Aldís Hafsteinsdóttir

Það er nóg um að vera í bæjarmálefnum og dagurinn í dag var engin undantekning þar á.  Kláraði að lesa yfir bréfaskriftir lögmanna varðandi tvö mál hér í bænum en við vinnum afskaplega vel með lögmanni bæjarins, Óskari Sigurðssyni, á Lex lögmannsstofu.  

Ræddi við tvo aðila varðandi lausar kennslustofur sem stefnt er að því að setja upp við leikskólann Óskaland komandi haust.  Tillaga að breytingu á byggingareitum er að fara í grenndarkynningu og vonandi getum við komið þessum stofum upp í haust einhvern tíma.  Nú er verið að hringja í foreldra barna sem verða 1. árs núna í júní og láta vita af upphafi leikskólagöngu.  Það er vel gert miðað við flest sveitarfélög hér um kring.  Aftur á móti er jafn ljóst að hér er skortur á dagforeldrum þrátt fyrir ítrekaðar auglýsingar. Hveragerðisbær býður tryggar greiðslur óháð barnafjölda, eina sveitarfélagið sem það gerir, Eingreiðslur við upphaf starfs og árlega eftir það en þrátt fyrir þetta þá  eru viðbrögðin engin.  Alveg stórmerkilegt og þá sérstaklega þegar tekið er tillit til atvinnuástands og fjölda atvinnulausra í samfélaginu.  

Ekki þar fyrir að þá vantar víða fólk til starfa.  Síðast þegar ég vissi þá vantaði starfsmenn í sundlaugina þegar hún opnar, það vantar á Upplýsingamiðstöðina, það vantar sálfræðing og félagsráðgjafar eru af skornum skammti svo fátt eitt sé talið.  Fáir sóttu líka um flokksstjóra í vinnuskólanum þannig að okkur finnst ástand á vinnumarkaði harla undarlegt þessa dagana. 

Eftir hádegi heimsótti ég Pure North, endurvinnslufyrirtækið, en þar var verið að skrifa undir samning á milli fyrirtækisins, sveitarfélaganna, Strandabyggðar og Skaftárhrepps  og Bændasamtakanna um aðkomu þeirra að söfnun heyrúlluplasts sem síðan er komið í örugga endurvinnslu hjá Pure North.    Áslaug Hulda, framkvæmdastjóri Pure North birtist svo skyndilega með franska kvikmyndagerðarmenn sem voru að gera heimildamynd um hringrásarhagkerfið og alveg óvænt vildu þeir viðtal við mig og Vigdísi Häsler um það!  Það var skondin uppákoma og óvænt.  Vona bara að enginn sem ég þekki sjái þetta viðtal :-)   

Aðalfundur Kjörís og Steingerðis síðdegis og fram á kvöld.  Þar skipum við systkinin stjórnir svo þetta eru ágætir fundir með endurskoðanda fyrirtækjanna.