Aldís Hafsteinsdóttir

Enn ein helgin liðin og framundan erilsöm vinnuvika. Annars var nú mesta furða hvað afrekaðist um helgina. Laugardagurinn fór í bakstur á Sörum undir verkstjórn Laufeyjar, þvott, þrif og skreytingar auk þess sem löngu tímabærum þrifum og tiltekt í geymslunni í bílskúrnum var lokið. Helling hent þó illskeytt afbrigði af kreppusótt hafi alltaf gert mér erfitt fyrir í þeim efnum. Mér tókst af afla mér nokkurra brunasára við að rista möndlur sem núorðið er orðið að jólahefð, altså möndlurnar en ekki brunasárin...

Í gærkvöldi horfðum við mæðgur síðan á bráðskemmtilega mynd um öflugan sæðisgjafa sem kemst að því að hann á 533 börn og 142 þeirra vilja kynnast honum. "Starbuck" - mæli með henni þessari !

Sunnudagurinn hófst á gönguferð uppí Hamarshöllina þar sem nýji malbikaði göngustígurinn var prófaður í fyrsta sinn. Skemmtileg gönguleið sem klárlega er hægt að mæla með. Við vorum nákvæmlega 20 mínútur að rölta uppeftir, ef einhver hefði áhuga á að vita það :-)

Mættum Japönum á leiðinni niður eftir og við stóðumst ekki mátið að spyrja hvert þau væru að fara því okkur grunaði að leið þeirra myndi liggja inní Reykjadal. Jú, viti menn það var nákvæmlega þannig og svo sem ekki í frásögur færandi nema að daman í ferðinni var í þessum líka flottu glansandi leðurstígvélum með háum hælum!!!
Skyndilega öðluðust úrbætur á gönguleiðinni og brúargerð raunverulegan tilgang. Þau héldu auðvitað áfram för sinni galvösk ...

Eftir hádegi renndum við á Laugarvatn svona rétt að kíkja á afkvæmin sem þar dvelja við próflestur, eða við vonum það allavega :-) Þeir létu afar vel af sér drengirnir og við rétt náðum í eplaskífu kaffi á Iðjumörkinni þegar heim var komið. Þaðan var svo rokið af stað til að sjá ljósin á jólatrénu tendruð og skátarnir heimsóttir auk þess sem ég kíkti á ljósmyndasýningu Péturs Reynissonar í Gamla Hótelinu. Mjög flottar myndir.

Kvöldinu svo eytt í greinaskrif en þessi árstími fer alltaf eitthvað í það.