Aldís Hafsteinsdóttir

Árlegar stofnanaheimsóknir bæjarráðs frá morgni og fram eftir degi. Heimsóttum leikskólana, grunnskólann, upplýsingamiðstöðina, íþróttamannvirki, Heimilið Birkimörk, áhaldahúsið og bókasafnið. Alls staðar var okkur afar vel tekið af áhugasömum og drífandi stjórnendum og starfsmönnum Hveragerðisbæjar. Fórum á hverjum stað yfir það sem helst mætti bæta og breyta og þá sérstaklega með tilliti til fjárhagsáætlunargerðar næsta árs. Vikurnar framundan verða þétt pakkaðar vinnu við fjárhagsáætlun.

Enduðum heimsóknatörnina í Kjörís þar sem við nældum okkur í ís beint af færibandinu. Það er besti ísinn það vita þeir sem hafa prufað :-)

Þessi flotta mynd af starfsmönnum áhaldahúss verður að fá að fljóta með ...

Við Jóhanna hittum Heiðar Inga og Maríu Rún frá Cross fit Hengli síðdegis og áttum við þau mjög gott samtal um málefni stöðvarinnar sem svo sannarlega hefur slegið í gegn undanfarið ár. Hér er mikil líkamsræktarbylgja og aldeilis frábært framboð á íþróttum og alls konar líkamsrækt í bænum. Jóga, pilates, zumba, ropejóga, cross fit, tækjasalur, sund í tveimur laugum, hlaupahópur og alls konar íþróttir innan vébanda Hamars stendur íbúum hér til boða. Það er útilokað annað en að allir geti fundið sér eitthvað við hæfi. Síðan var verið að ákveða að hafa opna tíma í Hamarshöllinni fyrir fjölskyldur og einstaklinga 20 ára og eldri á þriðjudagskvöldum og skilst mér að þetta hafi mælst vel fyrir á þriðjudaginn síðasta þegar fyrsti tíminn var.

Bæjarstjórnarfundur var snaggaralegur enda verður að segjast eins og er að útsending og upptaka á fundum virðist gera það að verkum að bæjarfulltrúar ræða minna um einstök mál. Getur verið gott og stytt fundina en væntanlega breytist þetta þegar þessar nýjungar verða orðnar að venju.

Hitti vinkonurnar úr MA í Reykjavík í kvöld. Alltaf jafn gaman enda hópurinn haldið saman í rúm 30 ár. Heldur ótrúlegt :-)