Aldís Hafsteinsdóttir

Langur og viðburðarríkur dagur ...

Í morgun fór ég yfir tölvupóst og sinnti símtölum sem höfðu setið á hakanum. Undirbjó síðan fundarboð bæjarráðs sem fór út síðdegis í dag. Þar í eru minnisblöð um skipan starfshóps sem vinna á að undirbúningi garðyrkju- og blómasýningarinnar en nú viljum við gjarnan virkja breiðari hóp fólks til þátttöku. Ennfremur er þar minnisblað frá menningar- og frístunda fulltrúa vegna atvinnulífssýningarinnar Suðurland - Já takk sem halda á í ráðhúsi Reykjavíkur í mars. Það er mikilvægt að atvinnulífið í Hveragerði nýti þetta tækifæri til að kynna starfsemi sína fyrir höfuðborgarbúum. Viðtal við íbúa eftir hádegi og kl. 15:30 hófst fundur sem við Ninna Sif höfðum óskað eftir með foreldraráðum og foreldrarfélagi leikskólanna. Afskaplega góður fundur þar sem við fórum vel yfir forsendur rekstrar á skólunum og þær hugmyndir sem uppi voru um hagræðingu þar. Að öllum líkindum er fundin lausn á því máli sem allir geta fellt sig við.

Eftir fundinn undirbjó ég veislustjórn kvöldsins en ég hafði tekið að mér að stjórna fagnaði Zonta kvenna á Suðvesturhorninu sem haldinn var að Hótel Hlíð. Kvöldið varð síðan mjög skemmtilegt. Afskaplega skemmtilegar konur og góð dagskrá. Takk fyrir gott kvöld, kæru vinkonur !