Aldís Hafsteinsdóttir

Af fótbolta, bæjarferð og heimajarðgerð ...

Í morgun var fundur með forsvarsmönnum knattspyrnudeildar en starfið þar er með allra mesta móti núna. Mikill hugur er í mönnum og stefnan tekin á bætt og aukið barna og unglingastarf. Aðstaða deildarinnar mætti vera betri en við fórum rækilega yfir allt sem snýr að henni og hvað er til ráða. Þurrkarnir að undanförnu hafa leikið fótboltavellina grátt og nauðsynlegt að taka umhirðu og umgengni við vellina fastari tökum en verið hefur. Það gengur auðvitað ekki að verið sé að nýta vellina sem spyrnu brautir fyrir fjórhjól, vélsleða og jafnvel bíla. Fótboltavellirnir eru heldur ekki ætlaðir sem viðrunarsvæði fyrir hunda en sést hefur til fólks sem sleppir hundum sínum á vellina með tilheyrandi sóðaskap. Hér getum við öll gert betur og fylgst betur með því sem fram fer á völlunum. Mjúkhýsið bar einnig á góma en enn hefur Brunamálastofnun ekki gefið svar varðandi framkvæmdina. Aftur á móti er byrjað að grafa fyrir aðstöðuhúsinu svo það mun rísa á þessu ári.
Eins og ég sagði áðan var á fundinum farið vítt og breytt yfir hin ýmsu málefni, fundarmenn voru afar sáttir að honum loknum og við ákváðum að hittast aftur í ágúst og taka þá upp þráðinn að nýju.
-------------------------
Eftir hádegi var farið til Reykjavíkur til að útrétta en meðal annars þarf að finna nýja skápa á skrifstofu bæjarstjórans þar sem þeir sem fyrir voru skemmdust í skjálftanum.
-------------------------
Í kvöld var síðan námskeið fyrir bæjarbúa í heimajarðgerð sem Elfa Dögg stóð fyrir. Gaman var að sjá hversu auðvelt það er í raun og veru að jarðgera lífrænan úrgang og fengum við mörg góð ráð hjá Elfu sem án efa eiga eftir að nýtast vel.