Aldís Hafsteinsdóttir

Stjórn Sambands íslenskra sveitarfélaga fór í vinnuferð austur á land á föstudag og laugardag. Flugum eldsnemma um morguninn sem var ágætt því þá er maður rétt rúmar 30 mínútur út á flugvöll. Allt annað en umferðarteppan daginn áður.
Austurland tók á móti okkur með albesta móti en dagurinn var hreint yndislegur. Það var svo heitt og notalegt að þetta var eins og í útlöndum. Bærðist ekki hár á höfði og brakandi sól allan daginn.
Byrjuðum á stjórnarfundi í fundarsal bæjarstjórnar Fljótsdalshéraðs en að honum lokn um mættu fulltrúar í bæjarstjórninni þar til fundar við okkur og kynntu málefni sveitarfélagsins og það sem efst er á baugi. Þetta er viðfeðmasta sveitarfélag landsins sem býr að mörgum náttúruperlum og auðlindum. Þau hafa verið stórhuga að undanförnu og byggt bæði grunnskóla og afar glæsilegt hjúkrunarheimili. Þau eru einnig að koma sér upp urðunarstað í góðri sátt við samfélagið og munu urða þar tæp 3.000 tonn á ári þegar fram líða stundir. Vegna aðstæðna þarf ekki að undirbúa urðunarstaðinn með þeim hætti sem við höfum haldið að þyrfti hér fyrir sunnan og þótti mér það afar athyglisvert. Á fundinn mætti einnig fulltrúi frá Austurbrú til að kynna starfsemi þeirra en þar er áhersla lögð á jarðgangnagerð og var fróðlegt að heyra af aðstæðum og þeirri stöðu.

Keyrt sem leið lá til Eskifjarðar þar sem fundað var í Randolfshúsi. Algjörlega yndislegt en við sátum við borð á bryggjunni með eitt al fallegasta útsýni á fundarstað sem ég hef séð. Þar er laxeldi mál málann og því vel við hæfi að við skyldum sigla út í kvíarnar sem settar voru upp í vor og skoða þær í návígi. Mjög skemmtileg og eftirminnileg ferð og móttökurnar einstakar. Heimsóttum einnig nýtt vinnsluhús Eskju en þar er um 4.000 m2 og búið besta mögulega búnaði. Stórhuga menn þar á ferð.

Fundur með bæjarstjórn Seyðisfjarðar um kvöldið þar sem barist er fyrir göngum undir Fjarðarheiði og málefni hitaveitu bæjarisn voru einnig fyrirferðamikil. Þessa kvölds verður minnst fyrir alveg hreint dýrlegt veður en um miðnætti vorum við úti og hitinn var örugglega nálægt 20 gráðum og stafalogn. Þvílíkur draumur. UMhverfið var eins og úr ævintýri !

Flogið heim snemma á laugardagsmorgni þar sem hin kunnuglega sunnlenska rigning tók á móti mannskapnum :-)

Ræsti 24 km hlaupara í Hengils Ultra hlaupinu eftir hádegi á laugardag. Umgjörin öll um hlaupin var sérlega góð og einstakt að sjá þennan stóra hóp renna eins upp Varmárgilið áleiðis upp á Hengilssvæðið. Einar Bárðar á heiður skilinn fyrir sína aðkomu að þessu skemmtielga hlaupi. Það er gaman að geta þess að á annan tug hlaupara tók þátt í 100 km hlaupinu á sama svæði sem er auðvitað ekkert minna en klikkun :-)

Kláraði í dag að tæma skrifstofuna og skrifborðið í vinnunni. Það tók allan daginn en mikið hrikalega er gott að þetta er búið....

Frábært framtak hjá Ríkissjónvarpinu að sýna gamlar klassískar bíómyndir - horfði á laugardagskvöldið á To kill a mocking bird þar sem Gregory Peck á stórleik en ekki síður börnin þrjú sem þarna eru í stórum hlutverkum.

Þessi mynd og hann Gregory minntu mig á það að þegar ég var krakki þá safnaði ég leikurum! Það fór þannig fram að ég skrifaði í bók allar myndir sem ég sá með viðkomandi leikara. Átti semsagt til skrá yfir myndir David Niven, Gregory Peck og fleiri góðum, þess vegna veit ég nefnilega líka hver Lorenzo Lamas er og í hvaða mynd hann gerði garðinn frægan. Þetta var semsagt fyrir daga internetsins mín kæru og ég var í skráningardeildinni :-)