1. október 2014
"Þetta er bara vont svona rétt á meðan þú borgar" er klárlega setning dagsins. Sölumaður með mjög góða hugmynd sem örugglega myndi geta gert góða hluti en í dýrari kantinum fannst bæjarstjóranum. Sumir eru bara með´etta :-)
--------------------
Fundur með þingmönnum kjördæmisins í morgun og fulltrúum frá Árborg, Hveragerði og Ölfusi. Við kynntum okkar áherslur sem fólust í fjölgun hjúkrunarrýma í Árnessýslu, bættum samskiptum ríkis og sveitarfélaga, áframhaldandi framkvæmdum við Suðurlandsveginn og síðan mótmæltum við harðlega fyrirhuguðum flutningi Svæðisskrifstofu Vinnueftirlitsins héðan frá Hveragerði til Selfoss. Þessi árátta að allt skuli dragast til stóru kjarnanna er fyrir löngu orðin óþolandi og oft eru fá sýnileg rök fyrir breytingunum. Bæjarráð mun álykta um þetta mál í fyrramálið.
Fundurinn með þingmönnum var annars mjög líflegur og góður og skipst var á skoðunum um fjölmörg mál sem sameiginleg eru þessum sveitarfélögum.
----------------------
Hér hefur ringt sem aldrei fyrr og erum við þó öllu vön. Það er með ólíkindum hvað það er mikið vatn þarna uppi og ekkert lát á ! Á svona dögum er gott að stunda sund í góðum hópi :-)
Maður er úti og rennandi blaut hvort sem er. Það er síðan algjörlega ómissandi að ná aðeins pottaspjalli. Þar fréttir maður af öllu sem er að gerast !
Comments:
Skrifa ummæli
