Aldís Hafsteinsdóttir

Fimmtudagur í rólegri kantinum....

Dagurinn byrjaði á stuttum fundi þar sem við Eyþór fórum yfir nokkur skipulagsmál áður en við hittum forsvarsmenn Eyktar til að fara yfir deiliskipulagið að Sólborgarsvæðinu sem nú er á lokastigi. Fundur verður í skipulags- og bygginganefnd næsta þriðjudag þar sem skipulagið verður að öllum líkindum samþykkt og vísað til bæjarstjórnar. Samþykki bæjarstjórn deiliskipulagið er það sent til Skipulagsstofnunar sem fer yfir það hvort öllum formsatriðum hafi verið fullnægt og öllum athugasemdum svarað. Að því loknu öðlast skipulagið samþykki. Á fundinum í morgun kom fram að framkvæmdir munu ekki hefjast á Sólborgarsvæðinu á þessu ári en unnið verður í hönnun gatnakerfis og vinnslu útboðsgagna. Ennfremur þarf að ákveða áfangaskiptingu verksins sem er afar stórt og viðamikið. Það er enda ekki lítið sem ráðist er í þegar byggja á 2200 manna hverfi.

Komst síðan að því í dag að Sólborgarsvæðið heyrir ekki undir Hveragerðissókn heldur Kotströnd samkvæmt skilgreiningu á sóknum hér á svæðinu. Það er nýtt fyrir okkur að Hvergerðingar skuli ekki sækja til sömu sóknar. En svona er þetta víst.
-------------------------
Fékk fyrir hádegi kynningu á skemmtilegu verkefni varðandi heimasíðunotkun og breytt viðmót á netinu. Gaman að því en það er enginn efi í mínum huga að við eigum að efla netið enn frekar sem upplýsingamiðil bæði fyrir heimamenn sem og ferðafólk. Nú eru komnar inn á heimasíðu Hveragerðisbæjar upplýsingar fyrir ferðafólk á dönsku, ensku og pólsku. Áfram verður unnið í því að auka þessar uppýsingar og samræma á milli síðna.
------------------------
Nokkuð er spurt um hinar nýju stöður sem auglýstar hafa verið en það Capacent sem sér um ráðninguna og því er öllum sem hafa samband bent á að ræða við fulltrúa þess ágæta fyrirtækis.
------------------------
Ég var að lesa bloggfærslu ákveðins Hvergerðings áðan og undraði mig á því viðhorfi sem þar kom fram gagnvart sveitarstjórnarmönnum í Hveragerði, en rætt var fjálglega um úlfúð og illindi í bæjarstjórnarhópnum. Því þykir mér rétt að það komi fram að undanfarna mánuði hefur ríkt mikil eining og samstaða í bæjarstjórn og unnið er af heilindum að málum af hálfu bæði minnihluta og meirihluta.
Við erum samstíga í flestum málum eins og vera ber en ósammála um önnur eins og eðlilegt er í pólitísku starfi. Það verður aldrei þannig að það ríki rjómalogn og blíða á öllum fundum í bæjarstjórn enda situr þar fólk með miklar skoðanir og ríka sannfæringu á því hvað er bæjarfélaginu fyrir bestu. En að tala um úlfúð og illindi er mikil rangtúlkun á því starfi sem nú fer fram í bæjarstjórn Hveragerðisbæjar.
----------------------------
Þar sem ég sat hér heima að bíða eftir að andinn kæmi yfir í ræðuskrifum vafraði ég aðeins um veraldarvefinn og alltaf rekst maður á eitthvað skemmtilegt þar. Sá í gær að Hjálparsveit skáta í Hveragerði heldur þar úti stórskemmtilegri síðu þar sem meðal annars má finna frábærar myndir úr starfi sveitarinnar í gegnum tíðina. Gaman að sjá þar kunnugleg andlit í alveg nýju ljósi.
En hér eru tvær myndir sem ég nappaði af síðunni. Þarna má sjá hvernig brúin yfir Varmá leit út áður en ræsið var sett og á hinni er fróðlegt að sjá breytinguna á miðbænum, íþróttahúsið hálfbyggt og sjoppan góða við endann á Hverakaups húsinu er kunnugleg.....