Aldís Hafsteinsdóttir

Hann Haraldur Fróði er mikill gleðigjafi sem kemur í heimsókn til önnum kafinnar ömmu sinnar þegar það hentar okkur báðum :-)

Hann fór í heimsókn í Gýgjarhólskot nýlega og þá gaf Skírnir honum þessa forláta bíla sem hafa verið í miklu uppáhaldi síðan enda eðal farartæki báðir tveir.

Mér fannst hann svo flottur á þessari mynd að ég ákvað að deila henni með ykkur.

Annars sleppti ég eina fundi dagsins sem hefði dregið mig út af skrifstofunni og fyrir vikið vannst vel í dag í hinum ýmsu málum.

Átti stórgóðan fund með Ara, umhverfisfulltrúa og Auði Ottesen sem hefur tekið að sér utanum hald um sögusýningu blómanna og aðrar sýningar sem verða munu í íþróttahúsinu á Blómum í bæ.  Hún mun einnig sjá um sölubása og samskipti við þá aðila svo það verður nóg að gera hjá henni.  Ég hef þá trú að hún muni gera góða hluti á sýningunni þó að hún hefði vafalaust þegið að fá lengri fyrirvara.

Það er á dagskrá að setja upp sýningu nokkurra stássstofa frá mismunandi tímabilum þar sem gerð verður grein fyrir samspili blóma og húsbúnaðar frá árinu 1900. Einnig hefur hún hug á að gera blómadrottningum skil, afleggjurum og erðagripum auk kaktusa.  En allt mun þetta skýrast í næstu viku.