Aldís Hafsteinsdóttir

Er búin að vera að æfa mig að gera kannanir á netinu enda var mér falið af bæjarstjórn að gera könnun meðal foreldra leikskólabarna þar sem spurt yrði um opnunartíma leikskólanna og vilja fólks til breytinga á honum.  Áður en ég sendi þá könnun út sem þetta snýst nú allt um ákvað ég að búa til tvær aðrar til að æfa mig.  Núna er í gangi á netinu könnun um aðventu og jólavenjur Hvergerðinga.  Þegar ég fór heim í dag höfðu nokkrir svarað en áberandi var að þetta voru svo til allt konur á miðjum aldri.  Hvar ætli karlarnir séu ?

Var boðuð niður á Eyrarbakka í dag í viðtal við N4, sjónvarpstöðina góðu að norðan.  Þar var verið að taka upp þátt um jólavenjur og annað sem tilheyrir þessum árstíma.  Ég og Margrét Frímanns vorum saman - hún fjallaði um venjur á Litla Hrauni en ég um venjur og hefði hér í Hveragerði.  Líflegt og skemmtilegt.  Vona samt svo innilega að þeir klippi út kommentið mitt um að ég vilji alls ekki sjá snjó ! !   Það hljómaði ekki mjög jólalega frekar svona eins og klippt út úr jólaævintýri Dickens.  Bæjarstjórinn vill alls ekki sjá snjó því hann kostar bara peninga og það meira að segja heilan helling - hljómar kannski ekki sérlega vel í sjónvarpi :-)

Síðdegis komu hingað þær María Björgk Ingvadóttur og Margrét Blöndal einmitt líka frá N4 en þær eru að vinna að því að koma hér á koppinn sunnlenskum þáttum um mannlíf á svæðinu.  Mér leist afar vel á hugmyndina og heyrist að það sama gildi um aðra sveitarstjórnarmenn á svæðinu. Dagskrárgerðin hjá N4 þykir afar góð og áhorf á stöðina er mikið.  Því gæti þetta verið góð leið til að kynna landshlutann.

Skrifaði, í samráði við bæjarfulltrúa,  umsögn um frumvarp sem komið er fram um afnám lágmarksútsvars hjá sveitarfélögunum.  Hér er fólk ekki mjög hrifið, enda ljóst að það eru helst örsmá  fámenn sveitarfélög sem þetta munu nýta.  Sveitarfélög sem til fjölda ára hafa getað boðið íbúum sínum miklu betri kjör heldur en aðrir geta gert í skjóli gríðarlegra tekna frá til dæmis virkjunum og stórfyrirtækjum.  Ef ákvörðun er tekin um afnámið þarf að grípa til víðtækra ráðstafna til að jafna þennan aðstöðumun sem óhjákvæmilega mun myndast á milli sveitarfélaga.

Sendi nýjar gjaldskrár til Heilbrigðis eftirlitsins til samþykktar.  Það gekk hratt og vel fyrir sig.

Við Guðmudur Baldursson fórum síðan á rúntinn og skoðuðum framkvæmdir í bænum en nú er frágangur í fullum gangi í Þverhlíð og Bröttuhlíð.  Þetta mun verða mjög flott þegar þessu er lokið.

Passaði Harald Fróða í kvöld og greip hann með mér á leik í kvennakörfunni. Honum fannst svo gaman að nú held ég að hann verði fastagerstur :-)