Aldís Hafsteinsdóttir

Eigum við ekki að verða sammála um það að fjögurra vikna jólafrí frá bloggi sé passlegt ?

Það þarf aftur á móti einbeittan brotavilja til að byrja aftur og stefna um leið á dagleg skrif á þessa síðu.
Mér hefur satt að segja dottið ýmsilegt til hugar. Ég gæti til dæmis verið með færslu á hverjum degi um eitthvað fyndið öðruvísi eða skrítið sem gerðist þann daginn. Það er svo furðulegt að ég held að ég gæti skrifað eitthvað í þeim stíl á hverjum degi... Segir kannski meira um mig en nokkurn annan. Var líka að velta fyrir mér að skrifa alltaf eitthvað sem ég á að vera þakklát fyrir eða um eitthvað sem gladdi mig þann daginn. Kannski geri ég þetta allt saman svona smám saman en ætli ég byrji ekki á sama hátt og áður með því að láta gamminn geysa um allt það sem mér dettur til hugar. Best hefur mér fundist að halda mig við 10 mínútna blogg. Þá verð ég að vera búin að pikka inn bloggið á 10 mínútum. Það setur grensu á lengdina sem ég hef heyrt að geti orðið of mikil !

En dagurinn í dag var óvanalega tætingslegur af einhverjum ástæðum. Ýmis mál, misjöfn mjög, duttu inná mitt borð yfir daginn. Rætt var um félagsmiðstöðina, hreinsun á gólfum bókasafnsins, gatnagerð í Þverhlíð og Bröttuhlíð. Farið á flug um Drullusundið og umhverfi þess, spjallað við Ara, nýjan umhverfisfulltrúa, hádegisverður snæddur með bæjarstjóra og stjórnendateymi Grindavíkur. Spjallað við Elfu Dögg um uppbyggingaráform á Frost og funa, bæjarráðsfundur undirbúinn fyrir morgundaginn, rætt um verkfallsheimildir, sorpmál og margt margt fleira. Til mín kom líka einn ágætu íbúi að ræða hálkuvarnir og snjómokstur. Það eru ansi þykkir klakabunkarnir víða sem þýðan þessa dagana bítur illa á. EN í dag hefur þó verið þolanlegt lyngt - það er þó mikill munur frá því sem verið hefur.

Sundleikfimi síðdegis, búið er að skipta um varmaskipti laugarinnar og neysluvatnskút. Við þessa aðgerð jókst mjög vatnsmagnið í sturtunum í lauginni, það er þvílíkur munur ! Eftir sund skrapp ég á leik með meistaraflokki kvenna. Þær töpuðu naumlega fyrir Keflavík í hörkuspennandi leik. Það er hrikalega gott að æsa sig uppí rjáfur á svona leik, bætir held ég blóðrásina...