Aldís Hafsteinsdóttir

Átti fund með Davíð Samúelsson strax i morgun þar sem við fórum yfir stöðu mála í þeim verkefnum sem hann er mest að vinna að en ljóst er að hans starf hefur þegar skilað ákveðnum árangri sem sjást mun á fundi bæjarráðs á fimmtudaginn.  

Í morgun hittum við Guðmundur einnig hóp af fólki sem hefur hug á að kanna möguleika á mikilli uppbyggingu ferðaþjónustutengds verkefnis hér í Hveragerði.  Þau sendu erindi síðdegis sem tekið verður til afgreiðslu á fimmutdaginn.

Eftir hádegi fórum við Helga í útréttingar til Reykjavíkur sem við gerum annars helst aldrei.  Við höfum náð góðu sambandi við ákveðið stórfyrirtæki í Reykjavík og þar höfum við fengið mikið magn af feykilega góðum skrifstofuhúsgögnum sem við höfum getað notað á skrifstofu Skóla og velferðarþjónustu Árnesþings.  Núna fórum við til að falast eftir meiru á skrifstofu bæjarins.  Fundum ýmislegt gott sem við erum afar þakklátar fyrir.  Þetta er heilmikil búbót fyrir bæjarfélagið. 

Meirihlutafundur í kvöld var gríðarlega langur enda sjaldan eða aldrei verið stærri mál á dagskrá eins fundar eins og verður á komandi fimmtudag.  Það er ótrúlega margt spennandi í gangi og ánægjulegt ef eitthvað af þeim verkefnum verður að veruleika, tala nú ekki um ef það verður raunin með þau öll.