Aldís Hafsteinsdóttir

Mikið óskaplega er þetta þreytandi veður.  Rokið beljar hér fyrir utan og frostið bítur ef maður vogar sér út.  Hellisheiðin búin að vera lokuð í á annan sólarhring og Þrengslin lokuðu síðan í dag.  Á facebook sér maður best hversu mikilvægt það er að vegakerfinu sé haldið opnu því heilmargir lentu í vandræðum í dag.  Sérstaklega þar sem Þrengslin voru einfaldlega ekki tilkynnt lokuð strax í morgun.    Það þurfa að koma miklu skýrari skilaboð í fjölmiðlum um ástand vega strax í morgunsárið, áður en fólk fer að stað til vinnu.  Því allir eru það samviskusamir að þeir vilja fara ef það er nokkur kostur.  Í morgun voru sjö bílar útaf bara hér efst í Ölfusinu á leið niður í Þorlákshöfn og tveir neðar í sveitinni.  Síðdegis skilst mér á vegfarendum að sendibílar og léttari farartæki hafi hreinlega fokið útaf veginum.  Fjöldi fólks lenti í standandi vandræðum enda umferðin gríðarlega mikil á milli bæjanna hér fyrir austan fjall og höfuðborgarsvæðisins.  Veðrið á að vera heldur skárra á morgun svo vonandi verður færið betra þá.

Ég sleppti fundi í Reykjavík eftir hádegi, og "græddi" þar með hálfan dag í vinnu.  Það var ágætt.  Jólagjöf bæjarstarfsmanna og jólakortalistinn er þar af leiðandi klár.  Fundargerð bæjarstjórnar á morgun tilbúin.  Glærusýning um fjárhagsáætlun fyrir bæjarstjórnarfundinn nærri því tilbúin, á rétt eftir að fínpússa nokkur atriði.  Listinn yfir ósvaraða pósta í "inboxinu" hefur styst mikið og veitti ekki af.  Svona dagar geta nýst ágætlega í alls konar frágang og mál sem annars  gefst lítill tími til að sinna.

Síðdegis sendi ég frá mér allt efni i Bláhver, jólablað Sjálfstæðismanna í Hveragerði.  Venju samkvæmt tók ég viðtal við skemmtilegan Hvergerðing og skrifaði annál yfir það helsta sem gerst hefur hjá Hveragerðisbæ í ár.  Ég hefði klárlega getað skrifað endalaust enda margt sem gerist í heilu bæjarfélagi á einu ári.  En lét mér þó nægja að tæpa á helstu framkvæmdum.  Læt síðan myndir lífga uppá annálinn :-)