Aldís Hafsteinsdóttir

Fundir dagsins voru að venju fjölbreyttir. Hittum fulltrúa frá fyrirtækinu Maintx sem kynnti fyrir okkur hugbúnað sem heldur utan um viðhald og endurnýjun mannvirkja og tækja. Áhugavert enda utanumhald vegna mannvirkja þónokkuð hjá bæjarfélaginu.

Hitti Lárus Kristinn Guðmundsson, kenndan við Hjálparsveitina, og venju samkvæmt varð okkur tíðrætt um almannavarnir og viðbúnað. Hann er einn af þremur vettvangsstjórum Hveragerðisbæjar og við vorum sammála um að skerpa þyrfti línur varðandi verkaskiptingu aðila og ákváðum að hittast í janúar til að fara betur yfir þau atriði.

Undirbúningur jólanna er á fullu í vinnunni líka og daglega opnar nýr gluggi í jóladagatali bæjarins oftast að viðstöddum börnum frá leikskólum bæjarins. Skemmtileg hefð sem festst hefur í sessi. Allir eiga að hafa fengið heim "jóladagatals yfirlitið" og þar er gerð grein fyrir ratleiknum sem við viljum endilega hvetja sem flesta til að taka þátt í.

Síðdegis fór ég og fékk Hauk frænda minn lánaðann svo ég gæti mætt á jólaföndursdag grunnskólans. Nú á ég ekki lengur barn í skólanum en ég get ekkert hætt að baka laufabrauðið okkar þarna eins og við höfum gert í ótrúlega mörg ár. Þess vegna fékk ég Haukinn lánaðann :-) Mjög gaman og líflegt eins og alltaf!

Í kvöld var síðan fundur um atvinnumál í Hveragerði sem Árni Johnsen, alþingismaður, boðaði til. Fróðlegt og skemmtilegt en þarna héldu tölu Haraldur forstjóri HNLFÍ, Birna Sif frá Ási, Jóhann Ísleifsson, garðyrkjubóndi auk mín. Fróðleg erindi um það sem efst er á baugi og í kjölfarið sköpuðust heilmiklar umræður um pólitíkina.