaf tekist að ráða starfsmenn á leikskólana og ég veit ekki af hverju það ætti ekki að takast núna.

Miðað við þetta þá verður nú hringt í alla foreldra sem eiga börn sem verða eins árs út september.   Inntaka barna tekur aftur á móti tíma þar sem einungis fjögur-fimm eru aðlöguð að leikskólastarfinu í einu.   Í dag  eru því á biðlistanum börn sem verða eins árs í október (1)  og síðar á árinu 2021 (7).   Held ég að fá sveitarfélög séu að gera betur en það núna.  Síðan er rétt að geta þess að nú er unnið að því að hér verði settar upp lausar kennslustofur sem munu svo geta tekið við enn fleiri börnum þegar þær verða komnar upp sem ætti að vera í október/nóvember ef allt gengur eftir.