Aldís Hafsteinsdóttir

Ástæða bloggleysisins er Berlínar ferð sem farin var núna í upphafi vikunnar. En þar var ég fulltrúi Sambands íslenskra sveitarstjórnarmanna á ráðstefnu evrópskra sveitarstjórnarmanna. Við fórum tvær á fundinn ég og alþjóðafulltrúi Sambandsins, Anna Guðrún Björnsdóttir. Fundurinn var afar fróðlegur en hann byrjaði með fyrirlestrum og umræðum um fall Múrsins og afleiðingarnar sem það hafði í för með sér. Einnig voru áhugaverðir fyrirlestrar um sveitarstjórnarmál í fyrrum Ráðstjórnarríkjunum en þar þurfti hreinlega að finna upp hjólið þar sem sveitarstjórnarstigið var ekki til í þessum löndum áður. Það var einnig fróðlegt að hitta svona marga sveitarstjórnarmenn og finna að alls staðar er glímt við sömu verkefnin. Kreppan snertir ekki einungis okkur hér á Íslandi heldur einnig aðrar þjóðir sem nú glíma einnig við skertar tekjur og aukin útgjöld sérstaklega til velferðarmála. Annars var kosið á fundinum um nýjan framkvæmdastjóra Samtakanna og það var óneitanlega upplifun. Kanditatarnir um starfið þurftu að halda ræður fyrir hópinn og voru síðan spurðir útúr af viðstöddum áður en gengið var til atkvæða um það hvor yrði fyrir valinu. Kosningin fór 46-46 svo þar þurfti að kjósa aftur þá vann Frakkinn 47-45. Aumingjans mennirnir biðu í bakherbergi á meðan og síðan kom annar fram sem sigurvegari en hinn yfirgaf svæðið.

Í svona ferðum gefst ekki mikill tími til annars en að sitja fundi en við náðum nú samt að kíkja á jólamarkaði í borginni en Þjóðverjar eru þekktir fyrir jólamarkaðina sína. Yndisleg hefð því það er fátt jólalegra en að sitja úti með glögg og brenndar möndlur og fylgjast með mannlífinu.

Í dag fimmtudag var bæjarráðsfundur þar sem fjárhagsáætlun var lögð fram og rædd. Henni var síðan vísað til bæjarstjórnar en fyrri umræða fer fram eftir viku. Í hádeginu hitti ég Vinnumarkaðsráð Suðurlands sem í þetta skipti fundaði hér í Hveragerð. Hér eru í dag 107 einstaklingar án atvinnu en einhver hluti þeirra er í hluta starfi. Þetta er um 8% af vinnuaflinu. Of mikið engin spurning en núna eru framundan þungir mánuðir í skammdeginu hvað vinnu varðar. Verðum að vona að ástandið lagist þegar líður á árið 2010. Síðdegis var fundur í Almannavarnaráði Árnessýslu þar sem við unnum í áhættugreiningu fyrir svæðið. Einn fundur enn og þá lýkur þessu verki.

Í kvöld ristuðum við Albert möndlur eftir uppskrift sem við fundum á internetinu, svei mér ef þær eru ekki alveg jafngóðar og á jólamarkaðnum í Berlín ...