Aldís Hafsteinsdóttir

Afar skemmtileg og viðburðarík helgi að baki. Gæðabíóstund á föstudagskvöldið þar sem við horfðum á Shawshank redemption. Við erum í sameiningu familían að rifja upp góðar og gamlar myndir og þessi fylgir í kjölfar Forrest Gump um síðustu helgi. Það er ekkert skrýtið þó Shawshank toppi listann yfir bestu myndir sögunnar. Tilnefnd til 7 Óskarsverðlauna en vann engin enda Forrest Gump sýnd á sama ári og sú mynd hirti flest verðlaunin!
------
Opnu hús Sjálfstæðismanna á laugardagsmorgnum eru byrjuð aftur og í gær kíkti Ragnheiður Elín, þingmaður, til okkar. Gott að byrja helgina með þessum hætti og ekki spillti fyrir að Eyþór bakaði vöfflur :-)
-----------
Við frænkurnar Hafrún og Vigdís tókum upp "allar" kartöflurnar í garðinum á Heiðmörkinni. Það var óskaplega skemmtilegt enda Vigdís sem er bara 2 ára mjög upptekin af þessum skrýtnu kúlum sem komu uppúr moldinni, "Nei, sko..." var orðatiltæki dagsins.
-------------------
Síðdegis á laugardeginum fór ég svo ásamt Guðrúnu systur og hennar fólki uppí Gýgjarhólskot þar sem við áttum bráðskemmtilega kvöldstund með heimilisfólkinu. Setið og spjallað fram á nótt. Við systur vorum síðan ræstar með látum um morguninn enda dagurinn tekinn snemma í Kotinu, eðli máls samkvæmt. Vorum komnar í Tungaréttir uppúr hálf níu og mikið óskaplega var það gaman. Ég tel mig hafa sýnt algjörlega óþekkta takta og dró fé af miklum móð. Hef til sönnunar óteljandi marbletti á lærum og leggjum og orð Eiríks um að hann héldi svei mér þá að ég hefði gert gagn. Það er mikið hrós :-) Eftir söng og spjall við skemmtilegt fólk í réttunum var riðið með safnið heim að Gýgjarhólskoti. Ég og Brúnki vorum bara nokkuð góð þó núna geti ég varla setið eftir reiðtúrinn í dag! Guðaveigar og frábær félagsskapur, yndislegt veður og enn fallegri náttúra. Hvers getur maður óskað sér meira! Það er Guðrún systir sem á heiðurinn af myndunum enda var ég upptekin :-)

Fáir mættir svona snemma morguns, en þess mun meira fé.

Við Skírnir að draga.

Þarna var manni orðið ansi heitt enda komin með uppbrettar ermar á lopapeysunni :-)

Haukur og Svava voru hliðverðir.

Jón Hjalti og Eiríkur í þungum þönkum.

Nestistími.

Safnið á leið upp í Kot. Yndislegt veður og fjallsýnin stórkostleg.

Riðið í hlað með Jóni Karlssyni.

Hafsteinn hennar Guðrúnar fór með mömmu sína eina ferð á sexhjólinu og hikaði ekki við að keyra í drulluna !