Aldís Hafsteinsdóttir

Fundur í framkvæmdastjórn Héraðsnefndar Árnesinga hér í Hveragerði í morgun.
Nú er verið að undirbúa vorfund Héraðsnefndar sem haldinn verður á Flúðum 9. og 10. apríl. Þetta verður stór fundur þar sem fjöldi mikilvægra mála er til umræðu. Þar mun væntanlega bera hvað hæst umræðu um fjölgun hjúkrunarrýma í Árnessýslu en hér er brýn þörf fyrir framtíðarsýn og skjótar úrbætur í ljósi biðlista og annarra atriða sem þarna hafa áhrif.

Hitti Sigríði Elísabetu (Lísu) sem bæjarstjórn ákvað að semja við um rekstur tjaldsvæðis. Fórum við yfir drög að samningi og ræddum ýmis mál er lúta að rekstri tjaldsvæðanna, en þau verða tvö hér í bæ næsta sumar. Þetta sem við þekkjum öll við Reykjamörk og síðan verður útbúið nýtt svæði uppí Dal, á svokölluðum Árhólmum sem án vafa á eftir að verða hið skemmtilegasta svæði. Margir rótgrónir Hvergerðingar hafa lýst yfir ánægju með þessi áform enda muna þeir vel hversu skemmtilegt var að tjalda á þessum slóðum áður fyrr.

Átti góðan fund með Hrafnhildi Karlsdóttur sem er teymisstjóri skólaþjónustusviðs Skóla- og velferðarþjónustu Árnesþings Fórum við yfir ný samþykktar tillögur um stuðning við þá sem vilja læra til leikskólakennara og eins breytingu á launasetningu uppeldismenntaðra starfsmanna leikskólanna. Einnig fórum við yfir húsnæðismál og aðstöðu starfsmanna en í dag eru starfsstöðvar þeirra hér í Hveragerði, á Borg í Grímsnesi og í Ölfusi.

Við Tolli (formaður fræðslunefndar) hittumst síðan og fórum saman á fund Fanneyjar skólastjóra Grunnskólans til að ræða ýmis mál er varða skólastarfið. Það var skemmtilegt að koma í skólann í dag enda var undirbúningur fyrir árshátíð skólans í fullum gangi Afskaplega glæsilegt hjá krökkunum.

Meirihlutafundur hófst kl. 17 og stóð hann til kl. 19. Þá þurfti að ganga frá nokkrum málum áður en ég mætti á fyrsta leik strákanna í meistaraflokki karla í körfu í undanúrslitum 1. deildar. Gríðarlega spennandi leikur og mikil spenna áður en okkar menn lönduðu verðskulduðum sigri. Mér fannst auðvitað sonurinn áberandi góður. Ég var afskaplega stolt af honum og reyndar liðinu öllu. Það er gríðarlega góð skemmtun að mæta á leiki og fín útrás...

Ég yrði sett á lokaða deild ef ég öskraði hérna heima eins og ég geri á leikjum...
Maður verður að hvetja sitt fólk, skiljiði :-)