Aldís Hafsteinsdóttir

Þessa dagana æfir meistaraflokkur ÍBV handbolta hér í Hamarshöllinni. Við Jóhanna hittum þá í morgun og það var gaman að heyra hversu ánægðir þeir eru með aðstöðuna. Yfir sig hrifnir af húsinu og svo gistir hópurinn á Hótel Örk og það er nú ekki amalegt. Hamarshöllin er núna í útleigu til annarra en Hvergerðinga oft í viku og mikil ásókn í húsið. KSÍ stefnir til dæmis á að halda þar markmannsnámskeið í lok mánaðarins svo það er líka spennandi.

En ég vil endilega hvetja Hvergerðinga til að líta á æfingu hjá ÍBV en þeir verða hér fram á laugardag. Þetta er hörkulið og ekki oft sem við getum séð svona flottan handbolta hér í Hveragerði.

Hitti Fanneyju, skólastjóra Grunnskólans, í morgun. Við ræddum framhald tölvuvæðingar skólans en fjármunir eru settir til þess verkefnis á fjárhagsáætlun ársins. Undir lok árs voru keyptar 38 tölvur fyrir kennara en nú stendur til að setja þráðlaust net í skólann, eins mikið og peningurinn dugar fyrir :-) Í dag ræddum við aftur á móti nýja tegund af spjaldtölvum sem nýtast afar vel í skólastarfi. Fanney mun á næstu dögum kaupa einar 10 þannig tölvur fyrir nýbúakennslu og sérkennslu.

Á fundi bæjarráðs í morgun var samþykkt að hefja undirbúning að útboði á lagningu bundins slitlags á Bröttuhlíð (vesturhluta) og Þverhlíð. stefnt er á að framkvæmdir hefjist í apríl og ljúki fyrir frost. Sr. Jón sem býr einmitt við Bröttuhlíð er löngu orðinn leiður á að búa við einu malargötu bæjarins og sagði einhvern tíma að það væri augljóst að áður en þessi gata yrði malbikuð væri hann dauður og Guð orðinn gamall. Nú fer þessi framkvæmd í gang áður en spár hans rættust - það er nú líka eins gott :-)