Aldís Hafsteinsdóttir

Hitti Davíð Samúelsson í dag en hann hrærir nú í pottum atvinnutækifæranna fyrir okkur Hvergerðinga. Það verður spennandi að sjá hvað kemur út úr því að lokum.

Eftir hádegi vorum við Ásta í Árborg í viðtali við blaðið Sveitarstjórnarmál. Þar fjölluðum við um sveitarfélögin bæði tvö, sérstöðu þeirra og tækifæri, en einnig um samstarfsverkefni og mögulegar sameiningar. Sátum á Varmá restaurant og skoðuðum síðan hótelið á eftir. Þar er nú unnið að endurbótum á nokkrum herbergjum sem munu verða afskaplega flott.

Fór í kvennakaffi á bókasafninu þar sem boðið var uppá vöfflur og endaði síðan daginn með afskaplega skemmtilegum kvennahittingi í Sundlauginni Laugaskarði. Það var mjög vel lukkað og allar höfðum við á orði að þetta ætti að verða að árlegum viðburði. Mikið hlegið og skrafað.

Í fyrramálið kl. 11 verður farið í göngu um söguslóðir kvenna sem hafa látið til sín taka hér í Hveragerði. Það verður lagt af stað frá Kvennaskólatorginu.

Góður dagur að kveldi kominn þar sem andi þeirra kvenna sem ruddu brautina sveif yfir öllu sem gert var. Sit nú og horfi með öðru auganu á Ungfrúna góðu og húsið, fantagóða mynd ...