Aldís Hafsteinsdóttir

Góð helgi, Blómstrandi daga, að baki. Rjómablíða á laugardeginum gerði upplifun gesta og bæjarbúa einstaka og verður almættinu seint fullþakkað fyrir góðvild sína þann daginn. Allar myndirnar sem ég tók þessa helgi eru komnar á facebook síðu Hveragerðisbæjar sem ég vil hvetja ykkur til að "líka við" svo að þið sjáið tilkynningar og myndir sem þar verða birtar. Viljum endilega hafa sem allra besta upplýsingagjöf til þeirra sem áhuga hafa á slíku og facebook síðan er liður í því. Verst að þetta er allt saman svo ansi tímafrekt en góð aðstoð fékkst í facebook´ið sem var afar vel þegin!

Vígsluhátíð Hamarshallar tókst afar vel og var gaman að sjá ánægjuna og gleðina yfir mannvirkinu sem skein af hverju andliti. Ég get ekki heyrt annað en að mikill meirihluti bæjarbúa sé ánægður með framkvæmdina en auðvitað heyrast enn einhverjar efasemdar raddir, áttum ekki von á öðru!
--------------------------------

Nú er svo langt síðan síðast að ekki verður reynt að týna til nokkuð af því sem í millitíðinni hefur gerst. Gott sumar er að renna sitt skeið og haustið er svona örlitið farið að láta á sér kræla. Sveppatíminn er í algleymingi og annar eins hellingur af berjum hefur ekki lengi sést hér sunnan heiða. Húsmæður illa haldnar af kreppusótt sulta, frysta, merja og pressa sem aldrei fyrr og allar kyrnur að verða fullar af hollustu úr íslenskri náttúru, það er líka fátt yndislegra :-)
Sonurinn, sá yngsti, var skilinn eftir á Laugarvatni í gær. Hann ætlar að spreyta sig við ML í vetur. Nýnemum var tekið með kostum og kynjum og greinilegt er að mikið ævintýri er í vændum fyrir þetta unga fólk á þessum fallega stað. Á myndinni erum við Þorbjörg með vinunum og herbergisfélögunum Magnúsi Baldvin og ALberti, þeim fannst þessi myndataka ekki mjög fyndin ;-)
------------------------------

Fundur í Héraðsráði Árnesinga á Borg í Grímsnesi í dag, aðalumfjöllunarefnið var nýjar samþykktir, Minjasafnið á Gröf og haustfundur Héraðsnefndar sem við ákváðum að yrði á Eyrarbakki svo nefndarmönnum gæfist færi á að skoða Húsið og Kirkjubæ hinn nýkeypta.

Átti fundi í dag með aðilum sem lýst vel á að staðsetja hér markað. Það verður spennandi að sjá hvað verður úr því. Ung stúlka kom í heimsókn að ræða málefni Tónlistarskólans, það var skorinort erindi sem hún ætlar að fylgja betur eftir. Simmi á Sunnlenska kom og tók viðtal við mig uppí Hamarshöll fyrir Sunnlenska.

Enn nóg eftir af deginum og skriðsundsnámskeið á eftir....

Má til að leyfa ykkur að sjá þessa skondnu frétt af vefnum dfs.is. Hann Lárus minn er nú ekki alveg í lagi ;-)
EN mikið svakalega er Glæsigatan flott!