Aldís Hafsteinsdóttir

Sorp og sorphirða er mál málanna. Hver hefði nú trúað því fyrir nokkrum árum að flokkunaraðferðir, endurnýting sorps, sorphirða og urðun svo fátt eitt sé talið yrði jafn vinsælt umræðu efni og nú er orðið. Hver hefði nú líka trúað því að manni þættu þetta skemmtilegar og gefandi umræður??? Reyndar spurning um það hvort ég þurfi ekki að fara að víkka sjóndeildarhringinn og eignast ný áhugamál ;-)

Í hádeginu bauð Landsbankinn sveitarstjórum og oddvitum sveitarfélaga á svæðinu til hádegisverðar í Tryggvaskála. Góð og notaleg stund í fínum félagsskap. Það er reyndar alltaf gaman í Tryggvaskála, endurgerðin á húsinu hefur tekist einstaklega vel, allt er í góðu samræmi við þann tíðaranda sem þarna er verið að skapa og hugmyndaauðgin með ólíkindum.

Held áfram að vinna í málum sem þurfa að klárast fyrir fund bæjarráðs í næstu viku og bæjarstjórnar í þarnæstu. Þar er efst á baugi ráðning talmeinafræðings sem vonandi næst að klára fyrir þann tíma.



Átti gott samtal við Jóhann á Hótel Örk. Þar eru nú að hefjast hinir árlegu Sparidagar eldra fólks. Nú skilst mér að komi nýr maður til að stjórna í stað Gunnars sem hefur stýrt af stakri snilld í um 10 ár. Sá nýi er nú ekki af verri endanum en Jón hinn eini sanni Skeiðamaður og eiginkona hans munu stýra dagskránni. Verandi einn af hans áköfustu aðdáendum þá liggur við að maður ljúgi sig, svona aldurslega séð, inná böllin :-)