17. júní 2021
17. júní í Blómabænum
Gleðilega þjóðhátíð kæru vinir!
17. júní er einn af mínum uppáhaldsdögum. Einhvern veginn dagurinn sem maður fer út, hittir alla, og gerir sér svo góða grein fyrir gildi samveru og samfélagsins í lífi okkar allra.
Dagskrá 17. júní hér í Hveragerði er með hefðbundnum hætti eins og á að vera. Stundum fáum við gagnrýni fyrir öll þessi ræðuhöld og að börnunum leiðist á meðan. Ég er alin upp við það að dauðleiðast undir ræðu forseta bæjarstjórnar á sundlaugarbakkanum hér í Hveragerði bíðandi í ofvæni eftir laugargríninu. En sú bið var aldrei löng og alltaf þess virði. Ég held að börn dagsins í dag hafi bara gott af því að bíða. Bíða á meðan fjallkonan flytur ljóð. Bíða á meðan að nýstúdentinn flytur ræðu. Bíða á meðan við afhendum alls konar viðurkenningar og bíða á meðan við hlýðum á þjóðsönginn. Kannski er þetta eitt af því sem við höfum gleymt að kenna börnum okkar og það er gildi eftirvæntingar og nauðsyn þess að hafa þolinmæði og kunna að bíða. Svo er líka bráðhollt að láta sér leiðst í smá stund. Mættum öll gera meira af því :-)
En fyrir nokkrum árum var tekin sú ákvörðun að flytja hátíðarhöldin frá sundlaugarbakkanum þar sem þau hafa verið í áratugi og niður í Lystigarðinn Fossflöt. Ég var ein af þeim sem var afar hugsi yfir þessari breytingu. Sá þetta hreinlega ekki fyrir mér. En í dag sé ég að breytingin var til góðs. Aðgengi að svæðinu auðvitað miklu, miklu betra og umgjörðin öll dásamleg ekki síst núna þegar nýtt svið er komið í garðinn og aðstaðan öll orðin til fyrirmyndar. Sakna samt alltaf laugargrínsins og lýsi hér með eftir góðum hugmyndum að einhvers konar bæjargríni sem hægt er að framkvæma í Lystigarðinum!
En ég tók helling af myndum í gær og áhugasamir geta nálgast þær á facebook síðunni minni !