Aldís Hafsteinsdóttir

Málflutningur Orkuveitunnar í dag hefur verið með hreinum ólíkindum. Það er merkilegt að íbúar á höfuðborgarsvæðinu og við hér í Hveragerði skulum að þeirra mati eiga að umbera mengun sem mælist of oft yfir viðmiðunarmörkum í 5 ár á meðan þar á bæ er unnið að tilraunastarfsemi sem nú er á byrjunarreit. Hvers vegna eru þessar tilraunir ekki löngu hafnar? Hvaða tryggingu hafa íbúar fyrir því að við lendum ekki aftur á byrjunarreit eftir 5 ár? Fjármunirnir sem hingað til hafa verið settir í mengunarvarna verkefni eru hreinir smáaurar í samanburði við það sem virkjunin kostar.

Fékk símtal í morgun frá lækni sem benti mér á að í raun ættu þeir sem búa við aukna mengun af hvaða tagi sem hún er að auka inntöku á magnesíum og joði þar sem þessi efni styrkja "mengunarvarnir" líkamans. Finnst sjálfsagt að koma þessari ábendingu áfram.

Ræddi við Ólaf framkvæmdastjóra Heilsustofnunar um sameiginleg verkefni. Enduðum samtalið á að ræða um "stóra bekkjamálið" en kvörtunum hefur rignt yfir bæjarskrifstofuna vegna bekkjar sem er fyrir framan bílastæði HNLFÍ þar sem dvalargestir sitja og reykja þar sem nú er ekki lengur leyft að reykja á lóð eða í húsum stofnunarinnar. Bæði nágrannar og vegfarendur hafa af reykingunum mikinn ama fyrir nú utan það að með þessu sýnir stofnunin ekki sýna bestu hlið. Svona smávægileg mál geta oft tekið ómældan tíma !

Fundur í samráðshópi um Evrópusambands umsóknina í dag. Þar fór Auðunn Atlason, ráðgjafi ráðherra í Evrópumálum yfir stöðuna í samningaviðræðunum en kosningar næsta vor setja óneitanlega spurningamerki um það vinnuferli sem nú er í gangi. Anna Guðrun Björnsdóttir frá Sambandinu fór yfir byggðastefnu ESB.   2007-2013 eru settar 347 milljarðar Evra til Byggðamála sem er um það bil helmingur af framlögunum sem ríkin greiða til ESB. Framlög til landa eru mjög mismunandi Danir fá til dæmis 15,9 EUR í styrki á meðan að Eistar fá 373 EUR.  Það er ekki sjálfgefið að koma út í plús þegar framlög inní ESB og styrkir frá ESB eru teknir saman. En fundurinn í dag var afar fróðlegur eins og þessir fundir reyndar alltaf eru.

Keyrði beint austur á Selfoss til að vera við vígslu björgunarmiðstöðvar Árborgar. Glæsilegt hús en bílaflotinn vakti ekki síður athygli. Fulltrúar á höfuðborgarsvæðinu höfðu á orði að þetta væri mun stærri floti en hjá þeim! Virkilega skemmtileg samkoma og fjölmargir skemmtilegir gestir á staðnum.

Svaraði tölvupóstum og setti fréttir á heimasíðuna þegar heim var komið og enn og aftur ekki farið úr vinnunni fyrr en undir 8 þrátt fyrir öll góð áform um annað !