Aldís Hafsteinsdóttir

Vikan hefur liðið, eins og þær margar gera, alltof hratt.

Alls konar fundir og viðburðir og margt sem hægt væri að deila hér á síðunni.
Meðal annars sótti ég afar fróðlegt málþing um sjálfbærni á Suðurlandi í gær. Þar var fjallað um sorp og endurvinnslu og endurnýtingu þar sem Stefán Gíslason fór yfir stöðu mála hér á Suðurlandi. Það er gott fyrir Hvergerðinga að vita að í þeim málum erum við hér í Hveragerði í fararbroddi. Við flokkum hér í þrjár tunnur og þar á meðal allt lífrænt sem fer í moltugerð. Hér er kostnaður sem bæjarfélagið þarf að greiða með málaflokknum er hér minnstur og fráveitumálin eru hér í góðu lagi. Við gengum stolgt af fundi Hvergerðingar, ánægð með framlag íbúa til þessara mála.

Í morgun var rýnifundur vegna hópsýkingarinnar sem kom upp á Úlfljótsvatni. Þar fóru allir þeir aðilar sem að málum komu yfir reynslu sína og reynt var að finna það sem betur mátti fara. Það var auðvitað ýmislegt en það sem upp úr stóð var að þessi stóri atburður var leystur afar vel af hendi en fjöldi sjálfboðaliða lagði mikið á sig til að svo mætti verða. Fyrir það ber að þakka.

Það er heilmikið stúss að flytja heila bæjarskrifstofu og tala nú ekki um þegar húsnæðið er langt í frá tilbúið. Þessi vika hefur samt verið skemmtileg og við höfum öll góða tilfinningu fyrir nýjum bæjarskrifstofum. Núna um helgina á síðan að setja upp veggi, hurðir og skápa og ganga frá ýmsu smálegu. Það verður spennandi að koma til vinnu á mánudaginn og sjá það allt.

Verst að gluggatjöld koma ekki fyrr en eftir mánuð - fram að því verðum við að byrgja sólina með öllum tiltækum ráðum eða vonast eftir skýjuðu veðri því gluggarnir eru bæði stórir og miklir !