Aldís Hafsteinsdóttir

Öskudagurinn haldinn hátíðlegur út um allt í dag og við á bæjarskrifstofunni tókum þetta alla leið eins og margir!  Næstum allir í metnaðarfullum og glæsilegum búningum og mikið fjör og gaman. Fórum meira að segja eins og börnin og sungum í bakaríinu fyrir smákökur og í bankanum fyrir nammi !  Nokkuð skemmtilegt bara og lífgaði óneitanlega uppá tilveruna. ;-)

Annars var nóg um að vera eins og alltaf.   Undirbjó fund bæjarráðs í fyrramálið en þar eru fjölmörg mál á dagskrá.

Hitti skáta vegna móts sem halda á hér í Hveragerði og á fleiri stöðum á landinu í sumar.  Til landsins koma um 5000 þátttakendur og um 400 þeirra verða hér í Hveragerði í nokkra daga. Þá daga verða þeir vafalaust afar sýnilegir enda er þátttaka þeirra í samfélagslegum verkefnum hluti af samningnum sem gerður var.   En ég undirritaði samning um aðild bæjarins á fundinum og fer hann síðan fyrir bæjarstjórn til samþykktar.

Ræktin síðdegis og síðan kvöldverður og einstaklega gott kvöld með frábærum gestum þeim Ragnari og Björgu frá Hátúni í Skagafirði.