Aldís Hafsteinsdóttir

Byrjaði daginn á því að dást að breytingum og skreytingum á neðri hæðinni á bæjarskrifstofunni en Margrét Jóna fór þar yfir eins og stormsveipur í gær. Hún og eiginmaður hennar Gummi eru hreinasta draumateymi þegar kemur að innréttingu húsnæðis enda er bæjarskrifstofan að verða svo flott að það hálfa væri nóg. Og það albesta er að hún gerir þetta allt fyrir næstum engan pening sem er gríðarlegur kostur.

Fundur í framkvæmdastjórn Héraðsnefndar Árnesinga fyrir hádegi þar sem við fórum yfir þau mál sem ákveðið var fela framkvæmdastjórinni að gera á síðasta nefndarfundi. Þar á meðal er málefni Alviðru og Öndverðarness sem er stórt og mikið mál sem flókið er að finna farveg fyrir. En þessar jarðir á Héraðsnefnd með Landvernd en þessar stofnanir fengu jarðirnar í arf með nokkuð ítarlegum kvöðum um nýtingu þeirra. Nú vinnum við í að finna skynsamlega leið til að koma þessum jörðum í not sem samræmast gjafabréfi sem þeim fylgdu.

Í hádeginu hittumst við Selfyssingar og Hvergerðingar og fórum yfir stöðuna í málefnum flóttafólksins frá Sýrlandi. Fjölskyldurnar eru allar búnar að koma sér vel fyrir og gengur miklu betur en við þorðum að vona. Það er afar ánægjulegt.

Fundur bæjarfulltrúa klukkan 15 þar sem við fórum yfir fjárhagsáætlun. Rétt náði síðan í ræktina kl. 18:00. Var ansi kraftlaus í lyftingunum enda kannsk svolítið mikið að fara í 3 tíma á 24 tímum :-)

++++++++++++++++

Ég hef fengið nokkur viðbrögð við frétt sem Magnús Hlynur birti í hádegisfréttum Bylgjunnar á sunnudaginn. Þar birtir hann upptöku af fundi sem Samtök atvinnulífsins héldu á Selfossi í síðustu viku. Virðulegt viðtal við framkvæmdastjóra Samtaka atvinnulífsins en birtir síðan stutta upptöku af litlum hluta þess sem ég sagði þar í óundirbúinni ræðu og er þessi upptaka gerð án minnar vitundar. Þessi fundur var haldinn til að fjalla um stöðuna í íslensku efnahagslífi og sérstaklega í ljósi þeirra kjaraviðræðna sem framundan eru. Ég ásamt fleirum stóð upp á þessum fundi sem taldi kannski um 20 manns og fjallaði um efni fundarins. Ég meira að segja í nokkuð löngu máli. Ég hafði ekki hugmynd um að verið væri að taka upp þessar umræður frekar en aðrir sem þarna voru. Hvað þá að mér gæti grunað að þetta innlegg mitt sem voru lauslegar vangaveltur um kjaraviðræðurnar framundan ætti eftir að rata í fréttirnar. Slitið úr samhengi og án upphafs og endis og annara skýringa. Mér finnast þessi vinnubrögð fréttamannsins vægast sagt slæm. Ef að verið er að taka upp umræður sem þessar með það fyrir augum að þær verði notaðar í fjölmiðlum þá finnst mér rétt að þeir sem á fundinum eru viti af því. En einnig hefði mér fundist rétt að úr því að það sem ég sagði þarna var svona eftirtektarvert að ég hefði þá verið beðin um að koma í viðtal eins og aðrir fengu sem voru með innlegg á þessum sama fundi. Ég get alveg staðið fyrir máli mínu hvar og hvenær sem er, en mér finnst huggulegra að vita það ef að málflutningur minn er tilefni til frétta eins og í þetta sinn.