Aldís Hafsteinsdóttir

Á síðasta ári var ég kosin einn af varaforsetum evrópsku sveitarfélagasamtakanna, fulltrúi Norðurlandanna.  Þetta var á fundi í Orleans í Frakklandi í janúar á síðasta ári og síðan þá hef ég ekki farið til útlanda, út af dottlu! 

Í dag flutti ég ræðu um jafnréttismál á þingi þessara sömu samtaka sem fram fór í Bologna á Ítalíu. Gekk hreint ágætlega.  Ég aftur á móti sat nú bara í mínum góða stól hér við Breiðumörkina á meðan.  

Það er alltaf gaman að deila reynslu okkar Íslendinga í þessum málum með öðrum þjóðum enda erum við hvað fremst í heiminum hvað jafnréttismál varðar.  Á fundinum ræddum við einnig um ofbeldi og þar sagði einn at Bretunum frá því að þar rétt eins og hér hefði heimilisofbeldi aukist mikið á covid tímanum.  Í ljósi þess að nú er EM í fótbolta í fullum gangi sagði hann einnig frá því að það lægju fyrir niðurstöður rannsókna um það að ef að breska landsliðið tapar leik þá yrði 38% aukning í heimilisofbeldi og því miður tapar liðið þeirra of oft, bætti hann við.  Heimilið er því miður ekki sá griðarstaður fyrir alla sem við viljum og höldum að það sé.   En hvað varðar jafnréttismálin þá kom einnig fram að fæstir kvenkyns leiðtogar í heiminum sitja tvö kjörtímabil eða lengur, þykir það mjög slæmt því karlarnir sitja svo sannarlega miklu lengur í embætti.  Hér þarf að gera miklu betur því reynslan í þessum geira er svo mikilvæg og ekki síður samfella sem skiptir einnig miklu máli.

Horfði á fjóra þætti af Kötlu í gærkvöldi.  Mér finnast þeir mjög góðir, passlega ógnvekjandi.  Kvefið sá til þess að ég hámhorfði á Kötlu en fór ekki í göngu um gömlu þjóðleiðirnar sem boðið var uppá í gærkvöldi.  Vona bara að sú ganga verði endurtekin því ég hef mikinn áhuga á að heyra sögu þjóðleiðanna um Hveragerði.  Vorum einmitt að fá 400.000 króna styrk frá Eignarhaldsfélagi Brunabótafélags Íslands til að gera söguskilti um gömlu þjóðleiðirnar.  Stefnum á vígslu þess á Blómstrandi dögum í ágúst.