Aldís Hafsteinsdóttir

Skrifaði tvær tillögur fyrir hönd meirihlutans í morgun um málefni sem ákveðið var í gærkvöldi á fundi hópsins að leggja fyrir bæjarstjórn á fimmtudaginn.  Önnur tillagan er um að hefja nú þegar gerð deiliskipulags á reitnum er  afmarkast af Þórsmörk, Reykjamörk, Þelamörk og Breiðumörk og fá til þess ASK arkitekta sem unnu 1. verðlaun í samkeppni um hönnun miðbæjarins. Einnig verður hafin vinna við gerð deiliskipulags fyrir athafna og iðnaðarlóðir neðan við þjóðveg en ljóst er að framboð á lóðum til iðnaðarstarfsemi er afar takmarkað hér í augnablikinu.  Nú verður bætt úr því.

Hin tillagan laut að kaupum að leiktækjum á leikvelli bæjarins en nú verða keyptar tvær "hreiður" rólur á Óskaland og Undraland og einnig verða sett ný leiktæki á lóð skólaselsins og á Hólaróló.

Fundur í stjórn Almannavarna Árnessýslu í morgun en þar var aðal efni ársreikningur síðasta árs.  Eftir hádegi kom hingað prófessor frá Póllandi til að fræðast um áhrif Hellisheiðar virkjunar á líf okkar Hvergerðinga.  Það kom honum mest á óvart að við skyldum ekki verða vör við jákvæð áhrif virkjunarinnar í formi atvinnu og aukinna tekna.  Það er fyrir löngu hætt að koma mér á óvart !

Fundur um ljósleiðaravæðingu bæjarins síðdegis.  Mjög fínn fundur þar sem gerð var góð grein fyrir því hvers vegna íbúar ættu að velja að tengjast ljósleiðaranum.  Það  er enginn efi í mínum huga að þessi tenging er sú besta sem er í boði og það væri hreinlega óskynsamlegt af íbúum að heimila ekki lagningu ljósleiðarans að húsnæði sínu í þessari atrennu.  Í ár verður tengingin ókeypis en þeir sem velja að tengjast síðar þurfa að greiða kostnaðinn sem af því hlýst.  Fulltrúar Gagnaveitu Reykjavíkur munu á næstunni dreifa kynningarefni í öll hús og í framhaldinu heimsækja öll heimili í bæjarfélaginu og leita leyfis til að tengja ljósleiðarann inn í húsin, íbúum að endurgjaldslausu.  Síðan er það fólki í sjálfsvald sett hvort það kaupir þjónustu yfir ljósleiðarann - það er seinni tíma ákvörðun óháð búnaðnum sem þá verður kominn inn.

Fór beint af fundinum og á Hótel Örk þar sem ég skemmti gestum sparidaga með uppistandi a la Aldís áttundu vikuna í röð.  Hef haft af þessum nokkuð gaman og þjálfast gríðarlega í að segja skemmtisögur og brandara.   Fyrir nú utan það hvað ég er búin að hitta mikið af skemmtilegu fólki - það er nú ekki leiðinlegt :-)

Heima beið síðan hátíðarkvöldverður þar sem Bjarni Rúnar á afmæli í dag.  Laufey og Haraldur skiluðu sér heil og höldnu heim frá Danmörku og litla ljósið var eins og engill þegar hann kom til ömmu og afa.  Hann er nú alveg hreint yndislegur þessi drengur.