26. apríl 2014
Nú er fjörið byrjað og heilmikið að gera vegna undirbúnings fyrir kosningarnar. Í dag hittist meirihlutinn á fundi kl. 9 til að undirbúa bæjarráðsfund sem verður á miðvikudaginn. Siðan var opið hús D-lista manna og í kjölfarið hittist framboðslistinn. Þetta er feykilega öflugur hópur sem er tilbúinn til að leggja mikið á sig til að ná árangri í vor.
Fór beint af fundi listans til að hitta starfsmenn Skagastrandar sem hingað voru komin í vorferð. Líflegur hópur sem fékk síðan leiðsögn um hveragarðinn með Ívari. Ég gat ekki stoppað lengi því annar hópur beið í Verslunarmiðstöðinni en þar voru mættar vinkonur Ásthildar Sturludóttur, bæjarstjóra í Vesturbyggð og auðvitað hún sjálf í "gæsaferð"... Ein umferð í jarðskjálftaherminn sló alveg í gegn og það gerði líka heimsókn í Kjörís þar sem 35 stiga frostið vekur alltaf lukku...
Afmæli hjá Vigdísi og Hafrúnu síðdegis var fjölskyldupartý af bestu gerð. Alltaf líflegt þegar þessi hópur hittist. Í kvöld rölti ég meðfram fjallinu svo ég gæti nú aðeins andað að mér góða veðrinu sem hér hefur verið í dag. Yndislegur dagur enda sást það alls staðar að fólk kunni vel að meta blíðuna :-)
Comments:
Skrifa ummæli