Aldís Hafsteinsdóttir

Löngu komin heim frá Bosníu Herzegóvínu og verið nóg að gera síðan.

Rétt samt að segja að kosningadagurinn hófst fyrir allar aldir í Sarajevo en við vorum mætt á kjörstað áður en opnað var með pompi og pragt og yfirlýsingu um allt væri rétt undirbúið og sýningu á tómum kjörkössunum. Í það stóra heila fór allt vel fram á flestum stöðum. Það eru auðvitað annmarkar þarna eins og víða er og sá stærsti að mati eftirlitsins var að kjörstjórnir væru pólitískt skipaðar. Mér varð auðvitað hugsað til okkar kjörnefnda hér á fróni sem allar eru skipaðar af pólitískum flokkum en sveitarstjórnir velja hér fólk í kjörnefndir. Það þykir ekki góð latína útí hinum stóra heimi. Annað sem vakti athygli mína var að þarna gátu þeir sem þurfa aðstoð í kjörklefa valið sér aðstoðarmann en viðkomandi aðili mátti skv. lögum eingöngu aðstoða 2 aðila við að kjósa. Hér erum við búin að lögfesta þennan rétt en án þessa fyrirvara um fjölda þeirra sem einn aðili getur aðstoðað. Held það væri ráð að koma því ákvæði inní lögin.

En ég myndaði teymi með Stewart Dickson frá Írlandi og fórum við um 150 km norður af Sarajevo og heimsóttu kjörstaði allan daginn. Það var mjög fróðlegt enda aðstæður víða með allt öðrum hætti en við eigum að venjast. Hvert teymi var með bílstjóra og túlk svo við gátum allst staðar átt samskipti við heimamenn sem hvarvetna tóku okkur vel. Hvergi þó jafn vel og í smábænum Lapsunj þar sem allir pólitískur flokkarnir og kjörnefndin undribjuggu í sameiningu grill á lóðinni þar sem heilt lamb með haus og hala hringsneríst yfir opnum eldi. Þarna var alvöru fjör í vændum....

Síðasta daginn var haldinn fjölsóttur blaðamannafundur en að honum loknum fóru fulltrúarnir að týnast heim nema ég sem fékk ekki flug alla leið fyrr en daginn eftir. Gat því nýtt síðdegis í að skoða Sarajevo sem er afskaplega falleg borg. Fékk skemmtilega fylgd túlks og bílstjóra sem fyrir lítinn pening tóku að sér að sýna mér borgina og marga merka staði. Ógleymanlegt að heimsækja "war tunnel" sem eru göng sem grafin voru undir flugvöllin í Sarajevo í stríðinu en þau tryggðu einu tengsl borgarinnar við umheiminn í umsátrinu sem stóð í rúm 3 ár.

Eftir þessa ferð erum við Lárus harðákveðin í að heimsækja Bosniu síðar og keyra um landið. Er með fallegri stöðum sem hægt er að heimsækja og ekki spillir verðlagið fyrir...