Aldís Hafsteinsdóttir

Setti nokkrar fréttir á heimasíðu bæjarins í morgun. Eina um leikskólagjöld hér í bæ samanborið við önnur sveitarfélög.
Ein var könnun frá Markaðsstofu Suðurlands varðandi gjöld á ferðamannastöðum sem reyndar væri gaman ef sem flestir tækju þátt í. Sú þriðja var grein um fjárhagsstöðu bæjarins en sú grein hafði birst áður í Dagskránni. Kíkið á fréttirnar hér. Hveragerðisbær er líka með síðu á facebook og þar söfnum við vinum og deilum smærri fréttum og viðburðum. Þar eru vinirnir nú tæplega 600 en mættu auðvitað vera fleiri. Svo endilega bjóðið vinum ykkar að líka við síðuna.

Undanfarna daga hefur þó nokkur tími farið í vangaveltur varðandi sorpmál. Tilboð voru opnuð í útboði á sorphirðu bæjarins í síðustu viku og síðan hefur Ríkiskaup unnið í gögnum. Bæjarstjórn fundar ekki fyrr en 13. febrúar en þá verður ákvörðun tekin um framhaldið.

Vann í minnisblaði varðandi framtíðarsýn bæjarins en bæjarráð hefur undanfarið unnið að því með hvaða hætti mætti laða fleiri íbúa til bæjarins. Þessi dagskrárliður verður aftur á dagskrá næsta bæjarráðsfundar.

Undanfarið höfum við skoðað lóðamál hér í bæ en of víða eru óbyggðar lóðir, lóðir þar sem hús og gróðrarstöðvar hafa verið rifin og geta slíkar lóðir verið mikil lýti á hverfunum en ekki síður er synd að þær lóðir skuli ekki vera byggðar. Það tekur tíma að koma slíkum málum í farveg - en í dag var til dæmis fundur um eitt slíkt mál.

Það var gaman að sjá hóp af ungum krökkum tefla í heita pottinum í sundlauginni áðan. Flot-taflið sem keypt var í tilefni af skákdeginum greinilega vinsælt.

Hörkustemning á leik Hamars og Vals í kvennakörfunni í kvöld. Það er virkilega hollt að mæta á leiki sérstaklega þeir eru svona spennandi eins og í kvöld... Og ekki verra þegar okkar lið vinnur svona líka glæsilega :-)