Aldís Hafsteinsdóttir

Á föstudaginn átti ég góðan fund með Þórarni Sveinssyni, atvinnuráðgjafa SASS, um atvinnumál í Hveragerði. Hann er mikill reynslubolti í atvinnulífinu og hefur víða komið við. Það er afskaplega gaman að fara yfir sviðið með honum en við vinnum nú að gerð atvinnustefnu bæjarins sem mun væntanlega koma á borð bæjarráðs í haust.

Um kvöldið var síðasi leikur blaklandsliðsins á Smáþjóðaleikunum. Þar fóru tvíburafrændurnir á kostum og það var ansi stolt frænka sem fylgdist með í stúkunni þetta kvöld. Silfur í höfn og glæsilegur sigur á San Marino.

Helginni var eytt í garðinum við færslu á blómum og runnum, tiltekt í beðum og öðrum skemmtilegheitum. Veðrið var afskaplega gott, mátti ekki vera betra því þá hefði ég ekki nennt þessu puði :-)

Í dag mánudag var góður vinnudagur á skrifstofunni. Undirbúningur fyrir meirhlutafund sem haldinn var í kvöld tók drjúgan tíma en eins var ýmsum málum sinnt í gegnum tölvupóst og síma.

Nú er undirbúningur fyrir Blóm í bæ í fullum gangi en það stefnir í góða hátíð. Þema sýningarinnar er „Flower power“ og því munu allar skreytingar taka mið af hippatímanum og þeim anda sem þá ríkti.

Íbúar eru hvattir til að taka virkan þátt í sýningunni með því að skreyta hús sín og garða á frumlegan hátt með blómum.
Nú þurfum við öll að gera snyrtilegt í kringum húsin okkar því við viljum gjarnan að bærinn sé okkur öllum til sóma þegar gestir eru boðnir velkomnir.