Aldís Hafsteinsdóttir

Á föstudaginn skrapp ég í kaffi útí Kjörís en þar fór fram súkkulaðiköku keppni milli Tona og Betu. Þau höfðu greinilega lagt sál sína í baksturinn þannig að smökkun samstarfsmanna var afar fagleg og atkvæði greidd samviskusamlega. Beta sigraði með dýrindis franskri súkkulaðiköku en Tona fannst nú reyndar að taka hefði átt tillit til verðs hráefnis en þá hefði hann unnið ;-)

Eftir hádegi var framhaldsaðalfundur Sorpstöðvar Suðurlands haldinn á Þingborg. Þar tókst að klára þau mál sem tekin voru fyrir í góðri einingu aðildarsveitarfélaganna. Enn stendur þó útaf samningur milli Sorpstöðvarinnar og Sorpu vegna urðunar Hvergerðinga, Flóamanna og Skeiða- og Gnúpverja á Álfsnesi. Þar hefur okkur ekki enn tekist að ná sáttum vegna þess aukaálags sem til stendur að leggja á þau sveitarfélög sem mest flokka. Hvers vegna okkur er gert að borga langt umfram aðra er erfitt að skilja. Þessi mál skýrast í næstu viku enda eins gott þar sem urðun verður hætt á Kirkjuferjuhjáleigu þann 1. desember.

Opið hús hjá Sjálfstæðismönnum fyrir hádegi í gær, laugardag. Þar viljum við endilega sjá sem flesta enda gefst þarna gott tækifæri til að koma á framfæri athugasemdum við bæjarfulltrúana en alltaf mæta einhverjir þeirra og oftast allir.
Blaðstjórn sat eftir opna húsið og skipulagði jólablaðið sem Sjálfstæðisfélagið gefur út árlega. Það stefnir í að verða stórt þetta árið...

Í gær viðraði vel til útivistar og því var það sem eftir lifði af dagsbirtu notað til garðvinnu. Þetta er nú alveg einstakt að vera enn að dytta að garðinum og það er að koma desember! ! Tókum líka smárúnt til að skoða það sem unnið hefur verið að undanfarið í bæjarfélaginu. Skoðuðum framkvæmdirnar við hlið Óskalands en þar er nú kominn myndarlegur hóll og göngustígar þvers og kruss yfir óræktarsvæði sem áður var til engra hluta nytsamlegt. Þetta verður fallegt svæði þegar trén taka við sér. Skoðuðum líka nýja Búmanna hverfið sem er orðið afskaplega snyrtilegt enda er þar búið að helluleggja allar gangstéttar og stíga og tyrfa græn svæði. Unnið er að lokafrágangi 26 íbúða og lítur þetta afar vel út. Restin verður kláruð að utan en innrétting látin bíða. Það er gaman að skoða þessa framkvæmd og hvet ég sem flesta til að gera það enda er allt annað að labba um á milli húsanna heldur en að skoða svæðið út um bílgluggann...

Í dag sunnudag hittist meirihlutinn og fór yfir fjárhagsáætlun. Tók það drjúgan tíma eins og gefur að skilja. Í ár þarf ekki að eyða löngum tíma í að ákveða fjárfestingar og framkvæmdir því fjárhagurinn gefur ekki mikið svigrúm í svoleiðis lagað á næsta ári. Aftur á móti fór drjúgur tími í að reyna að skera niður enda er það nauðsynlegt eins og nú árar.