Aldís Hafsteinsdóttir

Nú er undirbúningur fyrir SASS þing í fullum gangi en fundurinn hefst í fyrramálið austur á Hellu. Héðan fara í þetta sinn 5 fulltrúar svo það er fullmannað.

Fundargögnin væru gríðarstór stafli ef þau hefðu komið útprentuð eins og áður hefur verið en nú er treyst á tæknina og allt sett á læsta vefgátt. Bráðsniðugt en maður þarf aðeins að venja sig á ný vinnubrögð við að glósa þegar ekki er hægt að krota í gögnin.

Í kvöld hittumst við Unnur og Róbert til að fara yfir tillögur og efni fundarins. Þetta er stór og mikill fundur og margt sem þarf að ákveða. Til dæmis verður tekin til umfjöllunar tillaga um sameiningu SASS og Atvinnuþróunarfélagsins sem vaæntanlega verður samþykkt. Aðgerð sem verið hefur í umræðunni í mörg ár og nú er komin til framkvæmda.

Í dag hittum við Helga fulltrúa frá Vodafone og fórum við yfir ýmis atriði varðandi símamál bæjarfélagsins, það er mikill frumskógur en þar má alltaf gera betur og hagræða.

Dagurinn hófst aftur á móti með fundi í bæjarráði þar sem helsta málið var samþykkt viðauka við fjárhagsáætlun til að mæta breytingum sem orðið hafa í rekstri stofnana á árinu.

Fór í tvígang uppí Hamarshöll í dag en þar er nú búið að planta hundruðum trjáa í gríðarmikið belti sem til framtíðar á að mynda þar þéttan skóg. Nú verður áskorunin fólgin í því að halda þessum sprotum á lífi. Innandyra er frágangi boltagólfs að seinka og erum við ekki par hrifin af þeirri staðreynd. Vonuðumst til að húsið yrði tekið í notkun ekki seinna en 1. nóv. en nú er spurning hvort að að takist. Inni í húsinu voru í dag um 20 gráður svo það var ansi notalegt í samanburði við napurt veðrið utandyra.

Þriðja skiptið í vikunni í sund, en nú hljóðar dagskráin uppá fjórar sundferðir í viku að lágmarki. Skriðsundsnámskeiðið var hrein snilld svo við sömdum við Magga Tryggva sem nú stýrir æfingum í hópnum góða tvisvar í viku. Þetta er alveg ótrúlega skemmtilegt :-)