Aldís Hafsteinsdóttir

Af fasteignaviðskiptum ...

Í dag var gengið frá kaupum bæjarins á Austurmörk 20 en ætlunin er að áhaldahús bæjarins flytji þangað inn á árinu. Einnig var gengið frá sölunni á slökkvistöðinni en slökkviliðið mun flytjast í nýtt húsnæði einnig að Austurmörk 20 á vormánuðum. Af óviðráðanlegum orsökum frestaðist fundur þar sem átti að ganga frá kaupum Hveragerðisbæjar á Ullarþvottastöðinni að öðrum kosti hefði þetta án vafa orðið alstærsti dagur bæjarins hvað fasteignaviðskipti varðar. Þetta er heilmikið átak og framundan eru framkvæmdamánuðir við innréttingu nýrrar slökkvistöðvar, áhaldahússins og ekki síst niðurrif Ullarþvottastöðvarinnar. Ásýnd bæjarins mun breytast mikið þegar það hús hverfur af sjónarsviðinu en lítill sómi er að þeirri byggingu eins og hún er nú orðin. Með húsinu hverfur auðvitað partur af atvinnusögu Hvergerðinga en þarna var allstór vinnustaður til tuga ára. Væntingar voru í upphafi um frekari uppbyggingu tengdrar starfsemi á lóðinni en þær væntingar urðu aldrei að veruleika. Í dag hefur allur iðnaður sem tengist ull og skinnum dregist mjög saman og er ekki svipur hjá sjón miðað við það sem áður var. Sést það best á afdrifum Sambandsverksmiðjanna á Akureyri....

Las mjög góðan bækling Sjálfstæðismanna í Reykjavíkurborg núna áðan og enn og aftur var ég minnt á það hversu góðan meirihluta Reykvíkingar hafa misst. Tók síðan eftir því að forsíðuna prýðir mynd af hópnum og ég get ekki betur séð en að myndin sé tekin hér í Hveragerði á Fossflötinni. Þau komu líka hingað til vinnufundar á haustmánuðum og hafa þá látið taka þessa fínu mynd. Gaman að því ....