Aldís Hafsteinsdóttir

I´m back at last !

Búin að vera í 10 daga henni Ameríku og betri helmingurinn orðinn fimmtugur eins ótrúlegt og það nú er! Bandaríkin sýndu sínar bestu hliðar og skipulagið á road tripínu frá Boston til New York, upp til Hartford og Wethersfield í Connecticut, Niður til Mystik við ströndina út á Þorskhöfða (Cape Cod) og endað á afar skemmtilegum hestabúgarði utan við Boston. 15 söfn, garðar og sýningar svo þetta var svo sannarlega ferð á la Aldís :-)

Jú víst þótti Lárusi líka gaman, við heimsóttum til dæmis fyrsta kjarnorkuknúna kafbátinn, Titanic sýningu og sýninguna "Bodies" í NY.
Ekki bara rósagarða, semsagt :-)
---------------------------
En það var mætt í vinnu á mánudaginn og það er svo sannarlega nóg að gera. Dagarnir fljúga áfram og alltaf er nóg á verkefnalistanum.

Í dag var unnið að undirbúningi bæjarstjórnarfundar sem haldinn var síðdegis. Heilmikið stúss í kringum það. Hingað kom Eva Marín Hlynsdóttir sem vinnur að doktorsverkefni um áhrif sveitar- og bæjarstjóra á stjórnsýslu. Það var skemmtilegt spjall. Mér finnst alltaf gaman að taka þátt í svona verkefnum og ræða um starfið ýmislegt sem að því snýr. Hingað komu síðdegis Elsa og Stella frá Heilbrigðiseftirliti Suðurlands og Þorsteinn frá Umhverfisstofnun til að ræða brennisteinsvetnis mælingar og niðurstöður undanfarinna mánaða. Ljóst að mengun hér er á tímabilum meiri en æskilegt er. Merkileg tilviljun að í dag skuli Orkuveitan einnig halda ársfund sinn og boða þar að fyrirtækið muni óska eftir breytingu á reglugerð um brennisteinsvetnismengun með það fyrir augum að reglugerðin taki ekki að fullu gildi fyrr árið 2019 eða 5 árum síðar en ráðgert er. Slíkt er algjörlega óásættanlegt og við munum berjast af fullu afli gegn þeim áformum. Höfum reyndar fyrir margt nokkru hafið þá vinnu því það var nokkuð ljóst í vetur að OR myndi reyna þetta þar sem enginn árangur hefur náðst í að beisla brennisteinsvetnið frá Hellisheiðarvirkjun.

Fréttamenn komu hingað í kvöld frá RÚV til að taka viðtal vegna þessa og það sama gerði Morgunblaðið. Hefði ekki átt að fara í litun hjá henni Ólöfu í hádeginu. Þá daga vill maður helst ekki vera úti við og hvað þá lenda í sjónvarpsviðtali, seinheppin alltaf ;-)