Aldís Hafsteinsdóttir

Annasamir dagar að baki. Í gær byrjaði dagurinn á vægu áfalli þegar ég sá forsíðu Sunnlenska þar sem mælt var með lyfjagjöf fyrir Hvergerðinga og með fylgdi mynd af mér! Ég er auðvitað ekki læknir og myndi aldrei mæla með lyfjagjöf fyrir einn eða neinn enda var viðtalið við Hallgrím lækni. Myndbirtingin í hæsta máta undarleg! En það getur sjálfsagt ekki skaðað að bæta vítamínbúskapinn. Tilefni fréttarinnar var auðvitað athugaemdin á blogginu mínu þar sem ég sagði frá viðtali mínu við Hallgrím. Bloggið hefur greinilega áhrif :-)

Guðmundur Garðarsson, frá Þorlálshöfn, kom í heimsókn en hann er að hefja rekstur á fjarstýrðum bílum á Tívolí lóðinni. Það er örugglega bráðsniðugt og gaman að prófa það. Um næstu helgi verður semsagt hægt að leigja sér fjarstýrðan bíl og geysast með hann yfir hóla og hæðir. Á örugglega eftir að verða vinsælt. Held alveg örugglega að fótbolta golfvöllur hafi nýlega verið opnaður á Hótel Örk, það er líka afskaplega sniðug afþreying. Undanfarið hef ég fengið þónokkrar fyrirspurnir varðandi ýmsar nýjungar og það verður spennandi að sjá hvað verður að veruleika af því.

Dagurinn í gær var ansi erilsamur og gríðarlega mikið að gera. Heilmikið stúss í kringum Blóm í bæ og endaði dagurinn á því að við Sigurbjörg systir reittum arfa í beðunum í Listigarðinum fram undir miðnætti. Sjálfboðaliðakvöldið var fámennt en góðmennt, það hefði þurft að hringja í fólk til að ná því út. En annars eru flestir önnum kafnir í sínum eigin garði því enginn vill láta það spyrjast um sig að umhverfi heimilisins eða fyrirtækisins sé ósnyrtilegt þegar alls staðar er orðið svona fínt.

Bæjarráðsfundur í morgun þar sem Ninna Sif var kjörin nýr formaður. Nokkur mál á dagskrá meðal annars var samþykkt að heimila staðsetningu söluskála við Hengladalaá. Spennandi að fylgjast með því. Einnig var áveðið hverjir hlytu viðurkenningu fyrir fegursta garðinn. Nöfnin eru komin á heimasíðu Hveragerðisbæjar. Garðaskoðunin er á sunnudag milli kl. 16 og 18, ekki missa af því.

Grill fyrir alla sem koma að sýningunni í kvöld. Lárus ásamt konunum á Garðyrkjuskólanum grilaði lambasteik sem rann ljúflega ofan í mannskapinn. Það er mikil stemning í hópnum og ég get ekki annað séð en að allir séu ánægðir þátttakendur jafnt sem áhorfendur.

Setningin á morgun kl. 14, Steingrímur J. Sigfússon, landbúnaðarráðherra, setur hátíðina.