Aldís Hafsteinsdóttir

Var þátttakandi í hringborðsumræðum Morgunblaðsins sem fram fóru á Hótel Selfossi í morgun. Þar voru auk mín þau Ásgeir Magnússon, sveitarstjóri í Vík, Elvar Eyvindsson frá Rangárþingi Eystra, Eygló Kristjánsdóttir, sveitarstjóri á Kirkjubæjarklaustri, Eyþór Arnalds, formaður bæjarráðs á Selfossi og Þorgils Torfi Jónsson, oddviti á Hellu. Þarna spunnust miklar og skemmtilegar umræður um möguleika og framtíðarsýn Suðurlands ásamt alls konar umræðum um núverandi stöðu landshlutans. Öll vorum við sammála um að hér væru miklir möguleikar sem brýnt væri að vinna vel úr, virkja þyrfti frumkvæði heimamanna og styðja við frumkvöðla. Það verður gaman að sjá hvernig blaðamaðurinn moðar úr öllu því sem þarna var sagt.

Síðdegis tók síðan við annar fundur um nýjung á sviði ferðamennsku sem vel er þess virði að fylgja betur úr hlaði. Ég var boðuð til þessa fundar hjá Sambandi íslenskra sveitarfélaga þar sem ég er fulltrúi sveitarfélaganna í Ferðamálaráði. Undanfarið hefur mikil umræða skapast um ferðaþjónustu og ýmis málefni henni tengd. Í gær varð til dæmis þó nokkuð fár vegna fréttar sem Magnús Hlynur gerði uppúr erindi mínu á Ferðamálaþingi sem haldið var í liðinni viku á Hótel Heklu. Þar fjallaði ég meðal annars um gjaldtökuna í Hveragarðinum En þar hefur ferðamönnum fækkað um helming miðað við árið á undan. Aftur á móti er fjöldi ferðamanna svipaður og var árið 2011 á svæðinu og því væri kannski nær að kanna hvað gerðist eiginlega árið 2012 ? Það sem uppúr stendur er aftur á móti sú staðreynd að nú verða til tekjur í Hveragarðinum sem runnið geta til viðhalds og endurbóta og almenns rekstrar án þess að við höfum þurft að leggja út í kostnað sem ekki var fyrir. Það hlýtur að teljast jákvæð niðurstaða eftir þetta sumar.

Safnahelgi Suðurlands hófst í dag og verður mikið um að vera út um allan fjórðung. Hér í Hveragerði opnaði myndlistarsýning Sæunnar í Bókasafninu með pompi og pragt og afhjúpað var nýtt söguskilti um Kvennaskólann að Hverabökkum. Um það sáu fyrrverandi námsmeyjar skólans þær Steinunn Runólfsdóttir og Kristín Jóhannsdóttir. Þær létu ekki bítandi kuldann og rokið aftra sér frá því að afhjúpa skiltið en bæjarstjórinn var aftur á móti svo illa klæddur og krókloppinn að myndirnar sem teknar voru við þetta tækifæri eru allar hreyfðar og ómögulegar. Verðum eiginlega að endurtaka athöfnina þess vegna :-)