Aldís Hafsteinsdóttir

Miklar gleðifréttir í morgun þegar fréttist að bilunin í gufuveitunni hefði fundist í loka í Hveragarðinum.  Þar með komst hiti á garðyrkjustöðvarnar og sundlaugina og auk þess til allra hinna sem þurftu að glíma við truflanir vegna hitaleysisins.   Það var svolítið gaman að sjá að skyndilega fór að rjúka hjá Kjöt og kúnst, hveragarðinum og víða annars staðar.  Það var hreinlega eins og eitthvað hefði vantað sem nú væri komið aftur.   Þvílkur munur !

Hitti Elínu Ester, forstöðukonu frístundaskóla og félagsmiðstöðvar, í morgun.  Ræddum við ýmis atriði varðandi starfsemina, opnunartíma og möguleika starfsmanna til stefnumótunar og fræðslu.  Einnig fórum við yfir ævintýranámskeið sumarsins og hvernig því verður háttað.  Eins og áður verður skólahópi leikskólans boðið endurgjaldslaust á námskeiðið en það vonumst við til að verði hvatning til að elstu börnin vilji taka þátt í því.  Bæði er að á þessum tíma langar þeim mörgum í ný og spennandi verkefni en eins er það engin launung að með þessu móti tekst að bjóða yngstu börnunum fyrr pláss á leikskólunum.

Fundur í Ferðamálaráði í hádeginu.  Þar var aðallega farið yfir nýja evróputilskipun um pakkaferðir og samtengdar ferðir en þessa tilskipun skal innleiða fyrir 1. Júlí.  Stuttur tími til stefnu og málið stórt.  Einnig fórum við yfir starfsreglur Ferðamálaráðs og fundi framundan.

Aftur austur og nær því beint á fund í stjórn Listasafn Árnesinga en þar er ég formaður stjórnar.  Hlutverk sem í mörg ár hefur fallið í skaut Hvergerðingnum sem sæti á í framkvæmdastjórn Héraðsnefndar.  Alltaf skemmtilegt en í dag fjölluðum við um rekstrartengd málefni og m.a. Ráðningu tveggja frábærra einstaklinga sem skipta munu með sér stöðu fræðslufulltrúa.  Auk þess fengum við kynningu á næstu sýningum.  Hvet alla til að heimsækja safnið sem þykir setja upp afar metnaðarfullar sýningar.

Sendum einnig út fundarboð bæjarráðs með nokkrum minnisblöðum bæjarstjóra.  Núna er það nýja persónuverndarlöggjöfin sem allt snýst um ....





Verð að sýna ykkur hvað við erum heppin hér á bæjarskrifstofunni.  Ósk mamma hennar Heiðu sendir okkur nefnilega stundum veitingar og í dag fengum við sendar þessar líka gómsætu nýbökuðu kleinur.  Þúsund þakkir Ósk !