Aldís Hafsteinsdóttir

Heimsótti Grunnskólann í morgun. Kíkti á tvo bekki sem báðir voru ofur stilltir og áhugasamir annars vegar hjá Möggu Ísaks og hins vegar hjá Ingu Lóu. Fór eiginlega til að hitta Ármann tölvumann en nú eru starfsmenn TRS að setja upp nýju kennaratölvurnar sem bæjarstjórn samþykkti að settar yrðu upp nú nýverið. Ég gat ekki betur heyrt en að almenn ánægja ríkti með græjurnar en með þessu er gerð stórfelld bragarbót á tölvukosti skólans. Áfram verður síðan haldið á næsta ári og það vonandi fyrr en seinna en bæjarstjórn ákvað einnig að vinna að uppsetningu þráðlauss nets og að aðgengi nemenda að tölvum yrði bættur.

Ræddi einnig við Fanneyju skólastjóra um ýmislegt er varðar fjárhagsáætlunargerð næsta árs áður en ég heimsótti Guðbjörgu í mötuneytið en það geri ég alltaf ef ég kem upp í skóla. Þar eru nefnilega á þessum tíma alltaf á boðstólum nokkuð góðar veitingar - jafnvel líka fyrir LKL fólk ;-)
-----------
Við Helga unnum síðan í fjárhagsáætlun og erum að alltaf að kafa dýpra og dýpra. Þetta er ógurlega skemmtilegt þegar við byrjum á þessu, finnst mér.
-----------
Fundur síðdegis í starfshópi vegna Skólaþjónustu Árnesþings. Um næstu helgi verður auglýst eftir starfsmönnum og þá fer nú að komast endanleg mynd á þetta hjá okkur. Við teljum að verið sé að vanda mjög til undirbúnings og höfum miklar væntingar til þess að vel takist til. Á næstunni verða nokkrir fundir vegna þessa, bæði með sveitarstjórnarmönnum og skólafólkinu. Þetta er afar spennandi ferill :-)
----------
Hitti Söndru Guðmundsdóttur, formann foreldrafélags leikskólanna, á góðum fundi seinna í dag. Ræddum við þar um starf félagsins og nýjan samning milli Hveragerðisbæjar og félagsins.
-----------
Fór með vinkonunum á tónleika með Magnúsi Þór Sigmundssyni og Fjallabræðrum sem haldnir voru í kirkjunni í kvöld. Þetta voru sannkallaðir Magga tónleikar þar sem öll lögin sem flutt voru voru eftir hann. Hann er ótrúlegur listamaður og svo er hann líka svo skemmtilegur, það er frábær blanda. Þúsund þakkir fyrir gott kvöld Lionsfólk :-)