Aldís Hafsteinsdóttir

Opin hús, íþróttamannvirki og hreingerningar ....

Opin hús Sjálfstæðismanna hófust aftur eftir jólafrí núna um helgina. Þetta er skemmtilegur vettvangur til að koma sjónarmiðum sínum á framfæri og nýta bæjarbúar sér það óspart. Stundum erum við skömmuð útí eitt en oftar er fólk þó ánægt og kemur með hugmyndir sem er lang skemmtilegast. Við hvetjum nýja Hvergerðinga til að mæta enda er þetta góður vettvangur til að kynnast fólki og bæjarlífinu almennt.

Eyddi fyrri parti sunnudagsins í vinnunni og lagði línur fyrir verkefni sumarsins. Það þarf nauðsynlega að bretta upp ermar og setja í fluggírinn eigi þetta allt að nást. Við ætlum að byggja aðstöðuhús fyrir fótboltaiðkendur við Grýluvöll og munum ég og Pétur Ingvars funda með arkitektum á þriðjudag. Hönnunarvinnan á ekki að taka langan tíma, en deiliskipulagsbreytingin hefur þegar verið sett í gang. Þegar hún liggur fyrir þarf að fjalla um hana í skipulags- og byggingarnefnd og síðan að auglýsa breytinguna áður en hægt er að byrja framkvæmdir. Við bíðum núna endanlegs svars Brunamálastofnunar varðandi mjúkhýsi sem við höfum hug á að reisa við Grýluvöllinn. Það er margfalt ódýrari lausn heldur en hallirnar sem risið hafa að undanförnu og hefur síðan þann kost að vera upphitað þannig að hlýtt og notalegt er þar inni. Við vonumst til þess að Brunamálastofnun svari fyrir janúar lok svo hægt sé að halda málinu áfram nú eða að hugsa það uppá nýtt...

Síðdegis skemmti ég mér síðan konunglega ásamt krökkunum við að taka til í bílskúrnum. Hann er auðvitað nýr og flottur svo það er ennþá gaman að raða og gera fínt. Ég villtist líka til að sjá tvo þætti af Allt í drasli á Skjánum um helgina og fylltist hreingerninga brjálæði í kjölfarið...