Aldís Hafsteinsdóttir

Hitti einnig Davíð Samúelsson sem vinnur að verkefnum á sviði ferðamála hér í Hveragerði.  Hann hefur að undanförnu unnið ötullega að þeim verkefnum en fljótlega verður reist risastór skilti rekstraraðila í Hveragerði við Breiðumörk.  Goshverinn Eilífur gýs í Hveragarðinum og lýsing hveranna á því sama svæðio er í endanlegri vinnslu svo fátt eitt sé talið sem Davíð hefur komið að. 

Síðdegis sátum við Helga, skrifstofustjóri yfir bókhaldinu með ágætum árangri.  Nú mun slík vinna taka heilmikinn tíma á næstunni enda gerð fjárhagsáætlunar fyrir árið 2017 komin í fullan gang. 

Átti góð samtöl við forstjóra og sölustjóra Reita fasteignafélags í dag.  Það er mikilvægt að vera í  sem bestum samskiptum við fyrirtækið enda leigir Hveragerðisbær hundruðir fermetra af því hér í Verslunarmiðstöðinni Sunnumörk.  Ákveðin hugmynd um breytingar hefur verið í vinnslu að undanförnu og verður fróðlegt að sjá hvort að samtöl dagsins hafi náð að fleyta þeirri umræðu í átt að góðri niðurstöðu fyrir bæjarbúa.

Húsfyllir á Heiðmörkinni í kvöld og mikið fjör.  Lárus  á Akureyri og missti því af fjörinu.  Mamma, Laufey og Haraldur Fróði komu í kvöldmat og borðuðu gómsætan fisk úr nýju fiskbúðinni.  Síðan bættist Hafsteinn Davíðs í hópinn og Guðrún systir og hundurinn Tinni sem er í fóstri á Iðjumörkinni.  Hópurinn leyfði síðan Alberti sem er í Danmörku að vera með í spjallinu svo þetta var yndislegt kvöld.

Hugsið ykkur að þegar við Lárus bjuggum í Danmörku fóru samskiptin heim fram með stopulum símtölum við mömmu og pabba þar sem bergmálið var svo pirrandi að það var varla hægt að eiga eðlilegt samtal.  Síðan klippti mamma út úr blöðunum áhugaverðar greinar og sendi okkur svo úrklippurnar - heil blöð var of dýrt að senda út :-)  Við vorum alsæl með þetta og lásum bara þær fréttir sem mömmu fannst við þurfa að sjá !